Shed akibü müteibü welaubü
Dawid welaubü.
Dawidei shedbü akibü müt tegü janbü ditla ngada, haoeibü maangpon khüyou ka takteian hoba haoeibü you aohoukubü. Thoan kibü molosaonyuei hao mei kipda, lausikei haoei nyekei dühko chühbü shongbe tegü lombula ngada, hoba jembü dangbou shuong khuton haoeibü Boueibü thenyek chühla haiyeida.
17 1Tükdebü janbü ditashi, O kü Bou; ngeibü ngek to haangashi; khüpsilang akibü sembung khop ka ngeibü welaubü ditashi. 2Ngeibü matjem kaibü thedanga louashi; kaibü nyekei tükde kho hapshi.
3Nyi ngeibü maangpon lambei, khüyou ka nyi ngo chühkei, nyi ngo takteian ai ong ahapkei; ngeibü sembungei ashalabü dogo ngei maangsangko. 4Müteibü kümsilei kho, kaibü sembung kabü ngühei sekbülakbü müteibü lamnyu ka ngo bangan kikei. 5Ngeibü younak kaibü lamnyu to himlepan kikei; ngeibü you aohoukei.
6Ngei ka to ngekda, aishanga nyi kü to jongailabü, O kü Bou; kü to haangashi; ngeibü ngüh ditashi. 7Kaibü maangpanglabü üeisanou lenashi; haoeneibü dangbou shuong ka no junga hulabü shuong kho kaibü mae ikei nyi khümenda. 8Kaibü nyekei dühko chühbü shongbe tegü ngo lombushi; kaibü kaak yemkao danko ngo huashi, 9ngo khulimbo longbü amaibü shuong ka, ngo kailepbü ngeibü haitibü dangbou shuong ka.
10Haoenei haoeneibü kaangbü maangpon khinkukei; haoeneibü sembungei yonglambü ngüh lauda. 11Haoenei sen laphetan tou sen kailepbei; sen kaoa attila shanga haoeneibü nyek souhatko. 12Hao mei taketda mühei haibü molosaonyu tegü ki, thoshang ka thoan kibü molosaonyu heshouabü tegü ki.
13Loenashi, O kü Bou! Hao to wapyoan hao tuongtishi! Kaibü inei amaibü müt ka ngeibü langkei khümenshima, 14Kaibü ikei, O kü Bou, ho tegübü müt shuong ka—ho kaodakeibü müt shuong ka, haoeneibü jongsak ho salang ka kibü. Nyi thanbü kho haoeneibü shimung weko shentilabü; haoeneibü shousi shuong souko kia, hoba haoeneibü phenganyenga haoeneibü shoushou shuong la jouan phobü.
15Ngo kho, saopobüa kaibü thenyek haplabü; ngo pialaje, kaibü phatbü hapan ngo senyühshemlabü.
