Zaburi 17

17 ¹Sikia shauri la haki, Baba yangu; tega sikio kilio changu; sikiliza sala yangu itokayo katika midomo isiyo na hila. ²Hukumu yangu ya haki na itoke mbele za uso wako; macho yako na yaone yaliyo sawa.

³Umeuchunguza moyo wangu, umenijaribu wakati wa usiku, umenipima wala hukupata neno lo lote; nimeazimia ya kwamba kinywa changu hakitatenda dhambi. ⁴Kwa habari ya matendo ya wanadamu, kwa neno la midomo yako nimejilinda na njia za mkatili. ⁵Hatua zangu zimeshika sana njia zako; miguu yangu haikuteleza.

⁶Nakuita wewe, kwa maana utaniitikia, Baba yangu; nisikilize; sikia maneno yangu. ⁷Uonyeshe ajabu ya upendo wako wa agano, wewe uokoaye kwa mkono wako wa kuume ⁸Unilinde kama mboni ya jicho lako; unifiche katika kivuli cha mbawa zako, ⁹mbali na waovu wanaonishambulia, adui zangu wa kufisha wanaonizunguka.

¹⁰Wameifunga mioyo yao iliyoshupaa; vinywa vyao vinanena kwa kiburi. ¹¹Wametufuatia nyayo na sasa wanatuzunguka; wamekaza macho yao ili watutupe chini. ¹²Yeye ni kama simba mwenye njaa ya kuurarua mawindo yake, kama mwana-simba anayevizia mahali pa kujificha.

¹³Inuka, Baba yangu! Mkabili, umwangushe chini! Uokoe nafsi yangu na mwovu kwa upanga wako, ¹⁴kwa mkono wako, Baba yangu, na watu kama hao—na watu wa dunia hii ambao fungu lao li katika maisha haya. Unaijaza matumbo yao kwa vile ulivyoviweka akiba; watoto wao wana vingi, nao huyawachia watoto wao wadogo mabaki yao.

¹⁵Nami, nitauona uso wako katika haki; niamkapo, nitatoshelezwa kwa kuufikiria mfano wako.