Ngo Khümenashi
Dawideibü honeibü ngühli che.
Dawid la jembü Bou akiko maibü aikei aying, hoba lubü mühghaü shuongeibü lembüsabü jonla lothedada. Haoei jembü leilang shuong maangamaibü dogo lenda hoba jembü phetphan saomaibü dogo lenda, hoba haoei hee to anyaakeitilabü dogo satenda. Langkei lam kho ponpen olinbüa khümkuda.
16 1Kü Bou, ngo khümenashi, aishanga ngei nyi yoa satenda.
2Ngei kü Bou to lauda, Nyi kü Bunyubou ki; nyi to liman ngeibü maibü aikei aying. 3Kaoa kibü saopobü shuong kho, haoen yaangenbü shuong ki, haoen yoa ngei ngeibü olinbü pendou hapda. 4Lubü mühghaü jungto laangbü shuongeibü khonsak haatilabü; haoeneibü sii lembüsabü ngei ajonlabü, ayingsi haoeneibü namei ngeibü sembungei alaulabü.
5Kü Bou kho ngeibü pienbü phejan hoba ngeibü thung ki; nyi ngeibü phejan püetan lomda. 6Leilang kho ngo shanga maangamaibü kaonyua apbei; maimaitham ngo la saomaibü phetphan che ki.
7Kü to damanchüh kubou kü Bou ngei haükulabü; khüyou ka ongkei ngeibü maangponei kü to lenda. 8Ngei ponpendou kü Bou kü thedanga phoda; aishanga hao ngeibü maenei ki, ngei anyaakeitilabü.
9Khoei ngeibü maangpon haida hoba ngeibü lishang olinda; ngeibü mang ong püetan maanglema kilabü. 10Aishanga kü soushou kho nyi yemlam to aüplabü, ayingsi kaibü Saopobü to nyi anyaülettilabü. a a v10 Peterei Pentikost chaloua (Acts 2:25-28) hoba Paulei (Acts 13:35) habü ngüh shuong Jisu shanga lauko lenkei; Dawideibü seneibü Bou ka püetbü kho Shoueibü haibü ka langngaibü yeikei, hoba haoeibü mang la nyaületbü ühüpti. 11Nyi kü la langkeibü lam lenlabü; kaibü thedanga olin penasoubü ki, kaibü maenei ka ponpen olinbü ki.
