Ili Phārimilu
Davidwui sinā laa.
David na awui Avā maleila kaphā khikha maleimana, kala Vare khangateibingwui ashee ra̱shakchigat ana mapha̱mara. Awui thari chi ningyāngkhaung pambingli tāhaowa kala awui khamathā shimlui leichaowa da ana hānga, kala kazeiramli ali manothāhaimara da ana shitsanga. Kharingwui shongfa chi katang mavaila khamathānli shunga.
16 1Ili phārimilu, iwui Avā, kaja ina nali ngayinkakhuina.
2Ina iwui Avāli hānga: Na iwui Proho Avāna; nawui eina maningla ili kaphā khikha maleimana. 3Ngaleili khalei katharabing chiya, athum khayākakā mibingna, athumlungli iwui ringkaphā saikora lei. 4Vare khangateili shurabingwui khangashei mataisangra; athumwui ashee ra̱shakchigat ina mapha̱mara, kala athumwui aming imorchai eina makānmara.
5Iwui Avā chi iwui kapang kahai yar kala iwui tengkotna; nana iwui khare singtitmi. 6Thari china iwui vang ningyāngkhaung pambingli tāhaowa; Kachangkhat eina, iwui khamathā shimlui leichaowa.
7Ili hāngmachinmi kahai iwui Avāli ina somira; ngayā kachāngnala iwui ning ili tamchitheimi. 8Ina iwui Avāli atam kachida iwui mangāli haichinga; A iwui yashongli lei, chieina ina mangatha̱luimara.
9Chieina iwui ning ringphai kala iwui manglā katonga mathāna; iwui phasāla tāphup eina ngasāmkhuira. 10Khikhalajila nana iwui manglā kazeiramli manothāhaimara, lah nawui Katharapa chili kashui mathei ngasakmara. a a v10 Pentecostli Peterna (Acts 2:25-28) kala Paulna (Acts 13:35) hi tuibing chi Jishuwui pongli hāngmi — Davidna ithumwui Avāli khangachee kahai chi Anaomayarawui kathi eina ringshok kaji thāhaowa, awui phasāna kashui matheimana. 11Nana ili kharingwui shongfa theingasakmi; nawui mangāli khamathānwui khangachā lei, nawui yashongli katang mavaila ringkaphā lei.
