Khipāna Awui Mangāli Pānrakhala?
Davidwui laa.
Kachonshimwui khamongli ngahānkhami — ithumwui Avāwui kathara kaphungli khipāna pamrakhala — chi atam kachiwui otsak eina ngahānkāmi: kakhalāk tui hānga, mili mangachonmana, khongnainaoli makaphā masāmana, kakhanang samphanglala tuingashit mayona, pheizā makhuimana. Chithā mi chi mangatha̱luimara.
15 1O Avā, khipāna nawui kachonshimli pamrakhala? Khipāna nawui kathara kaphungli pamrakhala? 2Ningsāngazipta kazata, kala khamashung khangarong ot sāda, awui wuklungwui eina khamashung tui khamatuia china. 3Ana awui male eina khamashāt tui mamatuimana, awui khongnainaoli sākashi masāmana, kala awui ngasotnaoli makaphā tui mahāngmana. 4Ana ningkakachai mili chinkai, kha ithumwui Avāli khangachee mibingli khayāshi; ali kakhanang samphanglala awui tuingashit chi mayonda, masa̱na̱ungmana. 5Ana awui lupā chi atār eina machishutmana, kala khayon makhalei mili sāza̱ khavai pheizā makhuimana. Ot hi saikora kasā china mangatha̱luimara.
