Mga Awit 15

15 ¹ Ama, sino ang makatitira sa iyong tolda? Sino ang makapananahan sa iyong banal na bundok? ² Ang namumuhay nang walang kapintasan at gumagawa ng matuwid, na nagsasalita ng katotohanan mula sa kanyang puso. ³ Hindi siya naninirang-puri sa pamamagitan ng kanyang dila, hindi nananakit sa kanyang kapwa, at hindi nagsasalita ng masama laban sa kanyang kaibigan. ⁴ Kinamumuhian niya ang isang hamak na tao, ngunit pinararangalan ang mga natatakot sa ating Ama; tinutupad niya ang kanyang sumpa kahit ito'y magdulot sa kanya ng kapinsalaan, at hindi umuurong. ⁵ Hindi niya ipinapautang ang kanyang salapi nang may patubo, at hindi tumatanggap ng suhol laban sa walang sala. Ang sinumang gumagawa ng mga bagay na ito ay hindi kailanman matitinag.