Laa 17

17 ¹Khamashung mashun kashāmilu, O iwui Avā; iwui khavao nganāmilu; kakapik makhalei morchaiwui eina iwui seihā kasā nganāmilu. ²Iwui mashun nawui mangāwui eina shokranu; namikna khamashung ot chi theiranu.

³Nana iwui ning kapeoyangda theihaira, ngayāli nana ili bichar sāhaira, nana ili tamkhayanghaira kha khikhala masamphangmana; ikhamorna morei masāpaimara da ina ngarāna. ⁴Mibingwui otsakwui vanga, nawui morchaiwui tui eina sākashebingwui apong eina ina mazangmara. ⁵Iwui pheikārna nawui shongfali ngavaptithaira; iwui phei manganaithuimana.

⁶Ina nali ngakaowa, kaja nana ili ngahānkāmira, O iwui Avā; ili nganāmilu; iwui tui shāmilu. ⁷Nawui makhangachei leikashiwui matakhak kahai chitheimilu, na nawui yāpang eina yangkashebingwui eina nali ngayinkhuikabingli huikhamena. ⁸Namik lumzailak kahai thāda ili khamayonmilu; nawui angachāng khaya̱li ili thumhaimilu, ⁹ili ngarara makaphā miwui eina, ili kuinama iwui kathiwui yangkashebingwui eina ili thumhaimilu.

¹⁰Athumna khalatta wuklung mararhaida kafahaira; athumwui khamorna kahungla kharekta matui. ¹¹Athumna ithumli phāda ara ithumli kuinamhaira; ithumli ngaleili katanshān khavai amik ngatartei haihaira. ¹²A sāshai serkazam khavai hungshi kazingkha̱ thai, rimda ngakhorpama kazingkha̱nao kathāna.

¹³Ngakarthuilu, O iwui Avā! Ali ngasungmilu, ali tungngasakmilu! Makaphā miwui eina nawui raighai eina iwui mirin kanshokmilu, ¹⁴Nawui pāng eina, O iwui Avā, hikathā mibingwui eina—okathui hiwui mibingwui eina, athumwui sāman hiwui mirinli lei. Nana kaziphai ot eina athumwui wuk chipemmi; athumwui naongarā kashap lei, kala athumna athumwui kateonaobingli mavāt horhaira.

¹⁵Iwui vanga, khamashung khangarong eina ina namai theira; ina ngakarthui tharan, nawui azak theida ina ningyāng ungra.