Moi ke Surakhit Rakhibi
Daud laga ekta suna geet.
David laga Pitri bina tar eku bhi bhal nai, aru tai dusra isor khan laga bhog dhali diya ke mana kore. Tar simana laga rekha khan to mitha jaga te giri ase aru tar ongsho to bisi dhuniya ase, etu tai koi, aru tai biswas kore tai ke kobor te sari diya nahobo. Jivon laga rasta to hodai thaka anondo te khotom hoi.
16 1Moi laga Pitri, moi ke surakhit rakhibi, kilemane moi Apuni te asroy loi ase.
2Moi, moi laga Pitri ke koi ase, Apuni he moi laga Malik Pitri ase; Apuni ke chari kene, moi logot te bhal eku bhi nai. 3Mati te thaka pobitro manuh khan, tarkhan he mohan manuh ase, jun khan te moi laga sob anondo ase. 4Dusra isor laga pichete jua khan laga dukh khan bisi hoi jabo; tarkhan laga khoon laga dhala-boli moi dhali nadibo, aru tarkhan laga nam moi laga oth te bhi nalobo.
5Moi laga Pitri he moi laga basi luwa bhag aru moi laga piyala ase; Apuni he moi laga bhag ke surakhit rakhi ase. 6Simana laga rekha khan moi nimite bhal jagah te girise; hosa bhi moi laga ekta sundor adhikar ase.
7Moi ke upodesh diya moi laga Pitri ke moi dhonyobad dibo; rati te bhi moi laga mon pora moi ke sikhai diye. 8Moi laga Pitri ke moi hodai moi laga usorte rakhi ase; Tai moi laga dyna hath te thaka karone, moi ke hilabo naparibo.
9Etu karone moi laga mon khushi ase aru moi laga pura pran anondo kori ase; moi laga gaw bhi surakhit hoi kene aram koribo. 10Kilemane Apuni moi laga pran ke kobor te chari nadibo, aru Apuni laga pobitro jon ke puchi juwa dikhibo nadibo. a a v10 Pentecost din te Pitor pora (Acts 2:25-28) aru Paul pora (Acts 13:35) etu kotha khan ke Jisu uporte lagaise — amar Pitri uporte Daud laga biswas tu Putro laga mrityu pora punujjibon hoi juwa hoise, aru Tar gaw kitia bhi puchi juwa dikha nai. 11Apuni moi ke jivon laga rasta dikhai diye; Apuni laga age te pura anondo ase, Apuni laga dyna hath te hodai nimite khushi khan ase.