Nditsidzikizeni
Nyimbo yagolidi ya Dhavidhi.
Dhavidhi alibe cinthu cadidi kunja kwa Baba wace, mbakhonda kuthira nsembe za milungu inango. Iye asalonga kuti malire a nthaka yace ndi akutsandzayisa na ntsangala yace ndi yakudeka, mbanyindira kuti nkhabe kusiyiwa m'manda. Njira ya umaso isamalira m'kutsandzaya kwakukhonda mala.
16 1Nditsidzikizeni, Baba wanga, thangwi ndisabisala muna Imwe.
2Ine ndisapanga Baba wanga, kuti: Imwe ndimwe Baba wanga Wankulu; mwakukhonda Imwe, nkhabe cinthu cadidi cindiri naco. 3Anthu akucena ali m'dziko, ndiwo anthu akulemedzeka, mwa iwo ndisagumana kukomerwa kwanga konsene. 4Nyatwa za ale anathamangira mulungu unango zinadzathimizirika; Ine nkhabe kudzaikha ntsembe zawo zakumwa za ciropa, nee madzina awo nkhabe kudzapita pa milomo yanga.
5Baba wanga ndiye mbali yanga yakusankhulwa na ndeko yanga; Imwe musakoya cabelo canga mwakutsidzikiza. 6Mitsendzi ya malire yagwa mu mbuto zakukomedwa; mwandimomwene, ndiri na unthaka wakubalika.
7Ndinadzasimba Baba wanga, ule anandipasa uphungu; maseze mu masiku, ntima wanga usandipfundzisa. 8Ndisakhazika Baba wanga n'dzidzi onsene pamaso panga; thangwi Iye ali ku nkono wanga wa madyo, nkhabe kudzagwedegwedzwa.
9Na tenepo, ntima wanga uli wakukomerwa, na umaso wanga onsene usasekera; manungo anga embo anadzapuma mwakutsidzikiza. 10Thangwi Imwe nkhabe kudzasiya moyo wanga n'manda, nee kudzatawirisa wakucena wanu kuona kuvunda. a a v10 Pedhru pa Pentekoste (Mabasa 2:25-28) na Paulu (Mabasa 13:35) aphatisira mafala awa kuna Yezu — cinyindiro ca Dhavidhi mwa Baba wathu cadzakhala kulamuka kwa Mwana kubuluka ku kufa, manungo ace mbakakhonda kuona kuvunda. 11Imwe musandipangiza njira ya umaso; pamaso panu pana kukomerwa kwakudzala, ku nkono wanu wa madyo kuna pyakukomerwa pyakukhonda kumala.
