Siguigari maningmana, kha Awui Ming
Laa khamayonali. Davidwui laa akha.
Awunga raili zatpai mangāli mibingna awui vang seihā sāa: nawui kachigat phaningungmiranu, nawui khangarān ungshungranu, nawui kapo ngahānkāmiranu. Akhalapli khangatei rāa — kaikhana siguigari kala siguili chihāna, kha hi mibingna ithumwui Avāwui mingli chihāna.
20 1Kakhanang zimiksholi ithumwui Avāna nali ngahānkāmira; Jacobwui Varewui mingna nali phārimiranu. 2Katharapamwui eina ana nali khangachon chihovāmiranu, kala Zionwui eina ana nali yangmiranu. 3Ana nawui kachigat saikora phaningungmiranu, kala nawui rikkatā kachigatli awui mai ngareirāmiranu. 4Nawui ningkachāng ana nali miranu, kala nawui khangarān saikora ungshung ngasakranu.
5Nawui huikhamiwui vang ithumna mathānda vaora, kala ithumwui Avā ming singda ithumna ithumwui philān khāngkāra. Ithumwui Avāna nawui kapo saikora ungshung ngasakranu. 6Ara, ithumwui Avāna awui thao neomi kahaia chili huimi kaji ina theihaira; awui kathara kazingramwui eina, awui yāpangwui huikhamiwui pangshap eina ana ali ngahānkāmi. 7Kaikhana siguigarili chihāna, kala kaikhana siguili chihāna, kha ithumna ithumwui Avāwui mingli chihāna. 8Athumna kongluida pitāra, kha ithumna ngakarthuida nganingtitta. 9O ithumwui Avā, awungali huimilu! Ithumna ngakao tharan ithumli ngahānkāmilu.
