ಕೀರ್ತನೆಗಳು 20 FHB Father's Heart Bible™

20 ¹ಸಂಕಟದ ದಿನದಲ್ಲಿ ನಮ್ಮ ತಂದೆ ನಿನಗೆ ಉತ್ತರಕೊಡಲಿ; ಯಾಕೋಬನ ದೇವರ ನಾಮವು ನಿನ್ನನ್ನು ಕಾಪಾಡಲಿ. ²ಪವಿತ್ರ ಸ್ಥಳದಿಂದ ಅವರು ನಿನಗೆ ಸಹಾಯವನ್ನು ಕಳುಹಿಸಲಿ, ಚೀಯೋನಿನಿಂದ ಅವರು ನಿನ್ನನ್ನು ಬೆಂಬಲಿಸಲಿ. ³ನಿನ್ನ ಎಲ್ಲಾ ಕಾಣಿಕೆಗಳನ್ನು ಅವರು ಜ್ಞಾಪಿಸಿಕೊಂಡು ನಿನ್ನ ಸರ್ವಾಂಗಹೋಮವನ್ನು ಮೆಚ್ಚುಗೆಯಿಂದ ಸ್ವೀಕರಿಸಲಿ. ⁴ನಿನ್ನ ಹೃದಯದ ಇಚ್ಛೆಯನ್ನು ಅವರು ನಿನಗೆ ಅನುಗ್ರಹಿಸಿ ನಿನ್ನ ಎಲ್ಲಾ ಉದ್ದೇಶಗಳನ್ನು ಈಡೇರಿಸಲಿ.

⁵ನಿನ್ನ ರಕ್ಷಣೆಯ ವಿಷಯವಾಗಿ ನಾವು ಆನಂದದಿಂದ ಜಯಘೋಷ ಮಾಡುವೆವು, ನಮ್ಮ ತಂದೆಯ ನಾಮದಲ್ಲಿ ನಾವು ನಮ್ಮ ಧ್ವಜಗಳನ್ನು ಎತ್ತುವೆವು. ನಮ್ಮ ತಂದೆ ನಿನ್ನ ಎಲ್ಲಾ ವಿಜ್ಞಾಪನೆಗಳನ್ನು ನೆರವೇರಿಸಲಿ. ⁶ನಮ್ಮ ತಂದೆ ತಮ್ಮ ಅಭಿಷಿಕ್ತನನ್ನು ರಕ್ಷಿಸುತ್ತಾರೆಂದು ಈಗ ನಾನು ಬಲ್ಲೆ; ತಮ್ಮ ಪವಿತ್ರ ಪರಲೋಕದಿಂದ ತಮ್ಮ ಬಲಗೈಯ ರಕ್ಷಣಾ ಶಕ್ತಿಯಿಂದ ಅವರು ಅವನಿಗೆ ಉತ್ತರಕೊಡುತ್ತಾರೆ. ⁷ಕೆಲವರು ರಥಗಳಲ್ಲಿ, ಕೆಲವರು ಕುದುರೆಗಳಲ್ಲಿ ಭರವಸೆ ಇಡುತ್ತಾರೆ, ಆದರೆ ನಾವು ನಮ್ಮ ತಂದೆಯ ನಾಮದಲ್ಲಿ ಭರವಸೆ ಇಡುತ್ತೇವೆ. ⁸ಅವರು ಕುಗ್ಗಿ ಬೀಳುತ್ತಾರೆ, ಆದರೆ ನಾವು ಎದ್ದು ದೃಢವಾಗಿ ನಿಲ್ಲುತ್ತೇವೆ. ⁹ತಂದೆಯೇ, ಅರಸನನ್ನು ರಕ್ಷಿಸಿರಿ! ನಾವು ಕರೆಯುವಾಗ ನಮಗೆ ಉತ್ತರಕೊಡಿ.