Awunga Mathāna
Laa sāri khareili. Davidwui laa.
Mibingna kharing kapo saida samphangkahai awunga akha sochikatsa, sokhami tarākha eina ungsamphangda sināwui kuihon ngahonmihaira. Awui chihān chi awui otsakli maningla, ithumwui Avāli shitkasangli lei; awui pāngna ali yangkakharingbing saikorali khuira.
21 1O ithumwui Avā, nawui pangshapli awungana mathāna; nawui huikhamili ana kayākha masot chigatkhala! 2Nana ali awui ningkachāng mihaira, kala awui morchaina nali kapo sai chi mashungkhammana. 3Kaja nana sokhami tarākha eina ali ungsamphanga; sinā kachangawui kuihon chi awui kuili ngahonmihaira. 4Ana nali mirin kapo sai, kala nana ali katang mavaila kala mashimānla mirin okkapei mihaira. a a v4 Davidwui awungawui 'katang mavaila kala mashimānla kharing'wui run chi, kathina ali tukkhui masashapa ringshok kahai Awunga Jishuli ungshung ngasakhaira. 5Nawui huikhamiwui vang eina awui tekhamatei reikhamei; khayākakā kala khangamkharei chi nana ali sangmihaira. 6Makahatlākla nana ali katang mavaimana sokhami mihaira, kala nawui mangāli khamathān eina ali mathān ngasakhaira. 7Kaja awungana ithumwui Avāli shitkasangna; Juikhamataia ithumwui Avāwui makhangachei leikashi chi eina ana mangatha̱mara.
8Nawui pāngna nawui yangkashebing saikorali khuira; nawui yāpangna nali yangkakharingbingli tukkhuira. 9Na rā tharan athumli kachuia meifa thāda ngasakra. Ithumwui Avāna awui malungkhavātli athumli yuisangra, kala awui meina athumli chuitāhaora. 10Nana athumwui ara̱-azā okathuiwui eina, athumwui naongarā miwui naomayarabingwui alungwui eina sāshimānra. 11Athumna nawui pongli makaphā ngarānlala kala chukmaja phaninglala, china maungshungmara. 12Kaja nana nawui malāthing chi athumwui maili kharin tharan, athumli ngareithui ngasakra.
13O ithumwui Avā, nawui pangshapli khāngchikatranu! Ithumna laa sāda nawui pangshapli masot mira.
