Chubai Pelar
Ken tulurtem tanishir asoshi. Dawid ken ka.
Purtemi taküm ayimtena angashiba chuba nem tenüngsang agür, temoatsü aikai meketa aser hon korangi kolak amok. Pa amangbaji pei lenmang nung mali, saka asen Tebu dak amangba nung lir, pai pa anema mitsa inyaker ajak pa keti agitsü.
21 1Oba, ne tashi nung chubai pelar; ne tekümtet nung pa koda tulu agi pelaseter! 2Nai pa mulung tejangraba pa nem agütsüogo, aser pa tebang agi ne dang mepishiba nai masot. 3Kechiyong nai temoatsü aika den pa ajurutsü aru; nai hon temeja korang pa kolak madak semok. 4Pai ne dang taküm mepishi, aser nai pa nem agütsü—anogo alangba, teti tatem makai. a a v4 Dawid chuba nem agütsüba “teti tatem makai taküm” ajiji, tasüi menadaktsü makokba, tanaben shishiba Chuba Yisu nung matalokdaktsü. 5Ne tekümtet ajanga pa sentsüwangshi tulu lir; nai pa dang sentsüprang aser majem agütsü. 6Atangji nai pa nem teti aliba temoatsü agütsüogo, aser ne tatenba tepela agi pa dang pela kümdak. 7Kechiaser chubai Tebu dak amanger; Tematiba asen Tebu temeim yimlibilem ajanga pa manokshidaktsütsü.
8Ne keti ne tsükchirtem ajak agitsü; ne teka tajichiji na dang sempar parnok aputsü. 9Kodang nai jungkai adoktsü, nai parnok mi jangruba misem ama kümdaktsütsü. Tebui pa terasaba nung parnok meyokadoktsü, aser pa mii parnok samatsütsü. 10Nai par metsü alima nungi samatsütsü, meimchir rongnungi par chirnur. 11Parnoki na anema tamajung bangjemtep aser tasa ka madentsü oaka, parnoki takok mangutsü makok. 12Kechiyong kodang nai ne lijakjang par tejak anema kaloktsü, nai parnok meyipa tesüleni jenshidaktsütsü.
13Oba, ne tashi nung ulua kümdakjang! Asenoki ne tashi indang ken tenang aser tenüngsang agütsütsü.