Mambo Asakomerwa
Kwa ntsogoleri wa anyakuimba. Nyimbo ya Dhavidhi.
Mbumba isatsandzaya na mambo adaphemba umaso mbaupaswa, mbatambiriwa na nkombo zizinji mbavalisiwa korona wa oru. Kunyindira kwace nkhabe kukhazikika pa pinthu pidacita iye ekhene, mbwenye pa kunyindira Baba wathu, ule anagumana na boko yace aliyense anankonzera pyakuipa.
21 1A Baba wathu, na mphambvu zanu mambo asakomerwa; mu upulumuki wanu iye asasekera kakamwe! 2Imwe mwampasa pinafuna ntima wace, nee mwankhondera pidaphemba milomo yace kwa Imwe. 3Thangwi Imwe mwabwera kudzan'gumana na iye na nkhombo zizinji; mwankhazika nthimba ya ouru wakucena pa nsolo pace. 4Iye aphemba umaso kwa Imwe, penepo Imwe mwampasa — umaso wakutalika kwa muyaya na muyaya. a a v4 Mphaso ya mambo wa Dhavidhi ya “umaso kwa muyaya na muyaya” isafika pa kukwana kwace mwa Yezu, Mambo adalamuswa muli akufa, ule adakhonda kukwanisika kuphatwa na kufa. 5Mbiri yace ndi ikulu thangwi ya upulumuki wanu; Imwe musampasa kuyetimira na ukulu. 6Mwandimomwene Imwe mwampasa nkhombo zakukhonda kumala, mbamukomeresa na kutsandzaya kwakukhala pamaso panu. 7Thangwi mambo asanyindira Baba wathu; thangwi ya kufuna kwakukhonda kumala kwa Wankulu Kakamwe, Baba wathu, iye nee anagwedezwa.
8Djanja yanu inagwata anyamalwa anu onsene; djanja yanu yamadyo inaphata ale anakuwengani. 9Imwe mungaonekera munadzaacitisa ninga ngontho yakugaka moto. Baba wathu anadzaameza mu ukali wace, na moto wace unadzaapsereza. 10Imwe munadzafudza dzindza yawo pa dziko yapantsi, ana awo pakati pa dzindza ya anthu. 11Maseze iwo akunyerezera pyakuipa kuna Imwe, mbasankhula mabatu, iwo nkhabe kukwanisa. 12Thangwi Imwe munadzaacitisa apereke misana yawo, mungalunjika miseu yanu ku nkhope zawo.
13Kwezwani, A Baba wathu, na mphambvu zanu! Ife tinaimba mbatisimba mphambvu zanu.
