Eze Na-aṅụrị Ọṅụ
Nye onyeisi ndị ọ bụ abụ. Abụ Devid.
Ndị mmadụ na-eme ememe maka eze rịọrọ ndụ ma nata ya, onye e ji ngọzi bara ụba zute ma kpube okpueze ọlaedo. Ntụkwasị obi ya adabereghị n'ihe o mere n'onwe ya kama n'ịtụkwasị Nna anyị obi, onye aka ya ga-achọta onye ọ bụla na-agba izu megide ya.
21 1O Nna anyị, nʼime ike gị ka eze na-aṅụrị ọṅụ; nʼime nzọpụta gị, lee ka obi si atọ ya ụtọ nke ukwuu! 2I nyela ya ihe obi ya chọrọ, i gbochighịkwa ya ihe egbugbere ọnụ ya rịọrọ gị. 3Nʼihi na i ji ngọzi bara ụba bịa izute ya; i kpubere ya okpueze e ji ọlaedo dị ọcha mee nʼisi ya. 4Ọ rịọrọ gị ndụ, i nyekwara ya ya—ogologo ụbọchị ruo mgbe ebighị ebi. a a v4 Onyinye nke eze Devid bụ “ndụ ruo mgbe ebighị ebi” na-eru nʼuju ya nʼime Jisọs, Eze ahụ si nʼọnwụ bilie, onye ọnwụ na-enweghị ike ijide. 5Ebube ya dị ukwuu site na nzọpụta gị; ị na-eyikwasị ya ịma mma na ịdị ebube. 6Nʼezie i nyela ya ngọzi na-adịgide adịgide, i meekwala ya ka obi dị ya ụtọ site nʼọṅụ nke ọnụnọ gị. 7Nʼihi na eze na-atụkwasị Nna anyị obi; site nʼịhụnanya na-adịgide nke Onye kachasị ihe niile elu, Nna anyị, a gaghị eme ka o maa jijiji.
8Aka gị ga-ejide ndị iro gị niile; aka nri gị ga-ejidekwa ndị kpọrọ gị asị. 9Mgbe i ga-apụta ìhè, ị ga-eme ka ha dị ka ọkụ na-enwu enwu. Nna anyị ga-eloda ha nʼoke iwe ya, ọkụ ya ga-erepịakwa ha. 10Ị ga-ala mkpụrụ ha nʼiyi site nʼụwa, ụmụ ha site nʼetiti ụmụ mmadụ. 11Ọ bụ ezie na ha na-agba izu ọjọọ megide gị, chepụtakwa nkata aghụghọ, ha agaghị enwe ike imezu ya. 12Nʼihi na ị ga-eme ka ha tụgharịa azụ mgbe ị ga-elegide ha àkụ gị nʼihu.
13Buliela gị elu, O Nna anyị, nʼime ike gị! Anyị ga-abụ abụ ma too ike gị.
