Paibai Laitoryat
Agobo kondaindetap tyeenwek. Tyeenwogitap Daudi.
Boiboitu piik agobo laitoryat ne ki soom saboondo ak kigoochi, ne ki nyoor perurwogik che chaang' ak kinor kuutweet ne po thahabu. Ma mi iyaneennyi eng' poisyonikyik ineegei, ago eng' iyaneetap Kwandanyo, ne konam eunnyi piik tugul che chobchin yaityet.
21 1Ee Kwandanyo, paibai laitoryat eng' kimnateeng'ung'; igasegei miising' eng' yetuneng'ung'! 2Kigoochi ineendet mageetap muguleldanyi, ak ma kaetenen ne kigosoom kutinnyi eng' inyee. 3Amu kiit imeet ineendet eng' perurwogik che chaang'; kigonor metinnyi kuutweet ne po thahabu che tiliileen. 4Kigosoom inyee saboondo, ak kigoochi ineendet—chaang'indap peetuusyek koigeny ak koigeny. a a v4 Kagoochinetap laitoryatap Daudi ne po “saboondo koigeny ak koigeny” koityin itetutyennyi eng' Jeso, Laitoryat ne king'eet ne ma kimuuchi meet konam. 5Oo toroornatennyi eng' yetuneng'ung'; kigoochi ineendet liilindanyi ak telunatennyi. 6Iman kigoochi ineendet perurwogik che unenen, ak kiiboiboisyi ineendet eng' poiboiyetap taing'ung'. 7Amu iyani laitoryat Kwandanyo; eng' myeeindap Ineendet Ne Toroor Miising', Kwandanyo, ma kitumduma.
8Konyaban eung'ung' puuniguk tugul; konam eung'ung' ne po tai icheek che wechin. 9Ye iboorungei, iyai icheek ko uu kwenutap maat ne lalei. Kolugui Kwandanyo icheek eng' nereegekyik, ak kopeel maatanyi icheek. 10Ing'em iyotennywa eng' ng'wony, lagoknywa eng' kwenutap piik. 11Agot kochopchi inyee yaityet ak kochopchi perberindo, ma muuchi kosuldoi. 12Amu iyai icheek komweenen ye imwoge kipchabonik kotokyi togoochikwak.
13Ingotororit, ee Kwandanyo, eng' kimnateeng'ung'! Ketyeni ak kelasun kimnateeng'ung'.