Habakkuk 2

2 ¹Ina iwui raikānpamli nganingra kala shānneira̱li ikhalatta haira; ana ili khi hāngmira, kala iwui maringkaphā pongli ina khi ngahānkāra kaji theikhavai ina rimpamra.

²Chieina ithumwui Avāna ili ngahānkai: "Mahākhami chi kapihailu; lungphekli meisā eina kapilu, chieina chi pā mi china kateibingli hāngmi khavai ngakhuivāra."

Langkasobing kala Shitsangkapaibing

³Kaja aruila mahākhami chi makānkhami atam chi khāngchingda lei; chi khanao shong thāklaka kala makapikmara. Chi lingsanglala, chili khāngchinglu; chi kachangkhata rāra, chi masāngmara. ⁴Yanglu—langkaso mi chi aning khamashung maleimana—kha khamashunga chi awui shitkasang eina ringra. ^a a v4 Paulna paokaphā chi pingsang khavai hi khamarān chi kathumshi hānghaira—Romans 1:17, Galatians 3:11, Hebrews 10:38. Shitkasang eina kharing khamashung mi chi, mahākhami lingsangda leilala ithumwui Avāwui khangashit shitsang mi chi hina. ⁵Chili lāngda, zam hi yorkazāna; langkaso mi chi ngasāmkakhui maleimara. Ana chikhur thāda kākharāma, kala kathe thāda ana katang mavai ningyāng maungmana; ana yur saikora chi akhalattali kazipkhui, kala mibing saikora chi akhalattawui vang ngapāmkashai.

⁶Hi saikorana mana̱shi chānjam eina ali zeikakharui tui hānglaga mahāngmarala: "Akhalattawui maleilui ot kazipsang mili kalākashi ngasāranu— karankha sāngda?—kala khangashit sāda khuikahai ot eina akhalatta khalapsang mi!" ⁷Nawui kachishutabing kashuirak eina ngakarthuimarala, kala nali nganuk ngasakbing thuimarala? Chieina na athumwui vang ngaponkakhui sāra. ⁸Nana yur kachungkha ngaponkhui kahaiwui vang, kala miwui asheewui vang, kala ngalei, keinung kala chili khalei saikorali sākahai khayonwui vang, mibing shākkahai saikorana nali ngaponra. ⁹Makaphā tongza eina awui shim chipem mi, kajuiva̱li awui athip kāsang mi, kalākashiwui eina nganaishok khavai, kalākashi ngasāranu! ¹⁰Mibing kachungkha katathai eina nana nawui shimwui vang maikashi machukhaira; nakhalattawui mirin chi khuithuimihaira. ¹¹Kaja ngalungna phākhowui eina vaora, kala khayimna thingwui eina chi ngahānkāra. ¹²Ashee eina keinung sākakā, kala khayon eina keinung rungkhame mili kalākashi ngasāranu! ¹³Mibingna meili riktā khavai chāda ot sāra, kala yurbingna aremali khalatta chamserra kaji hi saikorawui Avāwui eina maningmarala? ¹⁴Kaja tara̱na shamadru farorhai thāda, ithumwui Avāwui tekhamatei theikakhui eina okathui chi chipemra. ¹⁵Awui khongnaibingli mang ngasak mi, athum khamarip vāshungda nawui malungkhavāt phongshoklaga, athumwui khamahong yangkhavai, kalākashi ngasāranu! ¹⁶Na tekhamateiwui mahutli maikashi eina pemtinghaira. Nakhalatta manglu, kala jakchāngchāng zatlu! Ithumwui Avāwui pāngli khalei tengkot chi nawuitungli ngareida latungra, kala maikashina nawui tekhamatei fakhamra. ¹⁷Kaja Lebanonli sākahai khayonna nali ngaphaoror ngasakra, kala chiwui sāyurbing sākashimānna nali sāmachitra. Hi miwui asheewui vang, kala ngalei, keinung kala chili khalei saikorali sākahai khayonwui vangna. ¹⁸Awui kasaana chi yekkakhui tharan, heikakhui ama̱, kakapik hāshok meoma̱ chi khi kaphā leikhala? Kaja awui kasaana mamatui makānkhanā meoma̱ sākhui tharan, awui khalattawui pāngsak shitsanga. ¹⁹Thing akhali "Ngakarthuilu!", lah kasaikha pama ngalungli "Thuilu!" da hāng mi chi kakhanang ngasāranu! China tamchitheikhala? Yanglu, chi sinā kala lupāsā eina heiror kahaina, chithālala awui alungli khaksui maleimana. ²⁰Kha ithumwui Avā awui kathara shimli lei; okathui saikora awui mangāli chingri eina pamlu.