2 Thotrinchān 32

32 ¹Hi otbing kala ning katong sākahai otbing chiwui thili, Assyriawui awunga Sennacheribna Judahli rāngararhaida, a khalattawui vang sākhaikharā khavai raipan sākahai keinung saikorali kuinamhaowa. ²Hezekiahna Sennacherib rāhaira, kala Jerusalemli rai sākhavai ningngai chi theilaga, ³ana keinungwui ayarli khalei ura̱bing thengngasak khavai awui kathānabing kala kapingabingli ngasanlaga, athumna ali ngachonmi. ⁴Mi kachungkha rākazipta ura̱ saikora kala ngalei ngachaili longkazata kong chi thengngasaklaga, "Khisāda Assyriawui awungabingna rālaga tara̱ kachungkha samphangra?" da hānga.

⁵Ana panglāk eina ot sāda khamā za̱ kahai pambing saikora sakāluishita, chitungli dolanbing sāda, ayarli phākho khangatei akha sākhui, Davidwui keinungwui Millo pangngasaka, kala raisāri kala chāngvei kachungkha sākhui. ^a a v5 Millo chi Davidwui keinung kaphungramli ngalei chihangkhui kala phākho ngaveiphin eina sākahai otna. ⁶Ana mi chitungli raithānabing haisangda, keinungwui ngaveili khalei yāngreili athumli kazipkhuilaga, athumli kakasatla kasatsangda hānga, ⁷"Pingmeida malung zangmeilu. Assyriawui awunga kala awui mi sorkhangasai saikorawui vang mangacheelu, lah ning masuitālu; kaja awuili ngasoda chiwuitungli ithumli ngasoda chi chungmei. ⁸Awuili ngasoda chi phasā pāngthei akha māngna; kha ithumli ngasoda chi ithumwui Avāna, ana ithumli ngachonmira kala ithumwui rai ngararmira." Kala mibingna Judahwui awunga Hezekiahwui tuili chihama.

Sennacheribna Ithumwui Avāli Mana̱ro

⁹Chiwui thili, Assyriawui awunga Sennacheribna awui raimi saikorali ngasoda Lachishli kuinamda leilakha, awui raobing Jerusalemli, Judahwui awunga Hezekiahli kala chili khalei Judah saikorali chihovāda hānga, ¹⁰"Assyriawui awunga Sennacheribna hithāda hānga: Nathumna khili chihamda Jerusalemli kuinamda pamrakhala? ¹¹'PROHO ithumwui Varena Assyriawui awungawui pāng eina ithumli ngatangshokmira' da hānglaga, Hezekiahna nathumli chāmrei kala ra̱chan eina thi khavai horsangda chipat maningmala? ¹²Hi Hezekiahna awui kajuipam kala hanphutbing horhaida, Judah kala Jerusalemli hanphut akha māngli khorumda chili kachigat riktā khavai hānghaida maningmala? ¹³Ina kala ishāvā ngarāna khangatei ngaleibingwui miyur saikorali khisamihaira kaji nathum matheimala? Yur khangateibingwui varebingna iwui pāng eina athumwui ngalei ngatangshokmi kahai leihairala? ¹⁴Ishāvā ngarāna sākazammiser kahai yur chiwui varebing saikorali, khipāna awui mibingli iwui pāng eina huimishapa? Chithākha nathumwui Varena nathumli iwui pāng eina kathāda huimira? ¹⁵"Chiwui vang Hezekiahna nathumli chithāda machipat kala mathankhangui ngasakalu, kala ali mashitsangalu; kaja kachikathā yur lah wungramwui varena awui mibingli iwui pāng lah ishāvā ngarāwui pāng eina ngatangshokmi kahai maleimana; chithākha nathumwui Varena nathumli iwui pāng eina kayākha ngatangshokmira!"

¹⁶Kala awui raobingna ithumwui Avāli kala awui rao Hezekiahli makhamayā tui aruila mataisang matui. ¹⁷Sennacheribna Israelwui Vare ithumwui Avāli makhamayā tui matuida chithibingla kakapi, awuitungli hānga: "Yur khangateibingwui varebingna athumwui mibingli iwui pāng eina ngatangshokmi kahai maleimana; chithāda sāda Hezekiahwui Varenala awui mibingli iwui pāng eina mahuimimara." ¹⁸Keinung tukkhui khavai, athumna phākhotungli khalei Jerusalemwui mibingli samachit kala ngachee ngasak khavai Judahwui tui eina panglāk eina vaowa. ¹⁹Athumna Jerusalemwui Vareli miwui pāng eina kasā okathuiwui miyur saikorawui varebing thāda hānga.

²⁰Chieina awunga Hezekiah eina Amozwui naomayara marān Isaiahna chiwui pongli seihā sāda kazingramli ngakaowa. ²¹Chithāda ithumwui Avāna kazingrao akha chihovāda, Assyriawui awungawui rāmrahli khalei kapingabing, raithānabing, kala otva̱bing saikora sāthata. Sennacheribna maishida shimli latunga, kala awui varewui khorumshimli vāzang tharan, awui khalattawui naomayarabing kaikhana ali apam chili kazei eina shaothata. ²²Chithāda ithumwui Avāna Hezekiah eina Jerusalemwui mibingli Assyriawui awunga Sennacherib kala khangatei saikorawui pāng eina kanmi, kala angunmāng peida athumli phaningungmi. ²³Mi kachungkhana Jerusalemli ithumwui Avāli lemmet phungrāmi, kala Judahwui awunga Hezekiahli aman kasak ot phungrāmi; chiwui thili yur saikorana Hezekiahli khayāshilak eina sāmi.

Hezekiahwui Kakazā, Langkaso, kala Kashāng

²⁴Chithang eina Hezekiahna thikhavai kazāhaowa; ana ithumwui Avāli seihā sai, kala ana ngahānkāda, ali machut akha mihaowa. ²⁵Kha Hezekiahna ali sāmi kaphā chi tandi makhamimana; awui ning langsohaowa, chiwui vang eina malungkhavāt awuitungli kala Judah eina Jerusalemwuitungli tāhaowa. ²⁶Hezekiah eina Jerusalemwui mibingna athumwui langkaso ning chiwui vang khalatta hamsang ngasakwui vang, Hezekiahwui atamli ithumwui Avāwui malungkhavāt athumwuitungli matāmana.

²⁷Hezekiahli kashāng kala khayākakā kachungkha leihaowa. Ana lupāsā, sinā, hirā, nganamkaphā otyur, chāngvei, kala khangatei aman kasak ot haikhavai lanshimbing sākai, ²⁸mā, drakhāra̱ kadhar, kala thaowui mahā haikhavai lanshimbing; sha̱kei yur saikorawui vang shim, kala yaobingwui vang yaoshim sākhui. ²⁹Ana khalattawui vang keinung sākai, kala yao eina sei kachungkha samkaphanga, kaja ithumwui Avāna ali lan kachungkha mihaira. ³⁰Hezekiahna Gihonwui ato tara̱ shokpam chi hapkhanolaga, tara̱ chi Davidwui keinungwui zingtunshong khatā thānmi. Ana kasā saikorali yuichinga. ³¹Babylonwui khamungabingna ali ngaleili shokkahai machut chiwui pongli ngahān khavai pithrai chihovā tharan, ali chāng tam khavai kala awui ningli khalei saikora theira khavai, ithumwui Avāna ali khalatta amāng taimi.

³²Hezekiahwui kasāsā katai kala awui ning katong kasā chi, Amozwui naomayara marān Isaiahwui khamahā, Judah eina Israelwui awungabingwui Lairikli, kapiserhaida lei. ³³Hezekiahna awui avāva̱ ngarā eina pihaowa, kala Davidwui naomayarabingwui ato chikhurli chifahaowa. Judah eina Jerusalemwui kapam saikorana awui kathili ali khayāshida sāmi. Kala awui naomayara Manassehna awui pamli thuimunga.