2 Thotrinchān 33

33 ¹Manasseh mungkaphok tharan a zingkum tharāda khani kāshunghairasai, kala ana Jerusalemli zingkum hangphangāda phangā munga. ²Ithumwui Avāna Israelnaobingwui mangāli kashamserhai yurbingwui ningkakachai ot athishurda, ithumwui Avāwui mangāli ana makhayā ot sai. ³Awui avāva̱ Hezekiahna sākhai kahai kajujuiwui apambing chi ana sakāluishita, Baalwui vang hanphutbing sakai, Asherim sākhui, kala kazingramwui sirā ashangva̱ saikorali akui mashunzangda athumli khoruma.

⁴Ithumwui Avāwui shimli ana hanphutbing sakai, chili ithumwui Avāna hānga, "Jerusalemli iwui ming katang ngasāchinga."

⁵Ithumwui Avāwui shim yāngkhup apam khanili kazingramwui sirā ashangva̱ saikorawui vang ana hanphut sakai. ⁶Hinnomwui naomayarawui tampākli ana awui naomayara ngarāli meili riktai, khanong sāngasaka, kakhara̱, kala laivā sāngasaka, kala kazeikazang eina laivā kasābingli ngasana. Ithumwui Avāwui mangāli makhayā kachungkha sāda ali malungvāt ngasaka.

⁷Ana sākhui kahai rukkakhui ama̱ chi ithumwui Avāwui shimli shichina, chiwui pongli ithumwui Avāna David eina awui naomayara Solomonli hānga, "Hi shimli kala Israelwui shang saikorawui eina ina kapangkhui kahai Jerusalemli, iwui ming katang haira. ⁸Athumna Moseswui khangā eina mihai ain saikora, shiyan-chikan kala sharphahor saikora, ina hāngkahai saikora mathālak eina mayonakha, ina navā ngarāli haimi ngalei chiwui eina Israelli katang mahorthuiluira."

⁹Kha Manassehna Judah eina Jerusalemwui mibingli ma̱zat ngasaka, ithumwui Avāna Israelwui mangāli sākazamser kahai yurbingwuitungli chungmeida makhayā ot kachungkha sai.

¹⁰Ithumwui Avāna Manasseh eina awui mibingli hānga, kha athumna manganāsangmana. ¹¹Chiwui vang ithumwui Avāna athumwui pongli Assyriawui awungawui raithānabing ra̱vaimi; athumna Manassehli hokkhui eina yui, pheipāng eina khalapta, kala Babylonli khuivai. ^a a v11 Kharekumwui raiyuikathabingna tuknarhai mibingli nakhung lah morchai kānzangda hokkhui lah kortar akha eina thānvai. ¹²Kachotkachāng samphang tharan, ana ithumwui Avāwui ngahānkhangai phāda, awui avā ngarāwui Varewui mangāli khalatta kachungkha hamsang ngasaka. ¹³Ana ali seihā sai, kala ithumwui Avāna awui kapo khuisangmida, awui lumashanmi khavaokhon shāda, ali Jerusalemli awui wungramli hanmi. Chiwui thili Manassehna ithumwui Avā hi Vare china da theihaowa. ^b b v13 Manasseh hi Judahwui awungabing lungli makhayā reikhameia sai, chithālala ana khalatta hamsanga tharan ithumwui Avāna ali shāmida shimli hanmi—Avāna makhuisangshap khavai naomayara khipākha morei sāhai maleisā.

¹⁴Chiwui thili ana Davidwui keinungwui ayar phākho chi sakāluishita, Gihonwui zingtunshong tampākli Khai Ngavei khāmong peida, Ophel kuimareida, chi khangkharar sākā. Kala ana Judahwui raipan sākahai keinung saikorali raithānabing haimi. ¹⁵Ana ithumwui Avāwui shimwui eina makathei varebing kala meoma̱ chi horhaida, khorumshim kaphungtonli kala Jerusalemli ana sakai kahai hanphutbing saikorala, keinungwui eina horshok. ¹⁶Ana ithumwui Avāwui hanphut sakāluishita, chitungli pha̱kaphayā kala ningkashiwui kachigat pha̱phayai, kala Judahli ithumwui Avā, Israelwui Vareli otram ngatha̱mi khavai hāngchithei. ¹⁷Chithālala, mibingna kajujuiwui apambingli pha̱kaphayā sāchinga, kha athumwui Vare, ithumwui Avā māngli pha̱phayai.

¹⁸Manassehwui otsak katai, ithumwui Avāli ana seihā kasā, kala Israelwui Vare, ithumwui Avāwui ming eina marānbingna ali hāngkahai tui saikora, Israelwui Awungabingwui Thotrinchān Lairikli kapiserhaida lei. ¹⁹Awui seihā kasā, kathāda ithumwui Avāna ali lumashanmi, awui morei kala mashitkasang saikora, kala a khalatta mahamsang leilakha kajujuipam sākahai, Asherim sākahai, kala rukkakhui meoma̱ sākahai apambing, saikora hi marānbingwui Thotrinchān lairikli kapiserhaida lei. ²⁰Manasseh thihaida awui shimli chifahaowa. Kala anaomayara Amonna awui mahut thuishina.

Amonna Khalatta Hamsang Khavai Ngareithui

²¹Amonna mungkaphok tharan zingkum maga̱da khani kāshunghairasai, kala Jerusalemli zingkum khani munga. ²²Avāva̱ Manassehna kasā thāda, ana ithumwui Avāwui mangāli makaphā ot sai. Amonna Manassehna sākakhui rukkakhui meoma̱ saikorali pha̱phayai kala khoruma. ²³Avāva̱ Manassehna hamsang thāda masāla, ana ithumwui Avāwui mangāli khalatta mahamsangmana; kha Amonna awui khayonkhamāng mataisangmihaira. ²⁴Amonwui raobingna ngathumda mithit khalen sāda, awui konungli ali shaothathaowa. ²⁵Ngalei chiwui mibingna Awunga Amonli mithit khalen kasābing saikorali shaothatpapamhaowa, kala awui nao Josiahli awui mahut awunga sanghaowa.