2 Thotrinchān 34

34 ¹Josiahna mungkaphok tharan a zingkum chishat kāshunghairasai, kala ana Jerusalemli zingkum thumrāda akha munga. ²Ana ithumwui Avāwui mikyanli khamashung chi sai, kala awui avā Davidwui shongfali zatta, uishong yāshong mangareithuimana.

³Awui mungda kum chishat, aruila nao lākha eina, ana ithumwui Avā, awui avā Davidwui Vareli phai wukhananga. Kum tharāda kakhane ana Judah eina Jerusalemli kajujuiwui apambing, Asherim, rukkakhui ama̱bing, kala heikakhui ama̱bing eina tharngasak wukhananga. ⁴Awui mangāli athumna Baalwui hanphutbing sākhaira; atungshong khalei nganamkaphā hanphutbing sātekmi, Asherim, rukkakhui ama̱bing, kala heikakhui ama̱bing sātekserlaga akha̱ sāngasakta, kala chili pha̱phayai kahaibingwui chikhurbingtungli chuitāhaowa. ⁵Ana pāngmonbingwui ara̱kui chi athumwui hanphuttungli mei eina riktāhaowa, chithāda ana Judah eina Jerusalemli tharngasaka. ⁶Manasseh, Ephraim, kala Simeonwui keinungbingli, Naphtali tāshunga, kuimareida khalei athumwui ruinganaili, ^a a v6 Josiahna vāda thei kahai zingtunshongwui keinungbing chi, kum kachungkha thuikahai atamli Assyriana khazanlaga khuikhavā kahaiwui vang, ruinganaili notha kahaina. ⁷Ana hanphutbing sākhaira, Asherim eina rukkakhui ama̱bing akha̱ sāngasakta, kala Israel peida khalei nganamkaphā hanphut saikora sātekhaowa. Chieina ana Jerusalemli latunga.

⁸Awui mungda kum tharāda chishat kākashung eina, ngalei kala shim tharmilaga, ana Azaliahwui nao Shaphan, keinungwui governor Ma-aseiah, kala kapime Joahazwui nao Joah chi, ithumwui Avā shimli chipho khavai chihovai. ⁹Athumna pāngmon kharei Hilkiahli rāda, ngavei khamayonabing Levinaobingna Manasseh, Ephraim, kala Israelwui shākkahai saikora, Judah saikora eina Benjamin, kala Jerusalemwui kapambingwui eina kazipkhui kahai, ithumwui Avā shimli zang kahai pheisā chi horsangmi. ¹⁰Athumna chi ithumwui Avā shim kasāli yangkhamebingwui pāngli mi, kala ithumwui Avā shimli ot kasābingna chi shim chipho kala rānpingluishit khavai singa. ¹¹Shan kahai ngalung, kala Judahwui awungabingna sāshimān ngasak kahai shimbingwui khangen sākhavai thing lo khavai, athumna mistribing eina shim kasābingli pheisā mi. ¹²Mibingna ningtonglak eina ot sai. Athumwui atungli ot chi yangkhamebing chiya Merariwui naomayarabingwui eina Levinaobing Jahath eina Obadiah, kala Kohathbingwui eina Zechariah eina Meshullamna; kala Levinaobing, laa kasā them-kathembing saikorana, ¹³ot phung khavai mibingwui atungli leilaga, ot kasā saikorali kachichāwui otpam athishurda yanga. Levinaobing kaikha kapime, otshinme, kala ngavei khamayonabing sai.

Hilkiahna Ainwui Lairik Samphang

¹⁴Athumna ithumwui Avā shimli zang kahai pheisā chi khuishok tharan, pāngmon Hilkiahna Moseswui pāng eina mikahai ithumwui Avāwui ainwui lairik chi samphanga. ¹⁵Hilkiahna kapime Shaphanli hānga, "Ina ithumwui Avā shimli ainwui lairik chi samphanghaira," kala chi Shaphanli mi.

¹⁶Shaphanna awungali lairik chi khuirāda hānga, "Nawui raobingna athumwui pāngli misang kahai ot saikora sāda lei. ¹⁷Athumna ithumwui Avā shimli samphang kahai pheisā chi pheikhayang, kala chi yangkhamebing eina ot kasābingwui pāngli horsangmi." ¹⁸Kapime Shaphanna awungali hithāda hānga, "Pāngmon Hilkiahna lairik akha ili mihaida lei." Kala ana lairik chi awungawui mangāli pāchithei.

¹⁹Awungana ainwui tui kashā tharan, awui kachon serkhākhaowa. ²⁰Awungana Hilkiah, Shaphanwui nao Ahikam, Micahwui nao Abdon, kapime Shaphan kala awungawui rao Asaiah athumli kasoda hānga, ²¹"Iwui vang, kala Israel eina Judahli nothā kahaibingwui vang, samkaphang lairik chiwui tui chi ithumwui Avāli vāngasanlu; kaja ithumwuitungli heishokmi kahai awui malungvāt hakmahālaka; khikhalajila hi lairikli kapi kahai saikora chi sāda ishāvā ngarāna ithumwui Avāwui tui mamayonthuwa."

²²Chiwui athishurda pāngmon Hilkiah kala awungawui mibing, marānva̱ Huldahwuili vai; ana ava Hasrahwui kapharā Tokhathwui nao, kachonkakhopwui yangkhame Shallumwui apreiva̱na. Ana Jerusalemwui shim kakhane chili pamsai. Athumna hiwui pongli ali ngasanngaruma.

²³Ana athumli hānga, "Ithumwui Avā, Israelwui Varena hithāda hānga: Nathumli iwuili chihokharā mipāli hithāda unghānglu: ²⁴Ithumwui Avāna hithāda hānga: Yanglu, Judah awungawui mangāli pā kahai lairikli kapi kahai kashimān saikora, kalākashi chi ina hi ngaleili kala hiwui kapambingli khuirāra. ²⁵Khikhalajila athumna ili horhaida vare akhapābingli kachigat sāhaira, kala athumna sākahai saikora eina ili malungvāt ngasakhaira; chiwui vang iwui malungvāt hi ngaleitungli heishokra, kala mashimitrarmara. ²⁶Kha ili ngahānkhui khavai nathumli chihokharā Judah awungali hithāda unghānglu, Ithumwui Avā, Israelwui Varena hithāda hānga: nana nganā kahai tui chiwui pongli, ²⁷Khikhalajila nawui ning ngateida, hi ngalei eina hiwui kapambingli awui tui nana kashā tharan ithumwui Avāwui mangāli hamkasangwui vang, kala iwui mangāli hamsangda kachon serkhākta kala iwui mangāli kachapwui vang, inala nawui tui khuisangmihaira da ithumwui Avāna hānga. ²⁸Ina nali nashāvā ngarāli kazipkhuira, kala chingri eina nawui chikhurli chifara. Hi ngaleili kala hiwui mibingli ina khuirā kalākashi saikora chi namik eina matheirarmara." Chieina athumna hi ngahānkā chi awungali khuiunga.

²⁹Chiwui thili awungana Judah kala Jerusalemwui khararnaobing saikora hokhui. ³⁰Awungana Judahwui mibing saikora, Jerusalemwui kapānbing, pāngmonbing, Levinaobing kala mi saikora, reikhamatai eina kateowa, athumli ngasoda ithumwui Avāwui shimli vai. Ithumwui Avāwui shimli samkaphang tuingashit lairikwui tui saikora chi ana athumwui mangāli pāchithei. ³¹Awungana awui pamli nganingda, ithumwui Avāwui thi shurda, awui wuklung ngatong kala awui manglā ngatong eina awui ningkhami, tamkachithei, kala ain mayonda, kala hi lairikli kapi kahai tuingashitwui tui chi ungshungda, ithumwui Avāwui mangāli tuingashit akha sai. ³²Jerusalem kala Benjaminli leikasā mi saikorali ana tuingashit chili nganing ngasaka; kala Jerusalemwui mibingna ithumwui Avā, athumwui avā ngarāwui Varewui tuingashit athishurda sāhaira. ³³Josiahna Israel mibingwui leiretwui eina ningkakachai ot saikora hormiserhaowa, kala Israelli khalei mi saikorali ithumwui Avā, athumwui Vareli otram ngatha̱ ngasaka. A ringda leilakha atam saikorali, athumna ithumwui Avāwui thi shurwui eina mangalanthuwa.