2 ዜና መዋዕል 34

34 ¹ኢዮስያስ በነገሠ ጊዜ የስምንት ዓመት ልጅ ነበር፤ በኢየሩሳሌምም ሠላሳ አንድ ዓመት ነገሠ። ²በአባታችን ፊት መልካም የሆነውን አደረገ፤ ወደ ቀኝም ሆነ ወደ ግራ ሳይታጠፍ በአባቱ በዳዊት መንገድ ተመላለሰ።

³በነገሠ በስምንተኛው ዓመት፣ ገና ብላቴና ሳለ፣ የአባቱን የዳዊትን አምላክ አባታችንን መፈለግ ጀመረ። በዐሥራ ሁለተኛው ዓመት ይሁዳንና ኢየሩሳሌምን ከኰረብታ ላይ መስገጃዎች፣ ከአሼራ ምሰሶዎች፣ ከተቀረጹ ምስሎችና ከቀለጡ የብረት ምስሎች ማንጻት ጀመረ። ⁴በእርሱ ፊት የበኣሎችን መሠዊያዎች አፈረሱ፤ ከእነርሱም በላይ የነበሩትን የዕጣን መሠዊያዎች ቈረጠ፤ የአሼራ ምሰሶዎችን፣ የተቀረጹ ምስሎችንና የቀለጡ ምስሎችን ሰባብሮ ዱቄት እስኪሆኑ ድረስ አደቀቀ፤ ለእነርሱም መሥዋዕት ባቀረቡ ሰዎች መቃብር ላይ በተነ። ⁵የካህናቱንም ዐጥንት በመሠዊያዎቻቸው ላይ አቃጠለ፤ እንዲሁም ይሁዳንና ኢየሩሳሌምን አነጻ። ⁶በምናሴ፣ በኤፍሬምና በስምዖን ከተሞች፣ እስከ ንፍታሌም ድረስ፣ በዙሪያቸው ባሉ ፍራሾቻቸው ውስጥም እንዲሁ አደረገ። ^a a v6 ኢዮስያስ የጎበኛቸው የሰሜን ከተሞች ከዐሥርተ ዓመታት በፊት በአሦር ወረራና ምርኮ ምክንያት በአብዛኛው ፈራርሰው ቀርተው ነበር። ⁷መሠዊያዎቹን አፈረሰ፤ የአሼራ ምሰሶዎችንና የተቀረጹ ምስሎችን ዱቄት እስኪሆኑ ድረስ አደቀቀ፤ በእስራኤልም ሁሉ የዕጣን መሠዊያዎችን ሁሉ ቈረጠ። ከዚያም ወደ ኢየሩሳሌም ተመለሰ።

⁸በነገሠ በዐሥራ ስምንተኛው ዓመት፣ ምድሪቱንና ቤቱን ካነጻ በኋላ፣ የአባታችንን ቤት እንዲጠግኑ የአጻልያን ልጅ ሻፋንን፣ የከተማዪቱን አገረ ገዥ መዓሥያንና ታሪክ ጸሐፊውን የኢዮአካዝን ልጅ ኢዮሐን ላከ። ⁹ወደ ሊቀ ካህናቱ ወደ ኬልቅያስም መጥተው ወደ አባታችን ቤት የገባውን ገንዘብ ሰጡ፤ ይህም ደጆችን የሚጠብቁ ሌዋውያን ከምናሴ፣ ከኤፍሬምና ከእስራኤል ቀሪዎች ሁሉ፣ ከይሁዳና ከብንያም ሁሉ፣ እንዲሁም ከኢየሩሳሌም ነዋሪዎች የሰበሰቡት ነበር። ¹⁰በአባታችን ቤት ሥራ ላይ ለተሾሙት ሠራተኞች ሰጡት፤ በአባታችንም ቤት የሚሠሩት ሠራተኞች ቤቱን ለመጠገንና ለማደስ ተጠቀሙበት። ¹¹የተጠረበ ድንጋይ፣ የይሁዳ ነገሥታት እንዲፈራርሱ የተዉአቸውን ሕንፃዎች ማገርና ጣሪያ የሚሆን እንጨትም ይገዙ ዘንድ አናጺዎችንና ግንበኞችን ከፈሏቸው። ¹²ሰዎቹም በታማኝነት ይሠሩ ነበር። ሥራውን እየመሩ በእነርሱ ላይ የተሾሙት ከሜራሪ ልጆች የሆኑ ሌዋውያን ያሕትና ዖባድያ፣ ከቀዓታውያንም ዘካርያስና መሱላም ነበሩ፤ ሁሉም የሙዚቃ ጥበብ የተካኑ ሌዋውያንም፣ ¹³በተሸካሚዎቹ ላይ ተሹመው ሠራተኞቹን ሁሉ በየሥራው ይመሩ ነበር። ከሌዋውያንም አንዳንዶቹ ጸሐፊዎች፣ ሹማምትና በረኞች ነበሩ።

ኬልቅያስ የሕጉን መጽሐፍ አገኘ

¹⁴ወደ አባታችን ቤት የገባውን ገንዘብ ሲያወጡ፣ ካህኑ ኬልቅያስ በሙሴ እጅ የተሰጠውን የአባታችንን የሕግ መጽሐፍ አገኘ። ¹⁵ኬልቅያስም ጸሐፊውን ሻፋንን፣ “በአባታችን ቤት የሕግ መጽሐፍ አገኘሁ” አለው፤ መጽሐፉንም ለሻፋን ሰጠው።

¹⁶ሻፋንም መጽሐፉን ወደ ንጉሡ አምጥቶ እንዲህ ብሎ አወራ፤ “ባሪያዎችህ በእጃቸው የተጣለውን ሁሉ እያደረጉ ነው። ¹⁷በአባታችን ቤት የተገኘውን ገንዘብ አፍስሰው ለተቈጣጣሪዎቹና ለሠራተኞቹ ሰጡ።” ¹⁸ጸሐፊው ሻፋንም ንጉሡን፣ “ካህኑ ኬልቅያስ አንድ መጽሐፍ ሰጠኝ” አለው፤ በንጉሡም ፊት አነበበው።

¹⁹ንጉሡም የሕጉን ቃል በሰማ ጊዜ ልብሱን ቀደደ። ²⁰ንጉሡም ኬልቅያስን፣ የሻፋንን ልጅ አኪቃምን፣ የሚካን ልጅ ዐብዶንን፣ ጸሐፊውን ሻፋንንና የንጉሡን ባሪያ አሣያን እንዲህ ብሎ አዘዛቸው፤ ²¹“ሄዳችሁ ስለ ተገኘው መጽሐፍ ቃል ለእኔና በእስራኤልና በይሁዳ ለቀሩት አባታችንን ጠይቁልኝ፤ አባቶቻችን የአባታችንን ቃል ስላልጠበቁ፣ በዚህ መጽሐፍ የተጻፈውንም ሁሉ ስላላደረጉ፣ በእኛ ላይ የፈሰሰው ቍጣው ታላቅ ነውና።”

²²ስለዚህ ኬልቅያስና የንጉሡ ሰዎች ነቢዪቱ ወደ ሆነችው ወደ ሑልዳ ሄዱ፤ እርሷም የቶቅሃት ልጅ፣ የሃስራ ልጅ ልብስ ጠባቂው የሰሎም ሚስት ነበረች። በኢየሩሳሌምም በሁለተኛው ክፍለ ከተማ ትኖር ነበር። ስለዚህም ነገር ከእርሷ ጋራ ተነጋገሩ።

²³እርሷም እንዲህ አለቻቸው፤ “የእስራኤል አምላክ አባታችን እንዲህ ይላል፤ ወደ እኔ የላካችሁን ሰው እንዲህ በሉት፤ ²⁴አባታችን እንዲህ ይላል፤ እነሆ፣ በዚህ ስፍራና በነዋሪዎቹ ላይ መቅሠፍትን፣ ለይሁዳ ንጉሥ በተነበበው መጽሐፍ የተጻፉትን መርገሞች ሁሉ ላመጣ ነው። ²⁵እኔን ትተው ለሌሎች አማልክት መሥዋዕት ስላቀረቡ፣ በሠሩትም ሁሉ ወደ ቍጣ ስለ አነሳሱኝ፣ ቍጣዬ በዚህ ስፍራ ላይ ይፈሳል፤ አይጠፋምም። ²⁶ነገር ግን ሊጠይቀኝ የላካችሁን የይሁዳን ንጉሥ እንዲህ በሉት፤ ስለ ሰማኸው ቃል የእስራኤል አምላክ አባታችን እንዲህ ይላል፤ ²⁷ስለዚህ ስፍራና ስለ ነዋሪዎቹ የተናገረውን ቃል በሰማህ ጊዜ፣ ልብህ ስለ ራራ በአባታችንም ፊት ራስህን ስላዋረድህ፣ በፊቴም ራስህን ስላዋረድህ፣ ልብስህንም ስለ ቀደድህ፣ በፊቴም ስላለቀስህ፣ እኔ ራሴ ሰምቼሃለሁ ይላል አባታችን። ²⁸ወደ አባቶችህ እሰበስብሃለሁ፤ በሰላምም በመቃብርህ ትቀበራለህ። በዚህ ስፍራና በነዋሪዎቹ ላይ ከማመጣው መቅሠፍት ሁሉ ዐይኖችህ አያዩም።” ስለዚህ ይህን መልስ ለንጉሡ አመጡለት።

²⁹ከዚያም ንጉሡ የይሁዳንና የኢየሩሳሌምን ሽማግሌዎች ሁሉ ሰበሰበ። ³⁰ንጉሡም ከይሁዳ ሰዎች ሁሉ፣ ከኢየሩሳሌም ነዋሪዎች፣ ከካህናቱ፣ ከሌዋውያንና ከትልቅ እስከ ትንሽ ከሕዝቡ ሁሉ ጋራ ወደ አባታችን ቤት ወጣ። በአባታችንም ቤት የተገኘውን የኪዳኑን መጽሐፍ ቃል ሁሉ አነበበላቸው። ³¹ንጉሡም በስፍራው ቆሞ በአባታችን ፊት ኪዳን አደረገ፤ ይኸውም አባታችንን ለመከተል፣ ትእዛዛቱን፣ ምስክሮቹንና ሥርዐቶቹን በፍጹም ልቡና በፍጹም ነፍሱ ለመጠበቅ፣ በዚህ መጽሐፍ የተጻፈውንም የኪዳኑን ቃል ለመፈጸም ነበር። ³²በኢየሩሳሌምና በብንያም የነበሩትን ሁሉ ለኪዳኑ ቃል እንዲገቡ አደረጋቸው፤ የኢየሩሳሌምም ሕዝብ የአባቶቻቸው አምላክ በሆነው በአባታችን ኪዳን መሠረት አደረጉ። ³³ኢዮስያስም ከእስራኤል ሕዝብ አገር ሁሉ አስጸያፊ ነገሮችን ሁሉ አስወገደ፤ በእስራኤልም ያሉትን ሁሉ አምላካቸውን አባታችንን እንዲያገለግሉ አደረገ። በሕይወት እስካለ ድረስም አባታችንን ከመከተል ፈቀቅ አላሉም።