2 Maũndũ ma Matukũ ma Tene 34 FHB Father's Heart Bible™

34 ¹Josia aarĩ wa mĩaka ĩnana rĩrĩa aatuĩkire mũthamaki, nake agĩthamaka mĩaka mĩrongo ĩtatũ na ũmwe kũu Jerusalemu. ²Nake agĩĩka maũndũ marĩa maarĩ magĩrĩru maitho-inĩ ma Ithe witũ, agĩthiĩ njĩra cia Daudi ithe, atekwĩhũgũra mwena wa ũrĩo kana wa ũmotho.

³Mwaka-inĩ wa ĩnana wa ũthamaki wake, o arĩ kĩmwana, akĩambĩrĩria gũcaria Ithe witũ, o we Ngai wa Daudi ithe. Naguo mwaka-inĩ wa ikũmi na ĩĩrĩ akĩambĩrĩria gũtheria Juda na Jerusalemu, agĩteeria kũndũ kũrĩa gũtũũgĩru, na itugĩ cia Ashera, na mĩhianano ĩrĩa yaicũhĩĩtwo, na mĩhianano ĩrĩa yatwekeetwo. ⁴Marĩ mbere yake magĩtharia ciugũrũ cia Mabaali; nake agĩtemangia ciugũrũ cia ũbumba iria ciarĩ igũrũ rĩacio, akiunanga itugĩ cia Ashera, na mĩhianano ĩrĩa yaicũhĩĩtwo, na mĩhianano ĩrĩa yatwekeetwo, agĩcithĩĩa ituĩke rũkũngũ, agĩcihurunjĩra igũrũ rĩa mbĩrĩra cia arĩa maamĩrutĩĩre magongona. ⁵Nake agĩcina mahĩndĩ ma athĩnjĩri-ngai acio igũrũ rĩa ciugũrũ ciao, na ũndũ ũcio agĩtheria Juda na Jerusalemu. ⁶O na matũũra-inĩ ma Manase, na Efiraimu, na Simeoni, o nginya Nafitali, kũndũ kwao kũrĩa kwanangĩku mĩena yoothe. ^a a v6 Matũũra ma mwena wa gathigathini marĩa Josia aaceererire maatigĩtwo marĩ mwanangĩko nĩ ũndũ wa gũtahwo na gũtwarwo bũrũri-inĩ ũngĩ nĩ Ashuri mĩaka mĩingĩ mbere ĩyo. ⁷Nake agĩtharia ciugũrũ, akiunanga itugĩ cia Ashera na mĩhianano ĩrĩa yaicũhĩĩtwo ĩtuĩke mũtu, na agĩtemangia ciugũrũ ciothe cia ũbumba kũrĩa guothe Isiraeli. Agĩcooka agĩthiĩ Jerusalemu.

⁸Naguo mwaka-inĩ wa ikũmi na ĩnana wa ũthamaki wake, aarĩkia gũtheria bũrũri na nyũmba ĩyo, agĩtũma Shafani mũrũ wa Azalia, na Maaseia mwathi wa itũũra inene, na Joa mũrũ wa Joahazu ũrĩa mwandĩki-maũndũ, nĩguo macookererie nyũmba ya Ithe witũ. ⁹Magĩthiĩ kũrĩ Hilikia mũthĩnjĩri-ngai ũrĩa mũnene, makĩmũnengera mbeeca iria ciarehetwo nyũmba-inĩ ya Ithe witũ, iria Alawii arĩa maarangagĩra ihingo maacookanĩrĩirie kuuma Manase, na Efiraimu, na matigari mothe ma Isiraeli, na kuuma Juda guothe na Benjamini, na arĩa maatũũraga Jerusalemu. ¹⁰Nao makĩmĩnengera aruti-wĩra arĩa maarorĩire wĩra wa nyũmba ya Ithe witũ, nao aruti-wĩra arĩa maarutaga wĩra nyũmba-inĩ ya Ithe witũ makĩmĩhũthĩra gũcookereria na kũnyita ũrũgamĩrĩru nyũmba ĩyo. ¹¹Makĩrĩha abundi na aaki-a-nyũmba nĩguo magũre mahiga maicũhie, na mbaũ cia mĩgamba na cia mĩraba ya nyũmba iria athamaki a Juda maarekereirie ĩtuĩke mwanangĩko. ¹²Nao andũ acio makĩruta wĩra na wĩhokeku. Igũrũ rĩao, matongoragie wĩra, kwarĩ Jahathu na Obadia, Alawii a ariũ a Merari, na Zekaria na Meshulamu a Akohathu; na Alawii acio, arĩa oothe maamenyete kũhũũra inanda, ¹³nĩo maarĩ igũrũ rĩa akũĩ, matongoragie aruti-wĩra oothe wĩra o wĩra. Alawii amwe maarĩ aandĩki, na anene, na aikaria-a-ihingo.

Hilikia Akoona Ibuku rĩa Watho

¹⁴Rĩrĩa maarutaga mbeeca iria ciarehetwo nyũmba-inĩ ya Ithe witũ, Hilikia mũthĩnjĩri-ngai agĩkora Ibuku rĩa Watho wa Ithe witũ, rĩrĩa rĩaheanĩtwo na guoko kwa Musa. ¹⁵Nake Hilikia akĩĩra Shafani mwandĩki atĩrĩ, “Nĩndakora Ibuku rĩa Watho thĩinĩ wa nyũmba ya Ithe witũ,” akĩrĩnengera Shafani.

¹⁶Shafani agĩtwarĩra mũthamaki ibuku rĩu, akĩmũhe ũhoro atĩrĩ, “Ndungata ciaku nĩireka maũndũ mothe marĩa maigĩirwo moko-inĩ mao. ¹⁷Nĩmaita mbeeca iria cĩonekire nyũmba-inĩ ya Ithe witũ, magĩcinengera arũgamĩrĩri na aruti-wĩra.” ¹⁸Shafani mwandĩki agĩĩra mũthamaki atĩrĩ, “Hilikia mũthĩnjĩri-ngai nĩaheire ibuku,” nake Shafani akĩrĩthoomera mũthamaki.

¹⁹Rĩrĩa mũthamaki aiguire ciugo cia Watho ũcio, agĩtembũranga nguo ciake. ²⁰Nake mũthamaki agĩatha Hilikia, na Ahikamu mũrũ wa Shafani, na Abidoni mũrũ wa Mika, na Shafani mwandĩki, na Asaia ndungata ya mũthamaki, akĩmeera atĩrĩ, ²¹“Thiĩi, mũkaahooe Ithe witũ nĩ ũndũ wakwa, o na nĩ ũndũ wa arĩa maatigara Isiraeli na Juda, ũhoro wa ciugo cia ibuku rĩrĩ rĩonekete. Nĩgũkorwo marakara make nĩ manene marĩa maatuĩkĩrĩire igũrũ riitũ, tondũ maithe maitũ matiarũmĩrĩire kiugo kĩa Ithe witũ, nĩguo meeke maũndũ mothe marĩa maandĩkĩtwo ibuku-inĩ rĩrĩ.”

²²Nĩ ũndũ ũcio Hilikia na andũ a mũthamaki magĩthiĩ kũrĩ Hulida, mũndũ-wa-nja mũnabii, mũtumia wa Shalumu mũrũ wa Tokihathu, mũrũ wa Hasira, mũikaria wa nguo. Nake aatũũraga Jerusalemu Gĩcũngwa-inĩ gĩa Keerĩ. Nao makĩaria nake ũhoro ũcio.

²³Nake akĩmeera atĩrĩ, “Ũũ nĩguo Ithe witũ, o we Ngai wa Isiraeli, ekuuga: Ĩrai mũndũ ũrĩa ũmũtũmĩte kũrĩ niĩ atĩrĩ: ²⁴Ũũ nĩguo Ithe witũ ekuuga: Niĩ nĩngũrehera handũ haha mũtino, na kũrĩ arĩa matũũraga ho—irumi ciothe iria ciandĩkĩtwo ibuku-inĩ rĩrĩa rĩathomeirwo mũthamaki wa Juda. ²⁵Nĩ ũndũ nĩmaandiganĩirie, makĩrutĩra ngai ingĩ magongona, makĩĩndakĩria nĩ ũndũ wa maũndũ mothe marĩa mathondekete na moko mao, mangʼũrĩ makwa nĩmagũitĩrĩrio handũ haha, na matigaahoreka. ²⁶No ĩrai mũthamaki wa Juda, ũrĩa ũmũtũmĩte mũũke kũhooya kũrĩ niĩ, atĩrĩ: Ũũ nĩguo Ithe witũ, o we Ngai wa Isiraeli, ekuuga ũhoro wa ciugo iria waiguire: ²⁷Nĩ ũndũ ngoro yaku yarĩ hooreru, na wee ũkĩĩnyiihia mbere ya Ithe witũ rĩrĩa waiguire ciugo ciake cia gũũkĩrĩra handũ haha, na arĩa matũũraga ho, na ũkĩĩnyiihia mbere yakwa, ũgĩtembũranga nguo ciaku, na ũkĩrĩra mbere yakwa, o na niĩ nĩndakũigua, ũguo nĩguo Ithe witũ ekuuga. ²⁸Nĩngũkũcookanĩrĩria na maithe maku, na ũrĩkio thĩini wa mbĩrĩra yaku na thaayũ. Namo maitho maku matikoona mũtino o na ũmwe wa ũrĩa ngũrehithĩria handũ haha, na arĩa matũũraga ho.” Nao magĩcookeria mũthamaki ũhoro ũcio.

²⁹Nake mũthamaki agĩtũmanĩra athuuri othe a Juda na a Jerusalemu moongane. ³⁰Nake mũthamaki akĩambata, agĩthiĩ nyũmba ya Ithe witũ, na andũ othe a Juda, na arĩa maatũũraga Jerusalemu, na athĩnjĩri-ngai, na Alawii, na andũ othe, kuuma arĩa anene nginya arĩa anini. Nake akĩmathomera ciugo ciothe cia Ibuku rĩa Kĩrĩĩkanĩro rĩrĩa rĩonekeire nyũmba-inĩ ya Ithe witũ. ³¹Nake mũthamaki akĩrũgama handũ hake, akĩgĩa kĩrĩĩkanĩro mbere ya Ithe witũ—atĩ nĩakarũmĩrĩra Ithe witũ, na amenyagĩrĩre maathani make, na ũira wake, na mawatho make na ngoro yake yoothe na muoyo wake woothe, nĩguo ahingie ciugo cia kĩrĩĩkanĩro iria ciandĩkĩtwo ibuku-inĩ rĩrĩ. ³²Agĩtũma arĩa othe maarĩ ho kũu Jerusalemu na Benjamini mehĩte kũrĩ rĩo, nao andũ a Jerusalemu magĩĩka kũringana na kĩrĩĩkanĩro kĩa Ithe witũ, o we Ngai wa maithe mao. ³³Nake Josia akĩeheria indo ciothe irĩ magigi kuuma bũrũri-inĩ wothe wa andũ a Isiraeli, agĩtũma arĩa othe maarĩ Isiraeli matungatĩre Ithe witũ, o we Ngai wao. Hĩndĩ yothe ĩrĩa aatũũrire muoyo, matiigana kwĩhũgũra magatiga kũrũmĩrĩra Ithe witũ.