ଯୋଶୀୟ ପିତାଙ୍କ ପଥରେ ଗମନ କରନ୍ତି

ଯୋଶିୟ ବାଳକ ଅବସ୍ଥାରୁ ଆମ ପିତାଙ୍କୁ ଖୋଜିବା ଆରମ୍ଭ କରନ୍ତି ଏବଂ ପୂଜାସ୍ଥାନଗୁଡ଼ିକୁ ଶୁଚି କରନ୍ତି। ମନ୍ଦିର ମରାମତି ସମୟରେ ବ୍ୟବସ୍ଥା ପୁସ୍ତକ ମିଳେ; ସେ ନିଜ ବସ୍ତ୍ର ଚିରନ୍ତି ଏବଂ ହୁଲ୍ଦାଙ୍କ ନିକଟକୁ ଲୋକ ପଠାନ୍ତି, ଯିଏ କହନ୍ତି ଯେ ବିପର୍ଯ୍ୟୟ ନିଶ୍ଚିତ, କିନ୍ତୁ ତାଙ୍କ ଜୀବନକାଳରେ ନୁହେଁ, କାରଣ ତାଙ୍କ ହୃଦୟ କୋମଳ ଥିଲା।

ଅଧ୍ୟାୟ 34।

ଯୋଶୀୟ ରାଜ୍ୟ କରିବାକୁ ଆରମ୍ଭ କରିବା ସମୟରେ ଆଠ ବର୍ଷ ବୟସ୍କ ଥିଲେ, ପୁଣି ସେ ଯିରୂଶାଲମରେ ଏକତିରିଶ ବର୍ଷ ରାଜ୍ୟ କଲେ। ସେ ଆମ୍ଭମାନଙ୍କ ପିତାଙ୍କ ଦୃଷ୍ଟିରେ ଯାହା ଯଥାର୍ଥ, ତାହା କଲେ, ପୁଣି ଆପଣା ପିତା ଦାଉଦଙ୍କ ପଥରେ ଗମନ କରି ଦକ୍ଷିଣ କି ବାମକୁ ଫେରିଲେ ନାହିଁ।

ଆପଣା ରାଜତ୍ଵର ଅଷ୍ଟମ ବର୍ଷରେ, ଯେତେବେଳେ ସେ ବାଳକ ଥିଲେ, ସେତେବେଳେ ସେ ଆପଣା ପିତା ଦାଉଦଙ୍କ ଈଶ୍ଵର ଆମ୍ଭମାନଙ୍କ ପିତାଙ୍କର ଅନ୍ଵେଷଣ କରିବାକୁ ଲାଗିଲେ। ପୁଣି ଦ୍ଵାଦଶ ବର୍ଷରେ ସେ ଉଚ୍ଚସ୍ଥଳୀ, ଆଶେରା ମୂର୍ତ୍ତି, ଖୋଦିତ ପ୍ରତିମା ଓ ଢଳା ଧାତୁ ପ୍ରତିମାସବୁ ଦୂର କରି ଯିହୂଦା ଓ ଯିରୂଶାଲମକୁ ଶୁଚି କରିବାକୁ ଆରମ୍ଭ କଲେ। ତାହାଙ୍କ ସାକ୍ଷାତରେ ଲୋକମାନେ ବାଲ୍‌ଦେବଗଣର ଯଜ୍ଞବେଦିସବୁ ଭାଙ୍ଗି ପକାଇଲେ; ଆଉ ସେ ସେଗୁଡ଼ିକ ଉପରିସ୍ଥ ସୂର୍ଯ୍ୟ-ପ୍ରତିମାସବୁ କାଟି ପକାଇଲେ, ଆଶେରା ମୂର୍ତ୍ତି, ଖୋଦିତ ପ୍ରତିମା ଓ ଢଳା ପ୍ରତିମାସବୁ ଚୂର୍ଣ୍ଣ କରି ଗୁଣ୍ଡ କରି ପକାଇଲେ, ପୁଣି ଯେଉଁମାନେ ସେମାନଙ୍କ ଉଦ୍ଦେଶ୍ୟରେ ବଳିଦାନ କରିଥିଲେ, ସେମାନଙ୍କ କବର ଉପରେ ତାହା ଛିଞ୍ଚି ଦେଲେ। ପୁଣି ସେ ସେମାନଙ୍କ ଯଜ୍ଞବେଦି ଉପରେ ଯାଜକମାନଙ୍କ ଅସ୍ଥିସବୁ ଦଗ୍ଧ କଲେ, ଆଉ ଏରୂପେ ଯିହୂଦା ଓ ଯିରୂଶାଲମକୁ ଶୁଚି କଲେ। ପୁଣି ମନଃଶି, ଇଫ୍ରୟିମ ଓ ଶିମୀୟୋନର ନଗରସମୂହରେ, ଏପରିକି ନପ୍ତାଲି ପର୍ଯ୍ୟନ୍ତ, ଚତୁର୍ଦ୍ଦିଗସ୍ଥିତ ସେମାନଙ୍କ ଭଗ୍ନାବଶିଷ୍ଟ ସ୍ଥାନରେ ସେ ଏହା କଲେ। ^a ପୁଣି ସେ ଯଜ୍ଞବେଦିସବୁ ଭାଙ୍ଗି ପକାଇଲେ, ଆଶେରା ମୂର୍ତ୍ତି ଓ ଖୋଦିତ ପ୍ରତିମାସବୁ ଚୂର୍ଣ୍ଣ କରି ଗୁଣ୍ଡ କରି ପକାଇଲେ, ଆଉ ସମୁଦାୟ ଇସ୍ରାଏଲ ଦେଶର ସର୍ବତ୍ର ସୂର୍ଯ୍ୟ-ପ୍ରତିମାସବୁ କାଟି ପକାଇଲେ। ତତ୍ପରେ ସେ ଯିରୂଶାଲମକୁ ଫେରିଗଲେ।

ଆପଣା ରାଜତ୍ଵର ଅଷ୍ଟାଦଶ ବର୍ଷରେ, ଦେଶ ଓ ଗୃହ ଶୁଚି କଲା ଉତ୍ତାରେ, ସେ ଆମ୍ଭମାନଙ୍କ ପିତାଙ୍କ ଗୃହ ମରାମତି କରିବା ନିମନ୍ତେ ଅତ୍‌ସଲୀୟର ପୁତ୍ର ଶାଫନ୍‌, ନଗରାଧ୍ୟକ୍ଷ ମାସେୟ ଓ ଇତିହାସ-ଲେଖକ ଯୋୟାହସ୍‌ର ପୁତ୍ର ଯୋୟାହକୁ ପ୍ରେରଣ କଲେ। ସେମାନେ ମହାଯାଜକ ହିଲ୍‌କୀୟ ନିକଟକୁ ଆସି ଆମ୍ଭମାନଙ୍କ ପିତାଙ୍କ ଗୃହକୁ ଅଣାଯାଇଥିବା ମୁଦ୍ରା ସମର୍ପଣ କଲେ, ଯାହା ଦ୍ଵାର-ରକ୍ଷକ ଲେବୀୟମାନେ ମନଃଶି, ଇଫ୍ରୟିମ ଓ ଇସ୍ରାଏଲର ସମସ୍ତ ଅବଶିଷ୍ଟ ଲୋକଙ୍କଠାରୁ, ସମଗ୍ର ଯିହୂଦା ଓ ବିନ୍ୟାମୀନ୍‌ଠାରୁ, ପୁଣି ଯିରୂଶାଲମ ନିବାସୀମାନଙ୍କଠାରୁ ସଂଗ୍ରହ କରିଥିଲେ। ପୁଣି ସେମାନେ ଆମ୍ଭମାନଙ୍କ ପିତାଙ୍କ ଗୃହର ତତ୍ତ୍ଵାବଧାରକ କର୍ମକାରୀମାନଙ୍କ ହସ୍ତରେ ତାହା ଦେଲେ, ଆଉ ଆମ୍ଭମାନଙ୍କ ପିତାଙ୍କ ଗୃହର କର୍ମକାରୀମାନେ ତାହା ମରାମତି ଓ ସମାରମ୍ଭ କରିବା ନିମନ୍ତେ ବ୍ୟବହାର କଲେ। ଯିହୂଦାର ରାଜାମାନେ ଯେଉଁ ଗୃହସବୁ ନଷ୍ଟ ହେବାକୁ ଛାଡ଼ି ଦେଇଥିଲେ, ତହିଁ ନିମନ୍ତେ ଖୋଦିତ ପ୍ରସ୍ତର, ପୁଣି ବନ୍ଧେଇ ଓ କଡ଼ି ନିମନ୍ତେ କାଷ୍ଠ କିଣିବାକୁ ସେମାନେ ବଢ଼େଇ ଓ ନିର୍ମାଣକାରୀମାନଙ୍କୁ ମୂଲ୍ୟ ଦେଲେ। ପୁଣି ସେହି ଲୋକମାନେ ବିଶ୍ଵସ୍ତ ଭାବରେ କର୍ମ କଲେ। ସେମାନଙ୍କ ଉପରେ ତତ୍ତ୍ଵାବଧାନ ନିମନ୍ତେ ମରାରିର ସନ୍ତାନ ଲେବୀୟ ଯହତ୍‌ ଓ ଓବଦୀୟ, ପୁଣି କହାତୀୟମାନଙ୍କ ମଧ୍ୟରୁ ଜିଖରୀୟ ଓ ମଶୁଲ୍ଲମ୍‌ ନିଯୁକ୍ତ ଥିଲେ; ଆଉ ବାଦ୍ୟ-କୌଶଳରେ ନିପୁଣ ସମସ୍ତ ଲେବୀୟ, ଭାରବାହକମାନଙ୍କ ଉପରେ ନିଯୁକ୍ତ ଥାଇ ପ୍ରତ୍ୟେକ କର୍ମାନୁସାରେ ସମସ୍ତ କର୍ମକାରୀଙ୍କୁ ତତ୍ତ୍ଵାବଧାନ କଲେ। କେତେକ ଲେବୀୟ ଲେଖକ, କର୍ମଚାରୀ ଓ ଦ୍ଵାରପାଳ ଥିଲେ।

ହିଲ୍‌କୀୟ ବ୍ୟବସ୍ଥା ପୁସ୍ତକ ପ୍ରାପ୍ତ ହୁଅନ୍ତି

ଆମ୍ଭମାନଙ୍କ ପିତାଙ୍କ ଗୃହକୁ ଅଣାଯାଇଥିବା ମୁଦ୍ରା ଯେତେବେଳେ ସେମାନେ ବାହାର କରୁଥିଲେ, ସେତେବେଳେ ହିଲ୍‌କୀୟ ଯାଜକ ମୋଶାଙ୍କ ଦ୍ଵାରା ଦତ୍ତ ଆମ୍ଭମାନଙ୍କ ପିତାଙ୍କ ବ୍ୟବସ୍ଥା ପୁସ୍ତକ ପ୍ରାପ୍ତ ହେଲେ। ତହିଁରେ ହିଲ୍‌କୀୟ ଶାଫନ୍‌ ଲେଖକକୁ କହିଲେ, “ମୁଁ ଆମ୍ଭମାନଙ୍କ ପିତାଙ୍କ ଗୃହରେ ବ୍ୟବସ୍ଥା ପୁସ୍ତକ ପ୍ରାପ୍ତ ହୋଇଅଛି।” ଆଉ ହିଲ୍‌କୀୟ ଶାଫନ୍‌କୁ ତାହା ଦେଲେ।

ପୁଣି ଶାଫନ୍‌ ରାଜାଙ୍କ ନିକଟକୁ ପୁସ୍ତକ ଆଣି ବିବରଣ ଦେଇ କହିଲା, “ଆପଣଙ୍କ ଦାସମାନଙ୍କ ହସ୍ତରେ ଯାହା ସମର୍ପିତ, ସେମାନେ ସେହିସବୁ କରୁଅଛନ୍ତି। ଆଉ ସେମାନେ ଆମ୍ଭମାନଙ୍କ ପିତାଙ୍କ ଗୃହରେ ପ୍ରାପ୍ତ ମୁଦ୍ରା ଢାଳି ବାହାର କରି ତତ୍ତ୍ଵାବଧାରକ ଓ କର୍ମକାରୀମାନଙ୍କ ହସ୍ତରେ ଦେଇଅଛନ୍ତି।” ଆଉ ଶାଫନ୍‌ ଲେଖକ ରାଜାଙ୍କୁ ଜଣାଇ କହିଲା, “ହିଲ୍‌କୀୟ ଯାଜକ ମୋତେ ଗୋଟିଏ ପୁସ୍ତକ ଦେଇଅଛନ୍ତି।” ପୁଣି ଶାଫନ୍‌ ରାଜାଙ୍କ ସାକ୍ଷାତରେ ତାହା ପାଠ କଲା।

ପୁଣି ବ୍ୟବସ୍ଥାର ବାକ୍ୟ ଶୁଣନ୍ତେ, ରାଜା ଆପଣା ବସ୍ତ୍ର ଚିରିଲେ। ଆଉ ରାଜା ହିଲ୍‌କୀୟକୁ, ଶାଫନ୍‌ର ପୁତ୍ର ଅହୀକାମ୍‌କୁ, ମୀଖାର ପୁତ୍ର ଅବ୍‌ଦୋନ୍‌କୁ, ଶାଫନ୍‌ ଲେଖକକୁ ଓ ଅସାୟ ନାମକ ରାଜଦାସକୁ ଆଜ୍ଞା ଦେଇ କହିଲେ, “ତୁମ୍ଭେମାନେ ଯାଇ, ଏହି ପ୍ରାପ୍ତ ପୁସ୍ତକର ବାକ୍ୟ ବିଷୟରେ ମୋʼ ନିମନ୍ତେ ଓ ଇସ୍ରାଏଲ ଓ ଯିହୂଦାରେ ଅବଶିଷ୍ଟ ଲୋକଙ୍କ ନିମନ୍ତେ ଆମ୍ଭମାନଙ୍କ ପିତାଙ୍କଠାରେ ପଚାର। କାରଣ ଆମ୍ଭମାନଙ୍କ ଉପରେ ଢଳା ତାହାଙ୍କ କ୍ରୋଧ ମହତ୍‌, ଯେଣୁ ଆମ୍ଭମାନଙ୍କ ପିତୃଲୋକମାନେ ଏହି ପୁସ୍ତକରେ ଲିଖିତ ସମସ୍ତ ବାକ୍ୟ ଅନୁସାରେ କର୍ମ କରିବା ନିମନ୍ତେ ଆମ୍ଭମାନଙ୍କ ପିତାଙ୍କ ବାକ୍ୟ ପାଳନ କଲେ ନାହିଁ।”

ତେଣୁ ହିଲ୍‌କୀୟ ଓ ରାଜାଙ୍କ ନିଯୁକ୍ତ ଲୋକମାନେ ବସ୍ତ୍ରାଗାର-ରକ୍ଷକ ହସ୍ରାର ପୌତ୍ର ତୋଖତ୍‌ର ପୁତ୍ର ଶଲ୍ଲୁମ୍‌ର ଭାର୍ଯ୍ୟା ହୁଲ୍‌ଦା ନାମ୍ନୀ ଭବିଷ୍ୟଦ୍‌ବକ୍ତ୍ରୀ ନିକଟକୁ ଗଲେ। ସେ ଯିରୂଶାଲମର ଦ୍ଵିତୀୟ ବିଭାଗରେ ବାସ କରୁଥିଲେ। ସେମାନେ ଏହି ବିଷୟରେ ତାହାଙ୍କ ସଙ୍ଗେ କଥାବାର୍ତ୍ତା କଲେ।

ତହିଁରେ ସେ ସେମାନଙ୍କୁ କହିଲେ, “ଇସ୍ରାଏଲର ଈଶ୍ଵର ଆମ୍ଭମାନଙ୍କ ପିତା ଏହି କଥା କହନ୍ତି: ଯେଉଁ ବ୍ୟକ୍ତି ତୁମ୍ଭମାନଙ୍କୁ ମୋʼ ନିକଟକୁ ପଠାଇଅଛନ୍ତି, ତାହାଙ୍କୁ କୁହ: ଆମ୍ଭମାନଙ୍କ ପିତା ଏହି କଥା କହନ୍ତି: ଦେଖ, ଆମ୍ଭେ ଏହି ସ୍ଥାନ ଓ ଏହାର ନିବାସୀମାନଙ୍କ ଉପରେ ଅମଙ୍ଗଳ ଘଟାଇବାକୁ ଉଦ୍ୟତ ଅଟୁ, ଅର୍ଥାତ୍‌, ଯିହୂଦାର ରାଜା ସାକ୍ଷାତରେ ପଠିତ ପୁସ୍ତକରେ ଲିଖିତ ସମସ୍ତ ଅଭିଶାପ। ଯେହେତୁ ସେମାନେ ଆମ୍ଭକୁ ପରିତ୍ୟାଗ କରି ଅନ୍ୟ ଦେବତାଗଣ ଉଦ୍ଦେଶ୍ୟରେ ଧୂପ ଜ୍ଵଳାଇ ଆପଣାମାନଙ୍କ ହସ୍ତକୃତ ସମସ୍ତ କର୍ମ ଦ୍ଵାରା ଆମ୍ଭକୁ ବିରକ୍ତ କରିଅଛନ୍ତି, ଏଣୁ ଆମ୍ଭର କ୍ରୋଧ ଏହି ସ୍ଥାନ ଉପରେ ଢଳାଯିବ ଓ ନିର୍ବାଣ ହେବ ନାହିଁ। ମାତ୍ର ଆମ୍ଭଠାରେ ପଚାରିବା ନିମନ୍ତେ ତୁମ୍ଭମାନଙ୍କୁ ପ୍ରେରଣ କରିଥିବା ଯିହୂଦାର ରାଜାଙ୍କୁ ତୁମ୍ଭେମାନେ ଏହା କୁହ: ତୁମ୍ଭେ ଯେଉଁ ବାକ୍ୟ ଶୁଣିଅଛ, ତଦ୍‌ବିଷୟରେ ଇସ୍ରାଏଲର ଈଶ୍ଵର ଆମ୍ଭମାନଙ୍କ ପିତା ଏହି କଥା କହନ୍ତି: ଏହି ସ୍ଥାନ ଓ ଏହାର ନିବାସୀମାନଙ୍କ ବିରୁଦ୍ଧରେ ଆମ୍ଭମାନଙ୍କ ପିତାଙ୍କ ବାକ୍ୟ ଶୁଣିବା ସମୟରେ ଯେହେତୁ ତୁମ୍ଭର ଅନ୍ତଃକରଣ କୋମଳ ହୋଇଥିଲା ଓ ତୁମ୍ଭେ ଆମ୍ଭମାନଙ୍କ ପିତାଙ୍କ ସମ୍ମୁଖରେ ଆପଣାକୁ ନମ୍ର କରିଥିଲ, ପୁଣି ଆମ୍ଭ ସମ୍ମୁଖରେ ଆପଣାକୁ ନମ୍ର କରି ଆପଣା ବସ୍ତ୍ର ଚିରି ଆମ୍ଭ ସମ୍ମୁଖରେ ରୋଦନ କରିଥିଲ, ଏଣୁ ଆମ୍ଭେ ମଧ୍ୟ ତୁମ୍ଭ କଥା ଶୁଣିଅଛୁ, ଏହା ଆମ୍ଭମାନଙ୍କ ପିତା କହନ୍ତି। ଦେଖ, ଆମ୍ଭେ ତୁମ୍ଭକୁ ତୁମ୍ଭ ପିତୃଲୋକମାନଙ୍କ ନିକଟରେ ସଂଗ୍ରହ କରିବା, ପୁଣି ତୁମ୍ଭେ ଶାନ୍ତିରେ ଆପଣା କବରକୁ ନିଆଯିବ। ଆମ୍ଭେ ଏହି ସ୍ଥାନ ଓ ଏହାର ନିବାସୀମାନଙ୍କ ଉପରେ ଯେଉଁ ସମସ୍ତ ଅମଙ୍ଗଳ ଘଟାଇବା, ତହିଁର କିଛି ତୁମ୍ଭର ଚକ୍ଷୁ ଦେଖିବ ନାହିଁ।” ତହୁଁ ସେମାନେ ରାଜାଙ୍କ ନିକଟକୁ ଏହି ଉତ୍ତର ଆଣିଲେ।

ଏଥିଉତ୍ତାରେ ରାଜା ଯିହୂଦା ଓ ଯିରୂଶାଲମର ସମସ୍ତ ପ୍ରାଚୀନବର୍ଗଙ୍କୁ ଏକତ୍ର କଲେ। ପୁଣି ରାଜା ଯିହୂଦାର ସମସ୍ତ ଲୋକ, ଯିରୂଶାଲମ ନିବାସୀ, ଯାଜକ, ଲେବୀୟ ଓ କ୍ଷୁଦ୍ର ଓ ମହତ୍‌ ସମସ୍ତ ଲୋକଙ୍କ ସହିତ ଆମ୍ଭମାନଙ୍କ ପିତାଙ୍କ ଗୃହକୁ ଉଠିଗଲେ। ଆଉ ସେ ଆମ୍ଭମାନଙ୍କ ପିତାଙ୍କ ଗୃହରେ ପ୍ରାପ୍ତ ନିୟମ-ପୁସ୍ତକର ସମସ୍ତ ବାକ୍ୟ ସେମାନଙ୍କ କର୍ଣ୍ଣଗୋଚରରେ ପାଠ କଲେ। ପୁଣି ରାଜା ଆପଣା ସ୍ଥାନରେ ଠିଆ ହୋଇ ଆମ୍ଭମାନଙ୍କ ପିତାଙ୍କ ଅନୁଗମନ କରିବାକୁ, ପୁଣି ଆପଣାର ସମସ୍ତ ଅନ୍ତଃକରଣ ଓ ସମସ୍ତ ପ୍ରାଣ ସହିତ ତାହାଙ୍କ ଆଜ୍ଞା, ସାକ୍ଷ୍ୟ ଓ ବିଧିସବୁ ପାଳନ କରିବାକୁ, ଆଉ ଏହି ପୁସ୍ତକରେ ଲିଖିତ ନିୟମର ବାକ୍ୟସବୁ ସଫଳ କରିବାକୁ ଆମ୍ଭମାନଙ୍କ ପିତାଙ୍କ ସମ୍ମୁଖରେ ନିୟମ କଲେ। ପୁଣି ଯିରୂଶାଲମ ଓ ବିନ୍ୟାମୀନ୍‌ରେ ଉପସ୍ଥିତ ସମସ୍ତ ଲୋକଙ୍କୁ ସେ ତହିଁ ପ୍ରତି ଅଙ୍ଗୀକାର କରାଇଲେ। ଆଉ ଯିରୂଶାଲମ ନିବାସୀମାନେ ଆପଣାମାନଙ୍କ ପିତୃଗଣର ଈଶ୍ଵର ଆମ୍ଭମାନଙ୍କ ପିତାଙ୍କ ନିୟମାନୁସାରେ କର୍ମ କଲେ। ପୁଣି ଯୋଶୀୟ ଇସ୍ରାଏଲ-ସନ୍ତାନଗଣର ସମସ୍ତ ଅଞ୍ଚଳରୁ ସମସ୍ତ ଘୃଣାଯୋଗ୍ୟ ବସ୍ତୁ ଦୂର କରିଦେଲେ, ଆଉ ଇସ୍ରାଏଲରେ ଉପସ୍ଥିତ ସମସ୍ତ ଲୋକଙ୍କୁ ସେମାନଙ୍କ ଈଶ୍ଵର ଆମ୍ଭମାନଙ୍କ ପିତାଙ୍କର ସେବା କରାଇଲେ। ସେ ବଞ୍ଚିଥିବା ସମସ୍ତ ଦିନ ସେମାନେ ଆମ୍ଭମାନଙ୍କ ପିତାଙ୍କ ଅନୁଗମନରୁ ବିମୁଖ ହେଲେ ନାହିଁ।