2 நாளாகமம் 32

32 ¹இந்தக் காரியங்களுக்கும் இந்த உண்மையான செயல்களுக்கும் பின்பு, அசீரியாவின் ராஜாவாகிய சனகெரிப் யூதாவின்மேல் படையெடுத்து வந்து, அதின் அரணான பட்டணங்களை முற்றிக்கை போட்டு, அவைகளைத் தனக்காகக் கைப்பற்றிக்கொள்ள நினைத்தான். ²சனகெரிப் எருசலேமுக்கு விரோதமாக யுத்தம்பண்ண மனதாய் வந்திருக்கிறதை எசேக்கியா கண்டபோது, ³பட்டணத்திற்கு வெளியே இருந்த ஊற்றுகளை அடைத்துப்போடுவதைக்குறித்து அவன் தன் பிரபுக்களோடும் பராக்கிரமசாலிகளோடும் ஆலோசனைபண்ணினான்; அவர்கள் அவனுக்கு உதவிசெய்தார்கள். ⁴அநேக ஜனங்கள் கூடிவந்து, எல்லா ஊற்றுகளையும் தேசத்தின் நடுவே ஓடின ஆற்றையும் அடைத்து, “அசீரியாவின் ராஜாக்கள் வந்து ஏராளமான தண்ணீரைக் கண்டடைவானேன்?” என்றார்கள்.

⁵அவன் மிகுந்த பிரயத்தனம்பண்ணி, இடிந்துபோன மதிலையெல்லாம் திரும்பக் கட்டி, அதின்மேல் கொத்தளங்களை எழுப்பி, வெளியே மற்றொரு மதிலையும் கட்டி, தாவீதின் நகரத்திலிருந்த மில்லோவைப் பலப்படுத்தி, ஏராளமான ஆயுதங்களையும் கேடகங்களையும் செய்தான். ^a a v5 மில்லோ என்பது தாவீதின் நகரத்தின் மலைச்சரிவில் கட்டப்பட்ட படிநிலை நிரப்புத்தளங்களும் தாங்குசுவர்களும் அடங்கிய அமைப்பாகும். ⁶அவன் ஜனங்கள்மேல் யுத்தச் சேனாபதிகளை ஏற்படுத்தி, பட்டணத்து வாசலின் வீதியில் அவர்களைக் கூட்டிவரச்செய்து, அவர்களைத் தேற்றி: ⁷“நீங்கள் பலங்கொண்டு தைரியமாயிருங்கள்; அசீரியாவின் ராஜாவுக்கும் அவனோடிருக்கிற எல்லாக் கூட்டத்திற்கும் பயப்படாமலும் கலங்காமலும் இருங்கள்; ஏனெனில் அவனோடிருக்கிறவர்களைப்பார்க்கிலும் நம்மோடிருக்கிறவர்கள் அதிகம். ⁸அவனோடிருக்கிறது மாம்சப் புயம்மட்டுமே; நம்மோடிருக்கிறவர் எங்கள் பிதா; அவர் நமக்கு உதவிசெய்து நம்முடைய யுத்தங்களை நடத்துவார்” என்றான். ஜனங்கள் யூதாவின் ராஜாவாகிய எசேக்கியாவின் வார்த்தைகளை நம்பிச் சார்ந்துகொண்டார்கள்.

சனகெரிப் எங்கள் பிதாவைப் பரிகாசம் செய்கிறான்

⁹இதற்குப்பின்பு, அசீரியாவின் ராஜாவாகிய சனகெரிப் தன் எல்லாச் சேனையோடும் லாகீசை முற்றிக்கை போட்டுக்கொண்டிருக்கையில், எருசலேமிலிருந்த யூதாவின் ராஜாவாகிய எசேக்கியாவினிடத்திற்கும் அங்கிருந்த யூதா அனைவரினிடத்திற்கும் தன் ஊழியக்காரரை அனுப்பி: ¹⁰“அசீரியாவின் ராஜாவாகிய சனகெரிப் சொல்லுகிறது என்னவென்றால்: எருசலேமில் முற்றிக்கைபோடப்பட்டிருக்கிற நீங்கள் எதின்மேல் நம்பிக்கையாயிருக்கிறீர்கள்? ¹¹‘நம்முடைய தேவனாகிய கர்த்தர் அசீரியாவின் ராஜாவின் கைக்கு நம்மைத் தப்புவிப்பார்’ என்று சொல்லி, எசேக்கியா உங்களைப் பசியினாலும் தாகத்தினாலும் சாகும்படி ஒப்புக்கொடுத்து உங்களை மோசம்போக்குகிறதில்லையா? ¹²யூதாவையும் எருசலேமையும் நோக்கி, ‘ஒரே பலிபீடத்தின்முன் பணிந்துகொண்டு, அதின்மேல் தூபங்காட்டுங்கள்’ என்று சொல்லி, அவருடைய மேடைகளையும் பலிபீடங்களையும் அகற்றிப்போட்டவன் இந்த எசேக்கியா அல்லவா? ¹³நானும் என் பிதாக்களும் மற்ற தேசங்களின் சகல ஜனங்களுக்கும் செய்ததை நீங்கள் அறியீர்களா? அந்தத் தேசங்களின் தேவர்களால் தங்கள் தேசங்களை என் கைக்குத் தப்புவிக்க முடிந்ததா? ¹⁴என் பிதாக்கள் சங்காரம்பண்ணின அந்த ஜாதிகளுடைய தேவர்களில் எந்தத் தேவனால் தன் ஜனத்தை என் கைக்குத் தப்புவிக்க முடிந்தது? அப்படியிருக்க உங்கள் தேவன் உங்களை என் கைக்கு எப்படித் தப்புவிப்பார்? ¹⁵ஆகையால் எசேக்கியா உங்களை இப்படி மோசம்போக்காமலும் உங்களை ஏமாற்றாமலும் இருக்கட்டும்; அவனை நம்பாதேயுங்கள்; எந்த ஜாதியின் அல்லது எந்த ராஜ்யத்தின் தேவனும் தன் ஜனத்தை என் கைக்கும் என் பிதாக்களின் கைக்கும் தப்புவிக்க முடியாதிருக்க, உங்கள் தேவன் உங்களை என் கைக்குத் தப்புவிப்பது எத்தனை குறைவு!”

¹⁶அவனுடைய ஊழியக்காரர் இன்னும் அதிகமாய் எங்கள் பிதாவுக்கு விரோதமாகவும் அவருடைய ஊழியக்காரனாகிய எசேக்கியாவுக்கு விரோதமாகவும் பேசினார்கள். ¹⁷மேலும் சனகெரிப் இஸ்ரவேலின் தேவனாகிய எங்கள் பிதாவை நிந்திக்கும்படி நிருபங்களை எழுதி, அவருக்கு விரோதமாய்: “தேசங்களின் தேவர்கள் தங்கள் ஜனத்தை என் கைக்குத் தப்புவிக்காதிருந்ததுபோல, எசேக்கியாவின் தேவனும் தம்முடைய ஜனத்தை என் கைக்குத் தப்புவிப்பதில்லை” என்று பேசினான். ¹⁸பட்டணத்தைப் பிடித்துக்கொள்ளும்படி, மதிலின்மேல் இருந்த எருசலேமின் ஜனங்களைப் பயமுறுத்திக் கலங்கடிக்கும்படியாக, அவர்கள் யூதாவின் பாஷையிலே உரத்த சத்தமாய்க் கூப்பிட்டார்கள். ¹⁹மனுஷர் கைவேலையாகிய பூமியின் ஜனங்களுடைய தேவர்களைப்பற்றிப் பேசுகிறதுபோல, எருசலேமின் தேவனைப்பற்றியும் பேசினார்கள்.

²⁰இதினிமித்தம் ராஜாவாகிய எசேக்கியாவும் ஆமோஸின் குமாரனாகிய ஏசாயா தீர்க்கதரிசியும் ஜெபம்பண்ணி, வானத்தை நோக்கிக் கூப்பிட்டார்கள். ²¹அப்பொழுது எங்கள் பிதா ஒரு தூதனை அனுப்பினார்; அவர் அசீரியா ராஜாவின் பாளயத்தில் இருந்த சகல பராக்கிரமசாலிகளையும் தலைவர்களையும் அதிபதிகளையும் சங்காரம்பண்ணினார். சனகெரிப் வெட்கத்தோடே தன் தேசத்திற்குத் திரும்பினான்; அவன் தன் தேவனுடைய கோவிலுக்குள் பிரவேசித்தபோது, அவனுடைய சொந்தக் குமாரரில் சிலர் அங்கே அவனைப் பட்டயத்தால் வெட்டிப்போட்டார்கள். ²²இப்படி எங்கள் பிதா எசேக்கியாவையும் எருசலேமின் குடிகளையும் அசீரியாவின் ராஜாவாகிய சனகெரிப்பின் கைக்கும் மற்ற எல்லாருடைய கைக்கும் தப்புவித்து, சுற்றிலும் அவர்களைக் காப்பாற்றினார். ²³அநேகர் எருசலேமுக்கு எங்கள் பிதாவுக்குக் காணிக்கைகளையும், யூதாவின் ராஜாவாகிய எசேக்கியாவுக்கு உச்சிதமான வஸ்துக்களையும் கொண்டுவந்தார்கள்; அதன்பின்பு அவன் சகல ஜாதிகளின் பார்வையில் மேன்மைப்பட்டான்.

எசேக்கியாவின் நோய், பெருமை, செழிப்பு

²⁴அந்நாட்களில் எசேக்கியா வியாதிப்பட்டு மரணத்திற்கு ஏதுவாயிருந்தான்; அவன் எங்கள் பிதாவை நோக்கி ஜெபம்பண்ணினான், அவர் அவனுக்கு உத்தரவு அருளி, அவனுக்கு ஒரு அடையாளத்தைக் கொடுத்தார். ²⁵ஆனாலும் எசேக்கியா தனக்குச் செய்யப்பட்ட நன்மைக்குத்தக்கதாய் நடவாமல், அவன் இருதயம் மேட்டிமையாயிற்று; ஆகையால் அவன்மேலும் யூதாவின்மேலும் எருசலேமின்மேலும் கடுங்கோபம் உண்டாயிற்று. ²⁶எசேக்கியா தன் இருதயத்தின் மேட்டிமைக்காகத் தன்னைத் தாழ்த்தினான்; அவனும் எருசலேமின் குடிகளும் தங்களைத் தாழ்த்தினதால், எசேக்கியாவின் நாட்களில் எங்கள் பிதாவின் கடுங்கோபம் அவர்கள்மேல் வரவில்லை.

²⁷எசேக்கியாவுக்கு மகா ஐசுவரியமும் கனமும் இருந்தது. அவன் வெள்ளிக்கும் பொன்னுக்கும் இரத்தினங்களுக்கும் நறுமணத்திரவியங்களுக்கும் கேடகங்களுக்கும் மற்ற உச்சிதமான வஸ்துக்களுக்கும் பொக்கிஷ அறைகளைக் கட்டினான்; ²⁸தானியம், திராட்சரசம், எண்ணெய் ஆகியவற்றின் விளைவுக்குக் களஞ்சியங்களையும், சகலவித மிருகஜீவன்களுக்கு லாயங்களையும், மந்தைகளுக்குத் தொழுவங்களையும் உண்டாக்கினான். ²⁹அவன் தனக்குப் பட்டணங்களைக் கட்டி, ஏராளமான ஆடுமாடு மந்தைகளைச் சம்பாதித்தான்; ஏனெனில் எங்கள் பிதா அவனுக்கு மகா திரளான ஆஸ்தியைக் கொடுத்திருந்தார். ³⁰இந்த எசேக்கியா கீகோன் என்னும் ஆற்றின் மேலண்பக்கத்து நீரூற்றை அடைத்து, அந்தத் தண்ணீரைத் தாவீதின் நகரத்தின் மேற்குப்புறமாய்க் கீழ்நோக்கிப் பாயவிட்டான். எசேக்கியா தான் செய்த சகல கிரியைகளிலும் காரியசித்தி அடைந்தான். ³¹தேசத்தில் நடந்த அடையாளத்தைக்குறித்து விசாரிக்கும்படி பாபிலோனின் பிரபுக்கள் அவனிடத்திற்கு ஸ்தானாபதிகளை அனுப்பினபோது, அவனைச் சோதிக்கும்படிக்கும், அவன் இருதயத்திலுள்ள யாவையும் அறியும்படிக்கும், எங்கள் பிதா அவனைத் தனக்கே விட்டுவிட்டார்.

³²எசேக்கியாவின் மற்ற செய்திகளும் அவனுடைய உண்மையான செயல்களும், ஆமோஸின் குமாரனாகிய ஏசாயா தீர்க்கதரிசியின் தரிசனத்திலும், யூதா இஸ்ரவேல் ராஜாக்களின் புஸ்தகத்திலும் எழுதியிருக்கிறது. ³³எசேக்கியா தன் பிதாக்களோடே நித்திரையடைந்தான்; அவனைத் தாவீதின் புத்திரரின் கல்லறைகளுக்கு மேலான இடத்தில் அடக்கம்பண்ணினார்கள். அவன் மரணமடைந்தபோது, யூதா அனைத்தும் எருசலேமின் குடிகள் அனைவரும் அவனைக் கனம்பண்ணினார்கள். அவனுடைய குமாரனாகிய மனாசே அவன் ஸ்தானத்தில் ராஜாவானான்.