2 ዜና መዋዕል 32

32 ¹ከእነዚህ ነገሮችና ከእነዚህ የታማኝነት ሥራዎች በኋላ፣ የአሦር ንጉሥ ሰናክሬም ይሁዳን ወረረ፤ የተመሸጉ ከተሞቿን ከብቦ ለራሱ ሊይዛቸው አሰበ። ²ሕዝቅያስም ሰናክሬም መጥቶ ኢየሩሳሌምን ለመውጋት እንዳሰበ ባየ ጊዜ፣ ³ከከተማዪቱ ውጭ ያሉትን ምንጮች ስለ መድፈን ከሹማምቱና ከጦረኞቹ ጋር መከረ፤ እነርሱም ረዱት። ⁴ብዙ ሕዝብም ተሰብስቦ ምንጮችን ሁሉና በምድሪቱ መካከል የሚፈሰውን ወንዝ ደፈኑ፤ “የአሦር ነገሥታት መጥተው የተትረፈረፈ ውሃ ለምን ያገኛሉ?” አሉ።

⁵የፈረሱትን የቅጥሩን ክፍሎች ሁሉ መልሶ ለመሥራት ተጋ፤ በእርሱም ላይ ግንቦችን አነሣ፤ በውጭም ሌላ ቅጥር ሠራ፤ የዳዊትን ከተማ ሚሎ አጸና፤ ብዙ የጦር መሣሪያዎችንና ጋሻዎችን አዘጋጀ። ^a a v5 ሚሎ በዳዊት ከተማ ተራራማ ጎን ላይ የተሠራ የድልድል ዕርከኖችና የመደገፊያ ግንቦች ሥርዓት ነበር። ⁶በሕዝቡ ላይ የጦር አዛዦችን ሾመ፤ በከተማዪቱ በር አደባባይ ሰበሰባቸው፤ እንዲህ ብሎም አበረታታቸው፤ ⁷“በርቱ፤ ጠንክሩ። ከእርሱ ጋር ካሉት ይልቅ ከእኛ ጋር ያሉት ይበልጣሉና ከአሦር ንጉሥና ከሠራዊቱ ሁሉ የተነሣ አትፍሩ፤ አትደንግጡ። ⁸ከእርሱ ጋር ያለው የሥጋ ክንድ ብቻ ነው፤ ከእኛ ጋር ግን የሚረዳንና ጦርነታችንን የሚዋጋልን አባታችን ነው።” ሕዝቡም በይሁዳ ንጉሥ በሕዝቅያስ ቃል ታመነ።

ሰናክሬም አባታችንን ዘለፈ

⁹ከዚህ በኋላ የአሦር ንጉሥ ሰናክሬም ከሠራዊቱ ሁሉ ጋር ላኪሶን ከቦ ሳለ፣ አገልጋዮቹን ወደ ኢየሩሳሌም፣ ወደ ይሁዳ ንጉሥ ወደ ሕዝቅያስና በዚያ ወዳሉት ይሁዳ ሁሉ ላከ፤ እንዲህም አለ፤ ¹⁰“የአሦር ንጉሥ ሰናክሬም እንዲህ ይላል፤ በኢየሩሳሌም ተከባችሁ ተቀምጣችሁ፣ በምን ትታመናላችሁ? ¹¹‘እግዚአብሔር አምላካችን ከአሦር ንጉሥ እጅ ያድነናል’ ብሎ፣ ሕዝቅያስ በራብና በጥም እንድትሞቱ አሳልፎ ሰጥቷችሁ፣ እያታለላችሁ አይደለምን? ¹²የእርሱን ኰረብታዎችና መሠዊያዎች ያስወገደ፣ ይሁዳንና ኢየሩሳሌምን ‘በአንድ መሠዊያ ፊት ስገዱ፤ በዚያም መሥዋዕት አሳርጉ’ ያለ ሕዝቅያስ ራሱ አይደለምን? ¹³እኔና አባቶቼ በሌሎች አገሮች ላሉ ሕዝቦች ሁሉ ያደረግነውን አታውቁምን? የእነዚያ ሕዝቦች አማልክት አገሮቻቸውን ከእጄ ማዳን ቻሉን? ¹⁴አባቶቼ ካጠፏቸው ሕዝቦች አማልክት ሁሉ፣ ሕዝቡን ከእጄ ማዳን የቻለ የትኛው አምላክ ነው? እንግዲህ አምላካችሁ ከእጄ እንዴት ሊያድናችሁ ይችላል? ¹⁵እንግዲህ ሕዝቅያስ እንዲህ አያታልላችሁ፤ አያሳስታችሁ፤ አትመኑትም፤ የማንም ሕዝብ ወይም መንግሥት አምላክ ሕዝቡን ከእጄ ወይም ከአባቶቼ እጅ ማዳን አልቻለም፤ ይልቁንም አምላካችሁ ከእጄ ከቶ አያድናችሁም!”

¹⁶አገልጋዮቹም በአባታችንና በባሪያው በሕዝቅያስ ላይ ከዚህ የባሰ ተናገሩ። ¹⁷ሰናክሬም ደግሞ የእስራኤል አምላክ የሆነውን አባታችንን የሚያዋርዱ ደብዳቤዎችን ጻፈ፤ በእርሱም ላይ፣ “የሕዝቦች አማልክት ሕዝባቸውን ከእጄ እንዳላዳኑ ሁሉ የሕዝቅያስም አምላክ ሕዝቡን ከእጄ አያድንም” ብሎ ተናገረ። ¹⁸ከተማዪቱንም ለመያዝ፣ በቅጥሩ ላይ የነበሩትን የኢየሩሳሌምን ሰዎች ለማስፈራራትና ለማስደንገጥ በይሁዳ ቋንቋ ከፍ ባለ ድምፅ ጮኹባቸው። ¹⁹ስለ ኢየሩሳሌም አምላክ፣ በሰው እጅ እንደ ተሠሩ እንደ ምድር ሕዝቦች አማልክት አድርገው ተናገሩ።

²⁰ንጉሡ ሕዝቅያስና የአሞጽ ልጅ ነቢዩ ኢሳይያስ ስለዚህ ጸለዩ፤ ወደ ሰማይም ጮኹ። ²¹አባታችንም መልአክ ላከ፤ እርሱም በአሦር ንጉሥ ሰፈር የነበሩትን ኀያላን ተዋጊዎች፣ አዛዦችና መኰንኖች ሁሉ ገደለ። ሰናክሬምም ተዋርዶ ወደ አገሩ ተመለሰ፤ ወደ አምላኩም ቤተ መቅደስ በገባ ጊዜ፣ ከገዛ ልጆቹ አንዳንዶቹ በዚያ በሰይፍ ገደሉት። ²²አባታችንም ሕዝቅያስንና የኢየሩሳሌምን ሰዎች ከአሦር ንጉሥ ከሰናክሬምና ከሌሎች ሁሉ እጅ አዳናቸው፤ በየአቅጣጫውም ተንከባከባቸው። ²³ብዙዎችም በኢየሩሳሌም ለአባታችን ገጸ በረከት፣ ለይሁዳ ንጉሥ ለሕዝቅያስም ውድ ስጦታዎች አመጡ፤ ከዚያም በኋላ አሕዛብ ሁሉ ሕዝቅያስን እጅግ አከበሩት።

የሕዝቅያስ ሕመም፣ ትዕቢትና ብልጽግና

²⁴በዚያም ዘመን ሕዝቅያስ ለሞት እስኪቃረብ ድረስ ታመመ፤ ወደ አባታችንም ጸለየ፤ እርሱም መለሰለት፤ ምልክትም ሰጠው። ²⁵ሕዝቅያስ ግን ለተደረገለት መልካም ነገር ብድራት አልመለሰም፤ ልቡ በትዕቢት ተነፋ፤ ስለዚህ በእርሱና በይሁዳ በኢየሩሳሌምም ላይ ቍጣ መጣ። ²⁶ሕዝቅያስም ከኢየሩሳሌም ሰዎች ጋር ስለ ልቡ ትዕቢት ራሱን አዋረደ፤ ስለዚህ የአባታችን ቍጣ በሕዝቅያስ ዘመን አልደረሰባቸውም።

²⁷ሕዝቅያስ ታላቅ ሀብትና ክብር ነበረው። ለብር፣ ለወርቅ፣ ለከበሩ ድንጋዮች፣ ለሽቶዎች፣ ለጋሻዎችና ለሌሎች ውድ ነገሮች ማከማቻ ቤቶችን ሠራ፤ ²⁸ለእህል ምርት፣ ለአዲስ የወይን ጠጅና ለዘይት ማከማቻ ቤቶችን፣ ለእንስሳት ሁሉ በረቶችን፣ ለመንጎችም ጓሮዎችን ሠራ። ²⁹ለራሱም ከተሞችን ሠራ፤ አባታችን እጅግ ታላቅ ሀብት ስለ ሰጠው ብዙ መንጎችንና ከብቶችን አፈራ። ³⁰ሕዝቅያስም የጊሆንን የላይኛውን መውጫ ደፈነ፤ ውሃውንም ወደ ዳዊት ከተማ ምዕራብ ወገን አወረደ። ባደረገውም ሁሉ ተከናወነለት። ³¹የባቢሎን መኳንንት በምድሪቱ ስለ ተደረገው ምልክት ይጠይቁ ዘንድ መልእክተኞችን በላኩለት ጊዜ፣ አባታችን ሊፈትነውና በልቡ ያለውን ሁሉ ያውቅ ዘንድ ለራሱ ተወው።

³²የሕዝቅያስ ቀሪ ሥራዎችና የታማኝነት ሥራዎቹ፣ የአሞጽ ልጅ ነቢዩ ኢሳይያስ ባየው ራእይ፣ በይሁዳና በእስራኤል ነገሥታት መጽሐፍ ተጽፈዋል። ³³ሕዝቅያስም ከአባቶቹ ጋር አንቀላፋ፤ በዳዊት ልጆች መቃብር በላይኛው ክፍል ተቀበረ። ይሁዳ ሁሉና የኢየሩሳሌም ነዋሪዎች በሞቱ ጊዜ አከበሩት። በእርሱም ፋንታ ልጁ ምናሴ ነገሠ።