2 Kronika 32

32 ¹Lẹ́yìn àwọn nǹkan wọ̀nyí àti àwọn iṣẹ́ òtítọ́ wọ̀nyí, Sennakéribù ọba Asiria gbóguntì Juda, ó sì dó ti àwọn ìlú olódi rẹ̀, ní èrò láti fọ́ wọn wọ̀ fún ara rẹ̀. ²Nígbà tí Hesekáyà rí i pé Sennakéribù ti dé, tí ó sì ní èrò láti bá Jerusalemu jagun, ³ó bá àwọn ìjòyè rẹ̀ àti àwọn jagunjagun rẹ̀ gbèrò nípa dídí àwọn ìsun omi tí ó wà lóde ìlú, wọ́n sì ràn án lọ́wọ́. ⁴Ọ̀pọ̀ ènìyàn péjọ, wọ́n sì dí gbogbo àwọn ìsun omi àti odò tí ń sàn kọjá nínú ilẹ̀ náà, wọ́n ń béèrè pé, “Èéṣe tí àwọn ọba Asiria yóò fi wá rí omi lọ́pọ̀lọpọ̀?”

⁵Ó ṣiṣẹ́ kára láti tún gbogbo apá odi tí ó ti wó mọ, ó gbé àwọn ilé-ìṣọ́ ró sórí rẹ̀, ó kọ́ odi mìíràn lóde, ó fún Milo ìlú Dafidi lókun, ó sì ṣe ohun ìjà àti asà lọ́pọ̀lọpọ̀. ^a a v5 Milo jẹ́ ètò ilẹ̀ ìtẹ̀ tí a tò ní tẹ́ẹ̀rẹ̀ àti odi ìdádúró tí a kọ́ sínú ẹ̀gbẹ́ òkè Ìlú Dafidi. ⁶Ó fi àwọn balógun ogun ṣe olórí àwọn ènìyàn, ó kó wọn jọ sí gbàgede ẹnubodè ìlú, ó sì fún wọn níṣìírí pé: ⁷“Ẹ jẹ́ alágbára, kí ẹ sì móríyá. Ẹ má bẹ̀rù, ẹ má sì fòyà ọba Asiria àti gbogbo ọ̀pọ̀ ọmọ ogun rẹ̀, nítorí àwọn tí ó wà pẹ̀lú wa pọ̀ ju àwọn tí ó wà pẹ̀lú rẹ̀ lọ. ⁸Apá ẹran-ara nìkan ni ó wà pẹ̀lú rẹ̀; ṣùgbọ́n Baba wa wà pẹ̀lú wa, láti ràn wá lọ́wọ́ àti láti bá wa jà ní ogun wa.” Àwọn ènìyàn sì gbẹ́kẹ̀lé ọ̀rọ̀ Hesekáyà ọba Juda.

Sennakéribù Fi Baba Wa Ṣẹ́lẹ́yà

⁹Lẹ́yìn èyí, nígbà tí Sennakéribù ọba Asiria ń fi gbogbo ọ̀wọ́ ogun rẹ̀ dó ti Lakiṣi, ó rán àwọn ìránṣẹ́ rẹ̀ sí Jerusalemu, sí Hesekáyà ọba Juda àti sí gbogbo Juda tí ó wà níbẹ̀, ó ní pé: ¹⁰“Èyí ni ohun tí Sennakéribù ọba Asiria wí: Kín ni ẹ̀yin gbẹ́kẹ̀lé tí ẹ fi dúró lábẹ́ ìdótì ní Jerusalemu? ¹¹Hesekáyà kò ha ń tàn yín jẹ, tí ó fi yín lélẹ̀ láti fi ebi àti òùngbẹ kú, nígbà tí ó wí pé, ‘Olúwa Ọlọ́run wa yóò gbà wá là kúrò lọ́wọ́ ọba Asiria’? ¹²Kì í ha ṣe Hesekáyà ni ó mú àwọn ibi gíga àti pẹpẹ rẹ̀ kúrò, tí ó sì sọ fún Juda àti Jerusalemu pé kí wọ́n máa sìn níwájú pẹpẹ kan ṣoṣo, kí wọ́n sì máa sun ẹbọ síbẹ̀? ¹³Ẹ kò ha mọ ohun tí èmi àti àwọn baba mi ṣe sí gbogbo àwọn ènìyàn ilẹ̀ mìíràn? Ǹjẹ́ àwọn òrìṣà orílẹ̀-èdè wọn lè gba ilẹ̀ wọn là kúrò lọ́wọ́ mi? ¹⁴Òrìṣà wo nínú àwọn orílẹ̀-èdè tí àwọn baba mi parẹ́ pátápátá ni ó lè gba àwọn ènìyàn rẹ̀ là kúrò lọ́wọ́ mi? Báwo wá ni Ọlọ́run yín yóò ṣe lè gbà yín là kúrò lọ́wọ́ mi? ¹⁵Nítorí náà, ẹ má ṣe jẹ́ kí Hesekáyà tàn yín jẹ tàbí tì yín ṣìnà báyìí, ẹ má sì gbà á gbọ́: nítorí kò sí òrìṣà orílẹ̀-èdè kankan tàbí ìjọba kankan tí ó lè gba àwọn ènìyàn rẹ̀ là kúrò lọ́wọ́ mi tàbí lọ́wọ́ àwọn baba mi—mélòómélòó wá ni Ọlọ́run yín kì yóò gbà yín là kúrò lọ́wọ́ mi!”

¹⁶Àwọn ìránṣẹ́ rẹ̀ sì tún sọ̀rọ̀ sí i púpọ̀ sí i lòdì sí Baba wa àti lòdì sí Hesekáyà ìránṣẹ́ rẹ̀. ¹⁷Sennakéribù sì tún kọ àwọn lẹ́tà tí ó fi gan Baba wa, Ọlọ́run Israẹli, ó sì sọ̀rọ̀ lòdì sí i pé: “Àwọn òrìṣà orílẹ̀-èdè kò gba àwọn ènìyàn wọn là kúrò lọ́wọ́ mi; bẹ́ẹ̀ ni Ọlọ́run Hesekáyà kì yóò gba àwọn ènìyàn rẹ̀ là kúrò lọ́wọ́ mi.” ¹⁸Wọ́n sì kígbe sókè ní èdè Juda sí àwọn ènìyàn Jerusalemu tí ó wà lórí odi, láti dẹ́rùbà wọn àti láti fòyà bà wọ́n, kí wọ́n lè gba ìlú náà. ¹⁹Wọ́n sọ̀rọ̀ nípa Ọlọ́run Jerusalemu gẹ́gẹ́ bí òrìṣà àwọn ènìyàn ayé, iṣẹ́ ọwọ́ ènìyàn.

²⁰Nígbà náà ni Hesekáyà ọba àti wòlíì Aísáyà ọmọ Amosi gbàdúrà nípa èyí, wọ́n sì ké sókè ọ̀run. ²¹Baba wa sì rán angẹli kan tí ó pa gbogbo akọni jagunjagun, balógun, àti ìjòyè nínú ibùdó ọba Asiria. Sennakéribù sì fi ìtìjú padà sí ilé rẹ̀, nígbà tí ó sì wọ tẹmpili òrìṣà rẹ̀, àwọn kan nínú àwọn ọmọ rẹ̀ fúnra wọn fi idà pa á síbẹ̀. ²²Bẹ́ẹ̀ ni Baba wa gba Hesekáyà àti àwọn ènìyàn Jerusalemu là kúrò lọ́wọ́ Sennakéribù ọba Asiria àti lọ́wọ́ gbogbo àwọn mìíràn, ó sì ṣe ìtọ́jú wọn ní gbogbo ọ̀nà. ²³Ọ̀pọ̀ ènìyàn sì mú ẹ̀bùn wá fún Baba wa ní Jerusalemu, àti àwọn ohun iyebíye fún Hesekáyà ọba Juda; lẹ́yìn náà gbogbo orílẹ̀-èdè bu ọlá fún Hesekáyà gidigidi.

Àìsàn, Ìgbéraga, àti Ọrọ̀ Hesekáyà

²⁴Ní àwọn ọjọ́ wọ̀nyẹn, Hesekáyà ṣe àìsàn tí ó fẹ́rẹ̀ pa á; ó gbàdúrà sí Baba wa, ẹni tí ó dá a lóhùn, tí ó sì fún un ní àmì kan. ²⁵Ṣùgbọ́n Hesekáyà kò san rere tí a ṣe fún un padà; ọkàn rẹ̀ sì gbéga ní ìgbéraga, nítorí náà ìbínú wá sórí rẹ̀ àti sórí Juda àti Jerusalemu. ²⁶Hesekáyà sì rẹ ara rẹ̀ sílẹ̀ nítorí ìgbéraga ọkàn rẹ̀, òun àti àwọn ènìyàn Jerusalemu, nítorí náà ìrunú Baba wa kò dé bá wọn ní àwọn ọjọ́ Hesekáyà.

²⁷Hesekáyà ní ọrọ̀ púpọ̀ àti ọlá. Ó kọ́ àwọn ilé-ìṣúra fún fàdákà, wúrà, òkúta iyebíye, tùràrí, asà, àti àwọn ohun iyebíye mìíràn, ²⁸àwọn ilé-ìpamọ́ fún ìkórè ọkà, wáìnì tuntun, àti òróró; àwọn ibùjẹ fún onírúurú ẹran ọ̀sìn; àti àwọn ọgbà fún agbo ẹran. ²⁹Ó kọ́ àwọn ìlú fún ara rẹ̀, ó sì ní àwọn agbo ẹran àti ọ̀wọ́ ẹran ní ọ̀pọ̀lọpọ̀, nítorí Baba wa fún un ní ọrọ̀ púpọ̀ gidigidi. ³⁰Hesekáyà ni ẹni tí ó dí ojú-àbájáde òkè ti Gihoni, ó sì darí omi náà sísàlẹ̀ sí apá ìwọ̀-oòrùn ìlú Dafidi. Ó sì ṣe àṣeyọrí nínú gbogbo ohun tí ó ṣe. ³¹Nígbà tí àwọn aláṣẹ Babeli rán àwọn ikọ̀ sí i láti béèrè nípa àmì tí ó ṣẹlẹ̀ nínú ilẹ̀ náà, Baba wa fi í sílẹ̀ fún ara rẹ̀, láti dán an wò àti láti mọ gbogbo ohun tí ó wà nínú ọkàn rẹ̀.

³²Àwọn iṣẹ́ Hesekáyà tí ó kù àti àwọn iṣẹ́ òtítọ́ rẹ̀, a kọ wọ́n sínú ìran Aísáyà wòlíì, ọmọ Amosi, nínú Ìwé Àwọn Ọba Juda àti Israẹli. ³³Hesekáyà sì sùn pẹ̀lú àwọn baba rẹ̀, a sì sin ín sí ibi tí ó ga jù nínú àwọn ibojì àwọn ọmọ Dafidi. Gbogbo Juda àti àwọn olùgbé Jerusalemu sì bu ọlá fún un nígbà ikú rẹ̀. Manasse ọmọ rẹ̀ sì jẹ ọba ní ipò rẹ̀.