Ng'emei Senakerib ak Chopchigei Hezekiah
Ki nyo Senakerib laitoryatap Assyria ak lugeennyi, nooto kogeer Hezekiah kong'igap peek, koteech toweet, ak koleenji piik kele chaang' che mi kobooten acheek kosiir che mi kobooten ineendet. Chotisyetap Assyria ne po Kwandanyo kiwol eng' saaet ak angeet. Let konyolu koming'ingei kora Hezekiah agobo lasusennyi eng' tuguukyik ak oik.
32 1Eng' let tuguuchu ak yoisyechu che po imanda, ki nyo Senakerib laitoryatap Assyria kong'em Judah, ak koyiem nganasookyik che ng'ootaatiin, komach koputisie si ko po ineegei. 2Kingo keer Hezekiah kole kanyo Senakerib, komach kobargei ak Jerusalem, 3ki ng'alaal ak kiptainikyik ak murenikyik che po lugeet agobo koger kong'igap peek che mi oldo ne po nganaseet, ak ki kotoret icheek ineendet. 4Ki iyumgei piik che chaang' ak koger kong'igap peek tugul ak kererunooto ne rootune emet, ak kole, “Amu nee si kobwa laitorinigap Assyria konyoor peek che chaang'?”
5Ki boisyee komyee koteech kogeny komoswek tugul che ki kobutok irimeet, ak kong'eetu toweet eng' barak, ak koteech irimeet age oldo, ak kogimit Milo ne po nganaseetap Daudi, ak koyai kariigap lugeet che chaang' ak long'onik. a a v5 Milo ko ki keyumetap ng'ung'unyek ak irimosyek che ki kiteech eng' toloitap Nganaseetap Daudi. 6Ki inde pounigap lugeet eng' taitap piik, ak koyumi icheek eng' komostap kurgeetap nganaseet, ak kogimit icheek koleenji: 7“Ogimegitu ak onyiganitu. Amoiywei anan otoptoben laitoryatap Assyria ak tuiyennyi tugul, amu chaang' che mi kobooten acheek kosiir che mi kobooten ineendet. 8Mi kobooten ineendet eutap poorto kityo; ago mi kobooten acheek Kwandanyo, ne toretech ak koyaiywech lugosyekyok.” Ki igimitkei piik eng' ng'aleegap Hezekiah laitoryatap Judah.
Churachuri Senakerib Kwandanyo
9Eng' let niito, ye kingo ta koyiem Lakish kobooto lugeennyi tugul, koyookto Senakerib laitoryatap Assyria otwogikyik koba Jerusalem, kwo ole mi Hezekiah laitoryatap Judah ak Judah tugul che mi olooto, kole: 10“Mwaei Senakerib laitoryatap Assyria kole: Nee ne orubei okweek, otebee lugeet eng' Jerusalem? 11Maiberberok Hezekiah, koistowok si omee eng' rubeet ak melelda, ye le, ‘Isarwech Kamuktaindet ne Toroor Kamuktaindennyo eng' eutap laitoryatap Assyria’? 12Ma ineendet Hezekiah ne ki istoi olosyekyik che toroorotiin ak kapkorosusyekyik, ak koleenji Judah ak Jerusalem kole osaa eng' kapkorosuut agenge ak obeel tiseiywek olooto? 13Mongen ne ki ayai anee ak kwanisyekyuk eng' piik tugul che po emotinwek alak? Imuuchi kanamonigap pororyosyekwak kosar emotinwekwak eng' eunnyu? 14Nee kanamonigap pororyosyek ne ki kobeeti kwanisyekyuk ne ki imuuchi kosar piikyik eng' eunnyu? Nee anyun si imuuchi Kamuktaindeng'wong' kosarwok eng' eunnyu? 15Mat koiberberok anan koistowok oriit ne ya Hezekiah ko uu niito, ak ma yan okweek ineendet: ma mi kanamonik ne po pororyet age tugul anan laitornatet ne ki imuuchi kosar piikyik eng' eunnyu anan eng' eutap kwanisyekyuk—siirei nooto, amaimuuchi Kamuktaindeng'wong' kosarwok eng' eunnyu!”
16Ak ki ng'alaal otwogikyik kogeny che chaang' agobo Kwandanyo ak agobo otwogindennyi Hezekiah. 17Ki sir kogeny Senakerib paronok che churachuri Kwandanyo, Kamuktaindetap Israel, kong'alaalji ineendet kole: “Ma ki sar kanamonigap pororyosyek piikwak eng' eunnyu; ko uu nooto ma sar Kamuktaindetap Hezekiah piikyik eng' eunnyu.” 18Ki waach eng' kutit ne oo eng' ng'aleegap Judah kwo piigap Jerusalem che ki mi irimeet, si koimuok ak koiim icheek, si konam nganaseet. 19Ki ng'alaalji Kamuktaindetap Jerusalem ko uu kanamonigap piigap ng'wony, poisyetap eunegap pik.
20Ki saaei Laitoryat Hezekiah ak maotyot Isaiah weeriitap Amos agobo niito, koguur kwo kipsengwet. 21Ki yookto Kwandanyo angeet ne ki par murenigap lugeet tugul che kiimeen, ak pounik, ak kiptainik, eng' nganaseetap laitoryatap Assyria. Ki weekyingei Senakerib koonnyi eng' teweernateet, ak ye kingo chut hekaluutap kanamonennyi, ko ki bar ineendet alak eng' weeriikyik olooto eng' rotweet. 22Ki sar Kwandanyo Hezekiah ak piigap Jerusalem eng' eutap Senakerib laitoryatap Assyria ak eng' eunegap alak tugul, ak ki riip icheek komoswek tugul. 23Ki ib piik che chaang' konoik koba ole mi Kwandanyo eng' Jerusalem, ak konoraik kwo Hezekiah laitoryatap Judah; eng' let niito ki igonyit pororyosyek tugul Hezekiah miising'.
Myanetap Hezekiah, Menotetap Muguleldanyi ak Perurtanyi
24Eng' peetuusyechooto ki myan Hezekiah kot kong'etu kobek; ki saaei ole mi Kwandanyo, ne wolji ineendet, ak kogoochi ineendet ityoinoot. 25Ago ma ki repai Hezekiah myeeindo ne ki keyachi; ki meen muguleldanyi, si konyo angeet ineendet ak Judah ak Jerusalem. 26Ki iming'indogei Hezekiah agobo menoteetap muguleldanyi, ineendet ak piigap Jerusalem, si ma koit icheek nereegegap Kwandanyo eng' peetuusyegap Hezekiah.
27Ki tinyei Hezekiah mogornateet ne oo ak kong'itnateet. Ki teech kotiisyek ne po fedha, thahabu, koik che kergei, soogik, long'onik, ak tuguuk alak che kergei, 28kotiisyek che po akweetap pandek, divai ne leel, ak mwaita; kooriik che po tuuga che teerchiin tugul; piusyek che po keechiirek. 29Ki teekyigei nganasook ak koyumjigei keechiirek ak tuuga che chaang' miising', amu ki koochi Kwandanyo mogornateet ne oo miising'. 30Ki ger Hezekiah ole punu peek ne po barak ne po Gihon ak kondochi peek koba ng'wony komostap taatoot ne po nganaseetap Daudi. Ki tebi eng' ng'omnateet eng' tugul ne ki yai. 31Ye ki iyookto pounigap Babilon piik che kiyooktoi kwo ole mi ineendet kosaaei agobo ityoinoot ne ki po emet, ki pagaakta Kwandanyo ineendet ineegei, si koyom ineendet ak si konai tugul che mi muguleldanyi.
32Yoisyegap Hezekiah che kakeer ak yoisyekyik che po imanda, ko kisir eng' ng'ang'utyetap Isaiah maotyot, weeriitap Amos, eng' Bukuitap Laitorinigap Judah ak Israel. 33Ki ru Hezekiah ak kwanisyekyik, ak ki keeng' eng' kereeriisyek che po barak che po weeriigap Daudi. Ki igonyit ineendet Judah tugul ak piik che menyei Jerusalem ye kingo me. Ki laitoran weeriinnyi Manasseh eng' letanyi.