2 ዜና መዋዕል 31

31 ¹ይህ ሁሉ ባለቀ ጊዜ፣ በዚያ የነበሩት እስራኤላውያን ሁሉ ወደ ይሁዳ ከተሞች ወጥተው የማምለኪያ ዐምዶችን ሰባበሩ፤ የአሼራ ምሰሶዎችን ቈረጡ፤ በይሁዳ፣ በብንያም፣ በኤፍሬምና በምናሴ ሁሉ የነበሩትን የኰረብታ መስገጃዎችንና መሠዊያዎችን ፈጽመው እስኪያጠፉ ድረስ አፈረሱ። ከዚያም እስራኤላውያን ሁሉ እያንዳንዳቸው ወደ ርስታቸው፣ ወደ ከተሞቻቸው ተመለሱ።

²ሕዝቅያስ ካህናትንና ሌዋውያንን እያንዳንዳቸውን እንደ አገልግሎታቸው፣ ካህናቱንም ሌዋውያኑንም በየክፍላቸው መደበ፤ ይኸውም የሚቃጠለውን መሥዋዕትና የኅብረት መሥዋዕት ለማቅረብ፣ በአባታችን ሰፈሮች ደጆችም ለማገልገል፣ ምስጋና ለማቅረብና ለማወደስ ነበር።

³ንጉሡም ለሚቃጠለው መሥዋዕት ከራሱ ሀብት ሰጠ፤ ይኸውም የጥዋትና የማታ የሚቃጠል መሥዋዕት፣ እንዲሁም በአባታችን ሕግ እንደ ተጻፈ ለሰንበቶች፣ ለመባቻዎችና ለተወሰኑ በዓላት የሚቀርበው መሥዋዕት ነበር። ⁴በኢየሩሳሌምም ለሚኖሩት ሰዎች ራሳቸውን ለአባታችን ሕግ መስጠት እንዲችሉ የካህናቱንና የሌዋውያኑን ድርሻ እንዲሰጡ አዘዛቸው። ⁵ትእዛዙም እንደ ተሰራጨ፣ እስራኤላውያን የእህልን፣ የወይን ጠጅን፣ የዘይትን፣ የማርንና የዕርሻን ፍሬ ሁሉ በኵራት በብዛት ሰጡ፤ የሁሉንም ነገር ዐሥራት በብዛት አመጡ። ⁶በይሁዳ ከተሞችም የሚኖሩት እስራኤላውያንና ይሁዳውያን ደግሞ የከብትንና የበግን ዐሥራት፣ እንዲሁም ለአባታችን የተቀደሰውን ነገር ዐሥራት አምጥተው ክምር ክምር አድርገው ከመሩ።

⁷ክምሩንም መከመር የጀመሩት በሦስተኛው ወር ሲሆን፣ የጨረሱትም በሰባተኛው ወር ነበር። ^a a v7 ሦስተኛው ወር በግንቦት መጨረሻ–ሰኔ ላይ ይውላል፤ ሰባተኛው ወር ደግሞ በመስከረም–ጥቅምት ይውላል፤ ይህም ወደ አራት ወር የሚጠጋ የስጦታ ጊዜ ነው። ⁸ሕዝቅያስና ሹማምቱም መጥተው ክምሩን አዩ፤ አባታችንንና ሕዝቡን እስራኤልንም ባረኩ። ⁹ሕዝቅያስም ካህናቱንና ሌዋውያኑን ስለ ክምሩ ጠየቃቸው። ¹⁰ከሳዶቅ ቤት የሆነው ሊቀ ካህናቱ አዛርያስም እንዲህ ሲል መለሰለት፤ “ሰዎች መባውን ወደ አባታችን ቤት ማምጣት ከጀመሩበት ጊዜ ጀምሮ፣ በልተን ጠግበናል፤ የተረፈውም ብዙ ነው፤ ምክንያቱም አባታችን ሕዝቡን ባርኮአልና ይህ ታላቅ ትርፍ ተረፈ።”

¹¹ከዚያም ሕዝቅያስ በአባታችን ቤት ውስጥ መጋዘኖችን እንዲያዘጋጁ አዘዛቸው፤ እነርሱም አዘጋጁ። ¹²መባውንም፣ ዐሥራቱንና የተቀደሱትን ስጦታዎች በታማኝነት አስገቡ። ሌዋዊው ኮናንያስ አለቃቸው ነበር፤ ወንድሙ ሳሚም ሁለተኛው ነበር። ¹³ይሒኤል፣ አዛዝያስ፣ ናሃት፣ አሳሄል፣ ይሪሞት፣ ዮዛባድ፣ ኤሊኤል፣ ይስማክያስ፣ ማሃትና በናያስ በኮናንያስና በወንድሙ በሳሚ ሥር ተቈጣጣሪዎች ነበሩ፤ እነርሱም በንጉሥ ሕዝቅያስና የአባታችን ቤት የበላይ ሹም በሆነው በአዛርያስ የተሾሙ ነበሩ። ¹⁴ወደ ምሥራቅ በኩል የነበረው የሌዋዊው በረኛ የይምናህ ልጅ ቆሬ፣ ለአባታችን የሚቀርበውን የፈቃድ መባ ይቈጣጠር ነበር፤ የአባታችንንም መባና እጅግ የተቀደሱትን ስጦታዎች ያከፋፍል ነበር። ¹⁵ከእርሱም በታች ዔደን፣ ሚንያሚን፣ ኢያሱ፣ ሸማያስ፣ አማርያስና ሰካንያስ በካህናቱ ከተሞች በታማኝነት ያገለግሉ ነበር፤ ለታላቁም ለታናሹም ለባልንጀሮቻቸው ካህናት በየክፍላቸው ያከፋፍሉ ነበር፤ ¹⁶ከዚህም ሌላ በትውልድ ሐረግ ለተመዘገቡት፣ ዕድሜያቸው ከሦስት ዓመትና ከዚያ በላይ ለሆኑት ወንዶች ሁሉ ይሰጡ ነበር፤ እነዚህም የዕለት ተዕለት ተግባራቸውን ለመፈጸም ወደ አባታችን ቤት የሚገቡት ሁሉ ነበሩ፤ ይኸውም እንደ ሥራቸውና እንደ ክፍላቸው ለአገልግሎታቸው ነበር። ¹⁷ካህናቱም እንደ ነገዳቸው ተመዘገቡ፤ ሌዋውያኑም ዕድሜያቸው ከሃያ ዓመትና ከዚያ በላይ የሆኑት እንደ ተግባራቸውና እንደ ክፍላቸው ተመዘገቡ። ¹⁸ከሕፃናታቸው፣ ከሚስቶቻቸው፣ ከወንዶችና ከሴቶች ልጆቻቸው ሁሉ ጋራ ተመዘገቡ፤ ይኸውም መላው ማኅበር ነበር፤ ምክንያቱም ራሳቸውን በቅድስና በታማኝነት ለይተው ቀድሰው ነበር። ¹⁹በከተሞቻቸው ዙሪያ ባሉት የግጦሽ ሜዳዎች ለሚኖሩት ለአሮን ዘሮች ለሆኑት ካህናት፣ ለወንድ ካህናት ሁሉና በትውልድ ሐረግ ለተመዘገቡት ሌዋውያን ሁሉ ድርሻ እንዲሰጡ በየከተማይቱ ሁሉ ሰዎች በስም ተመደቡ።

²⁰ሕዝቅያስም በይሁዳ ሁሉ ይህን አደረገ። በአባታችንም ፊት መልካሙን፣ ቅኑንና ታማኙን አደረገ። ²¹በጀመረውም ሥራ ሁሉ—የአባታችንን ቤት በማገልገል፣ ሕግንና ትእዛዝን በመጠበቅ፣ አባታችንንም በመፈለግ—በሙሉ ልቡ ሠራ፤ ተከናወነለትም።