Israelna Meoma̱ Saikora Sākhaitā
Phanit peiuda mibingna lungshom kala kajujui apambing shaokhaitā khavai shokta. Chiwui thili tithe kachungkha rāda mayonhaowa, lanshimbing sākhui ngasaka, kala pāngmonbing eina Levinaobingna athumwui Avāwui ainli khalatta ngarān khavai, ming athishurda ngayarmi.
31 1Hi peiuda, chili khalei Israel saikorana Judahwui keinungbingli shokta, lungshomla shaokhaimihai, Asherimla shaokhaitāmiserhaida, kala Judah, Benjamin, Ephraim, kala Manasseh peichaoda kajujui apambing kala hanphutbing khuithuimihailaga sākazammiserhaowa. Chiwui thili Israel saikorana athumwui keinungbingli, mi kachiva̱ awui shimluili hanmingaroka.
2Hezekiahna pāngmonbing kala Levinaobingli athumwui ngayarkakhai athishurda, mi kachiva̱ awui otram athishurda, pāngmonbing kala Levinaobing ngarumda, rikkatā kachigat kala lungnem kachigatwui vang, ithumwui Avāwui rāmrahbingwui ngaveibingli otram ngatha̱, ningkashi mi, kala khayāshi mi khavai kapangsanga.
3Awungana ithumwui Avāwui ainli kapi kahai athishurda, ngathor kala ngazin rikkatā kachigat, kala sabbaththang, changwokthang, kala retkahai phanitbingwui rikkatā kachigatwui vang awui khalalei eina chigata. 4Ana Jerusalemli kapān mibingli pāngmonbing kala Levinaobingwui sharuk chigat khavai hānga, chithākha athumna ithumwui Avāwui ainli ningyāng chigatra. 5Kaso chi ngayaovai tharan, Israelnaobingna mavātla theishirai, drakhāra̱, thao, khuira̱, kala luiyamwui khamathei saikorawui matheikhare chigata, kala saikorawui tithe mavātla khuiunga. 6Judahwui keinungbingli kapān Israelnaobing kala Judahnaobingnala seila yaowui tithe, kala ithumwui Avāli tharchigat kahai otwui tithe khuiunglaga akhum akhum eina kazipkhuisera.
7Kachāng kakathumli athumna akhumbing kazip haokaphoka, kala kachāng kashineli kuphaowa. a a v7 Kachāng kakathum chi May kupkupka–June alungli tāra; Kachāng kashine chi September–October alungli tāra — chigatwui kachāng mati thangkhana. 8Hezekiah kala otva̱bingna rāda akhumbing yanglaga, ithumwui Avāli sochikatta awui mi Israelli somi. 9Hezekiahna pāngmonbing kala Levinaobingli akhumbingwui pongli ngahānna. 10Zadokwui shimkhurwui pāngmon khareia Azariahna ali ngahānda hānga, "Mibingna ithumwui Avāwui shimli kachigat khuirā haokaphok eina thuida, ithumna kashap eina zāda, kachungkha taisai; kaja ithumwui Avāna awui mili sokhamiwui vang hi kahaka katai chi haihaira."
11Chiwui thili Hezekiahna ithumwui Avāwui shimli zātshim ngarān khavai athumli kasoi, kala athumna ngarāna. 12Athumna ningtongda kachigat, tithe, kala tharchigat kahai lemmetbing khuiunga. Levinao Conaniah athumli kathāna sai; awui achinā Shimei kakhaneva̱na. 13Jehiel, Azaziah, Nahath, Asahel, Jerimoth, Jozabad, Eliel, Ismachiah, Mahathla Benaiah, Conaniah kala awui achinā Shime-iwui pamli, awunga Hezekiah kala ithumwui Avāwui shimwui khareia otva̱ Azariahna kapangsangda, yangkhame sai. 14Zingshoshongwui ngavei khamayo Levinao, Imnahwui naomayara Korena ithumwui Avāli lemmet kachigat singda, ithumwui Avāwui kachigat kala tharmathengmeikap kaji ot phaishokmi. 15Awui pamli, Eden, Miniamin, Jeshua, Shemaiah, Amariah, kala Shecaniahna pāngmonwui keinungbingli ningtongda otram ngatha̱ya, athumwui achinā pāngmonbingli ngayarkakhai athishurda ngayarmi, khareila kateola ngarumda, 16Hi hailaga, ithumwui Avāwui shimli thangkachida otram ngatha̱ khavai zangkahai, mithot lairikli chankahai zingkum kathum kākahai kala chiwui atungwui mayarnao saikorali, athumwui otpam kala ngayarkakhai athishurda otram ngatha̱mi vang michinga. 17Pāngmonbing chi avāva̱ ngarāwui shimkhur athishurda ming chankahai; kala zingkum maga̱ kākahai kala chiwui atungwui Levinaobing chi athumwui otpam kala ngayarkakhai athishurda ming chana. 18Athumwui naoshinao, preiva̱ ngarā, naomayara ngarā kala sha̱naobing saikorali ngasoda yarui ashangva̱ katonga ming chankahai; kaja athumna ningtongda kathar eina athum khalatta tharchigathaira. 19Keinung kuimareida seihomphungli khalei pāngmon Aaronwui naomayarabingwui vang, mayarnao pāngmon kachiva̱ kala mithot lairikli kapi kahai Levinaobing saikorali sharuk ngayar khavai, keinung khalei kachiva̱li aming milaga mi phāsanga.
20Hezekiahna Judah peichaoda chithāda sai. Kala khamathā, khamashung khangarong kala ningtongkasā chi ana ithumwui Avāwui mangāli sai. 21Ana ithumwui Avāwui shimli otram ngatha̱da, ain kala ningkhami mayonda, kala ithumwui Avāli phāda, awui ot kasā saikorali wuklung katonga eina sai, kala mataisanga.
