Hezekiahwui Kakao: Nathumwui Avāli Ngareiunglu
Pāngmonbing mangarānlakmana, chiwui vang kachāng akha thili makānkhami phanit mayon khavai, Hezekiahna Israel saikorali, kha̱ngkaphungla zangda, kaho. Awui paomebingli keinung kaikhali mana̱shiya, kaikhana nganaya. Kachungkhana matharlala zā, kala ana athumwui vang seihā sai — kala ithumwui Avāna shālaga athumli raimihaira.
30 1Hezekiahna Israel kala Judah saikorali pao chihovāhaowa, kala Jerusalemli khalei ithumwui Avāwui shimli rāda ithumwui Avā, Israelwui Vareli makānkhami phanit mayon khavai, Ephraim eina Manassehli chithi kapisangmiya. 2Awunga, awui wungnaobing, kala Jerusalemli khalei ashangva̱ saikorana kachāng kakhaneli makānkhami phanit mayon khavai khamayā mi kahaina, 3khikhalajila chitharan chi mayon ngasaklengmana, kaja pāngmon kateokhana khalatta tharchigata, kala mibingla Jerusalemli marākazipmana. 4Kaphaning hi awungala ashangva̱ saikorala mayāngaisera, 5chiwui vang eina athumna Israel saikorali, Beer-shebawui eina Dan vāshungda mibingna Jerusalemli rāda ithumwui Avā, Israelwui Vareli makānkhami phanit mayonra da pao chishāta; kaja athumna kapihai athishurda apam kachungkha eina katonga mayonlakmana.
6Phungmebingna awunga kala awui wungnaobingwui chithi tonglaga Israel kala Judah saikorali vāda, awungawui kakaso athishurda hithāda hānga, "Israelnaobing, ithumwui Avā, Abraham, Isaac, kala Israelwui Vareli ngareiunglu, chithākha Assyriawui awungabingwui pāng eina ringkashoka kala yāmshoka nathumwui shākkahaili ana latungra. 7Nathumwui navā ngarā kala nachinā ngarā thāda masaalu; athumna athumwui avāva̱ ngarāwui Vare, ithumwui Avāli malaikhangai malaihaowa, nathumna theikahai thāda ana athumli ramcho sāngasaka. 8Navā ngarā thāda mangakaishichingalu; ithumwui Avāli nathum khalatta chikhamlu, kala ana katang makhavai tharchigat kahai awui katharapamli rālu, kala nathumwui Avāli otram ngatha̱lu, chithākha awui malungvātshun kahai nathumwui eina vān ngasakra. 9Kaja nathumna ithumwui Avāli ngareiungakha, nathumwui nachinā ngarā kala nathumwui naomayarabingna athumli tukkakhuiabingwui eina lukhamashan samphangra kala hi ngaleili ngareiungra. Kaja nathumwui Avā lumashankatha̱a kala lumashantheilaka; nathumna ali ngareiungakha, ana awui mai nathumwui eina mangathumpaimara."
10Phungmebingna Ephraim kala Manasseh peichaoda Zebulunli, keinung eina keinungli vāhaowa, kha mibingna athumli mana̱shida mana̱kashila mana̱shiya. 11Chithālala, Asher, Manasseh, kala Zebulunwui eina mi kaikhana khalatta hamsanglaga Jerusalemli rai. 12Ithumwui Avāwui pāngla Judahtungli leida, ithumwui Avāwui tui athishurda awunga kala wungnaobingna kaso kahai chi sākhavai athumli ning akha mihaowa.
13Mi kachungkhathāna kachāng kakhaneli Khawok-makazang Khamuiwui phanit mayon khavai Jerusalemli rākazipta. 14Athumna ot sāphokta Jerusalemli khalei hanphutbing sākhaira, kala nganamkaphā hanphut saikora khuishokta, Kidron kongli hormiserhaowa. 15Athumna kachāng kakhanewui tharāda khamatethang makānkhami yao taithata. Pāngmonbing kala Levinaobing khayakhaoda, chieina khalatta tharchigatlaga ithumwui Avāwui shimli rikkatā kachigat khuirai. 16Varewui mi Moseswui ain athishurda, athumna khangachā athishurda athumwui otpamli nganinga; Levinaobingna khuikahai ashee chi pāngmonbingna ikrorra. 17Ashangva̱ ngachaili mi kachungkhana khalatta matharchigatmana, chiwui vang eina athumli ithumwui Avāli tharchigat khavai, Levinaobingna makathar mi saikorawui vang makānkhami yao taithat khavaiwui kashina sai. 18Ephraim, Manasseh, Issachar kala Zebulunwui eina mibing kachungkhana athum khalatta matharkhuila, kapi kahai athishurda maningla makānkhami phanit chi shai. Kha Hezekiahna athumwui vang seihā sāda hānga, "Kaphā ithumwui Avāna mi saikorali pheomiranu, 19ithumwui Avā, awui avā ngarāwui Vareli phākhui khavai awui wuklung zakahai mi khipākhali, kathara shimwui shiyan athishurda matharlala, pheomiranu."
20Kala ithumwui Avāna Hezekiahli shālaga mibingli raimihaira. 21Jerusalemli khalei Israelnaobingna khawok makazang khamui phanit chi khamathānna shinithang mayona, kala thang-thang Levinaobing eina pāngmonbingna akhon kashok panglāk akap-akai eina ithumwui Avāli masot chigata. 22Hezekiahna ithumwui Avāli otram ngatha̱ them-kathema Levinaobing saikorali chānpao eina hānga. Athumna ningyatchigat chigatta athumwui avā ngarāwui Vare, ithumwui Avāli ningkashi mida shinithang athumwui phanit sharuk shai.
23Chiwui thili yarui kazip saikorana phanit chi shinithang kakhane mayonda mayāngaroka, kala athumna shinithang kakhane khamathānna mayona. 24Judahwui awunga Hezekiahna kazip chili mukvā thingkha kala yao thing shini mihaowa, kala wungnaobingna mukvā thingkha kala yao thing tharā mi, kala pāngmon kachungkhana athum khalatta tharkhuiya. 25Judahwui kazip saikora, pāngmonbing, Levinaobing, Israelwui eina rākahai kazip saikora, kala Israel ngaleiwui eina rākahai yur kateibing, kala Judahli kapambing saikora ringphālakhaowa. 26Jerusalemli haklak kahai khamathān samphanga, kaja Israelwui awunga Davidwui nao Solomonwui thot eina thuilaga hikathā ot apam chili mashokkahairangsai. 27Pāngmonbing eina Levinaobingna mibingli somi khavai ngakarthuida, kala athumwui khon shāhaowa; athumwui seihā kasā kazingramli khalei awui katharapamli vāshunga.
