Ọkpụkpọ Hezekaya: Lọghachikwute Nna Gị

Hezekaya kpọrọ Izrel niile, tinyere ndị ugwu, ka ha bịa Mmemme Ngabiga e mere mgbe otu ọnwa gafere, nʼihi na ndị nchụaja dị njikere ezughị. A kwara ndị ozi ya emo nʼobodo ụfọdụ, gee ha ntị nʼobodo ndị ọzọ. Ọtụtụ riri nri ahụ na-edoghị onwe ha ọcha, o wee kpeere ha ekpere — Nna anyị nụrụ, gwọọkwa ha.

Isi 30.

Hezekaya zigaara Izrel na Juda niile ozi, deekwa akwụkwọ ozi nye Ifrem na Manase, ka ha bịa nʼụlọ Nna anyị dị na Jerusalem imere Nna anyị, bụ Chineke Izrel, Mmemme Ngabịga. Eze, na ndị ozi ya, na ọgbakọ niile nọ na Jerusalem ekpebiela imere Mmemme Ngabịga nʼọnwa nke abụọ, nʼihi na ha enweghị ike imere ya nʼoge ahụ, ebe ọ bụ na ndị nchụaja doro onwe ha nsọ erughị ọnụ, ndị mmadụ ezukọtaghịkwa na Jerusalem. Atụmatụ a dịkwara eze na ọgbakọ niile mma, ya mere ha zipụrụ mkpọsa gburugburu Izrel niile, site na Bịasheba ruo Dan, ka ndị mmadụ bịa na Jerusalem imere Nna anyị, bụ Chineke Izrel, Mmemme Ngabịga; nʼihi na ha emekọtabeghị ya nʼọtụtụ dị ukwuu dịka e dere ya.

Ndị na-ebu ozi jere nʼIzrel na Juda niile, na-ebu akwụkwọ ozi sitere nʼaka eze na ndị ozi ya, dịka eze nyere nʼiwu, sị: “Ụmụ Izrel, lọghachikwutenụ Nna anyị, bụ Chineke Ebraham, na Aịzik, na Izrel, ka o wee lọghachikwute ndị fọdụrụ nʼime unu, bụ ndị lanarịrị, gbanarịkwa ike ndị eze Asịrịa. Unu adịla ka nna unu na ụmụnne unu, bụ ndị na-ekwesịghị ntụkwasị obi nye Nna anyị, bụ Chineke nna nna ha, nke mere o mere ka ha ghọọ ihe tọgbọrọ nʼefu, dịka unu na-ahụ. Unu enwela isiike ka nna unu; werenụ onwe unu nye Nna anyị, bịakwute ebe nsọ ya, nke o doro nsọ ruo mgbe ebighị ebi, jeere Nna unu ozi, ka oke iwe ya wee site nʼebe unu nọ pụọ. Nʼihi na ọ bụrụ na unu alọghachikwute Nna anyị, ụmụnne unu na ụmụ unu ga-enweta ọmịiko site nʼaka ndị dọtara ha nʼagha, ha ga-alọghachikwutekwa nʼala a. Nʼihi na Nna unu bụ onye amara na onye ọmịiko; ọ gaghị esite nʼebe unu nọ chepụ ihu ya ma ọ bụrụ na unu alọghachikwute ya.”

Ndị na-ebu ozi ahụ si nʼotu obodo gaa nʼobodo ọzọ nʼIfrem na Manase ruo Zebulọn, ma ndị mmadụ chịrị ha ọchị, kwaakwa ha emo. Ọ bụ ezie na ọ dị otú a, ụfọdụ ndị si Asha, na Manase, na Zebulọn wedara onwe ha ala, bịa na Jerusalem. Aka Nna anyị dịkwara na Juda, na-enye ha otu obi ime ihe eze na ndị ozi nyere nʼiwu site nʼokwu Nna anyị.

Oke ọgbakọ dị ukwuu zukọrọ na Jerusalem imere Mmemme Achịcha Na-ekoghị Eko nʼọnwa nke abụọ. Ha malitere ọrụ, wepụ ebe ịchụ aja dị na Jerusalem, wepụkwa ebe ịchụ aja ihe nsure ọkụ na-esi ísì ụtọ niile, tụba ha na Ndagwurugwu Kidrọn. Ha gburu nwa atụrụ Ngabịga nʼụbọchị nke iri na anọ nʼọnwa nke abụọ. Ihere mere ndị nchụaja na ndị Livaị, ya mere ha doro onwe ha nsọ, buta aja nsure ọkụ nʼụlọ Nna anyị. Ha guzoro nʼọnọdụ ha dịka omenala si dị, dịka Iwu Mosis, onye nke Chineke, si chọọ; ndị nchụaja na-efesa ọbara nke ndị Livaị nyefere ha. Ọtụtụ ndị nọ nʼọgbakọ ahụ edoghị onwe ha nsọ, ya mere ọ bụ ndị Livaị bụ ndị na-ahụ maka igbu ụmụ atụrụ Ngabịga maka onye ọbụla na-adịghị ọcha, iji doo ha nsọ nye Nna anyị. Ọtụtụ ndị mmadụ, ọtụtụ nʼime ha si Ifrem, na Manase, na Isaka, na Zebulọn, emeghị onwe ha ọcha, ma ha riri Ngabịga, ọ bụ ezie na ọ bụghị dịka e si dee ya. Ma Hezekaya kpeere ha ekpere, sị: “Ka Nna anyị dị mma gbaghara onye ọbụla, bụ onye tọgidere obi ya ịchọ Nna anyị, bụ Chineke nna nna ya, ọ bụ ezie na ọ dịghị ọcha dịka iwu ebe nsọ ahụ si dị.”

Nna anyị gekwara Hezekaya ntị, gwọọkwa ndị mmadụ. Ụmụ Izrel nọ na Jerusalem mere Mmemme Achịcha Na-ekoghị Eko ụbọchị asaa nʼoke ọṅụ, kwa ụbọchị ndị Livaị na ndị nchụaja ji ngwá egwú na-ada oke ụda na-eto Nna anyị. Hezekaya gwara ndị Livaị niile, bụ ndị maara nke ọma ijere Nna anyị ozi, okwu na-agba ha ume. Ụbọchị asaa ha riri òkè mmemme ha, na-achụ aja udo, na-ekelekwa Nna anyị, bụ Chineke nna nna ha, ekele.

Mgbe ahụ, ọgbakọ niile kwetara imere mmemme ahụ ụbọchị asaa ọzọ, ha mekwara ya ụbọchị asaa ọzọ nʼọṅụ. Hezekaya, bụ eze Juda, nyere ọgbakọ ahụ otu puku oke ehi na puku atụrụ asaa, ndị ozi nyekwara otu puku oke ehi na puku atụrụ iri, ọtụtụ ndị nchụaja dokwara onwe ha nsọ. Ọgbakọ Juda niile ṅụrịrị ọṅụ, ha na ndị nchụaja, na ndị Livaị, na ọgbakọ niile si Izrel bịa, na ndị ọbịa si nʼala Izrel, na ndị bi na Juda. Oke ọṅụ jupụtara na Jerusalem, nʼihi na ọ dịghị ihe dị otú a mere nʼebe ahụ kemgbe ụbọchị Solomọn nwa Devid, bụ eze Izrel. Ndị nchụaja na ndị Livaị biliri ịgọzi ndị mmadụ, a nụkwara olu ha; ekpere ha rutere ebe obibi ya dị nsọ nke dị nʼeluigwe.