Kiran Hezekiya: Ku Koma ga Ubanku

Hezekiya ya gayyaci dukan Isra'ila, har da arewa, zuwa Idin Ƙetarewa da aka yi a makare da wata ɗaya domin firistocin da suka shirya ba su isa ba. A waɗansu garuruwa aka yi wa manzanninsa ba'a, a waɗansu kuwa aka saurare su. Da yawa suka ci ba tare da sun tsarkaka ba, sai ya yi musu addu'a, Ubanmu kuwa ya ji, ya warkar da su.

Babi na 30.

Hezekiya ya aika da saƙo zuwa ga dukan Isra'ila da Yahuda, ya kuma rubuta wasiƙu zuwa ga Efraimu da Manasse, su zo gidan Ubanmu a Urushalima domin su yi Idin Ƙetarewa ga Ubanmu, Allah na Isra'ila. Sarki, da shugabanninsa, da dukan taro a Urushalima sun yanke shawara su yi Idin Ƙetarewa a wata na biyu, gama ba su iya yin shi a lokacin ba, domin firistoci kaɗan ne kawai suka tsarkake kansu, mutane kuma ba su taru a Urushalima ba. Shawarar ta yi daidai a gaban sarki da dukan taro, saboda haka suka yi shela a dukan Isra'ila, daga Beyersheba har zuwa Dan, cewa mutane su zo Urushalima domin su yi Idin Ƙetarewa ga Ubanmu, Allah na Isra'ila; gama ba su taɓa yin shi tare da yawansu kamar yadda aka rubuta ba.

Manzanni suka zazzaga dukan Isra'ila da Yahuda da wasiƙu daga sarki da shugabanninsa, bisa ga umarnin sarki, cewa, “Ya ku 'ya'yan Isra'ila, ku koma ga Ubanmu, Allah na Ibrahim, da Ishaku, da Isra'ila, domin shi ma yă komo ga raguwarku da suka tsira suka kuɓuta daga hannun sarakunan Assuriya. Kada ku zama kamar iyayenku da 'yan'uwanku, waɗanda suka yi rashin aminci ga Ubanmu, Allah na iyayensu, saboda haka ya mai da su kufai, kamar yadda kuke gani. Kada ku taurare kai kamar iyayenku; ku ba da kanku ga Ubanmu, ku kuma zo wurinsa mai tsarki, wanda ya tsarkake har abada, ku bauta wa Ubanku, domin tsananin fushinsa yă juya daga gare ku. Gama in kun koma ga Ubanmu, 'yan'uwanku da 'ya'yanku za su sami jinƙai daga waɗanda suka kame su, su kuma komo wannan ƙasa. Gama Ubanku mai alheri ne, mai jinƙai kuma; ba zai juya fuskarsa daga gare ku ba in kun koma gare shi.”

Manzannin suka tasar daga gari zuwa gari ta cikin Efraimu da Manasse har zuwa Zebulun, amma mutane suka yi musu dariya suka kuma yi musu ba'a. Duk da haka, waɗansu daga Asher, da Manasse, da Zebulun suka ƙasƙantar da kansu suka zo Urushalima. Hannun Ubanmu kuma yana kan Yahuda, yana ba su zuciya ɗaya domin su aikata abin da sarki da shugabanni suka umarta bisa ga maganar Ubanmu.

Babban taro mai yawa ya taru a Urushalima domin su yi Idin Gurasa Marar Yisti a wata na biyu. Suka shiga aiki suka kawar da bagadan da suke a Urushalima, suka kuma kawar da dukan bagadan turare, suka jefar da su cikin Kwarin Kidron. Suka yanka ɗan ragon Idin Ƙetarewa a rana ta goma sha huɗu ga wata na biyu. Firistoci da Lawiyawa suka ji kunya, saboda haka suka tsarkake kansu suka kawo hadayun ƙonawa zuwa gidan Ubanmu. Suka tsaya a mazauninsu bisa ga al'ada, kamar yadda Dokar Musa mutumin Allah ta tanada; firistoci suka yayyafa jinin da Lawiyawa suka miƙa musu. Da yawa cikin taron ba su tsarkake kansu ba, saboda haka Lawiyawa suka ɗauki nauyin yanka 'yan ragunan Idin Ƙetarewa saboda kowane marar tsarki, domin su tsarkake su ga Ubanmu. Yawancin mutane, musamman da yawa daga Efraimu, da Manasse, da Issaka, da Zebulun, ba su tsarkake kansu ba, duk da haka suka ci Idin Ƙetarewa, ko da yake ba kamar yadda aka rubuta ba. Amma Hezekiya ya yi musu addu'a ya ce, “Bari Ubanmu nagari yă gafarta wa kowa, wanda ya kafa zuciyarsa domin ya nemi Ubanmu, Allah na iyayensa, ko da yake ba shi da tsarki bisa ga ƙa'idodin wurin mai tsarki.”

Ubanmu kuwa ya saurari Hezekiya ya warkar da mutane. Isra'ilawa da suke a Urushalima suka yi Idin Gurasa Marar Yisti kwana bakwai da farin ciki mai yawa, Lawiyawa da firistoci kuma kowace rana suna yabon Ubanmu da kayan kiɗa masu ƙara mai ƙarfi gare shi. Hezekiya ya yi magana ta ƙarfafawa ga dukan Lawiyawa masu gwaninta a bautar Ubanmu. Har kwana bakwai suka ci rabonsu na biki, suna miƙa hadayun salama suna kuma yin godiya ga Ubanmu, Allah na iyayensu.

Sa'an nan dukan taro suka yarda su ci gaba da bikin wasu kwana bakwai, suka kuma yi shi ƙarin kwana bakwai da farin ciki. Hezekiya sarkin Yahuda ya ba taron bijimai dubu ɗaya da tumaki dubu bakwai, shugabanni kuma suka ba da bijimai dubu ɗaya da tumaki dubu goma, firistoci da yawa kuma suka tsarkake kansu. Dukan taron Yahuda suka yi farin ciki, tare da firistoci, da Lawiyawa, da dukan taron da suka zo daga Isra'ila, da baƙin da suka zo daga ƙasar Isra'ila da kuma waɗanda suke zama a Yahuda. Farin ciki mai yawa ya cika Urushalima, gama ba a taɓa ganin irin wannan a can ba tun kwanakin Sulemanu ɗan Dawuda, sarkin Isra'ila. Firistoci da Lawiyawa suka tashi domin su albarkaci mutane, aka kuwa ji muryarsu; addu'arsu ta kai wurin zamansa mai tsarki a Sama.