2 ዜና መዋዕል 30

30 ¹ሕዝቅያስ ወደ እስራኤልና ይሁዳ ሁሉ መልእክት ላከ፤ የእስራኤል አምላክ ለሆነው ለአባታችን ፋሲካን ያከብሩ ዘንድ በኢየሩሳሌም ወዳለው ወደ አባታችን ቤት እንዲመጡ ለኤፍሬምና ለምናሴ ደብዳቤ ጻፈ። ²ንጉሡ፣ መኳንንቱና በኢየሩሳሌም የነበረው ጉባኤ ሁሉ ፋሲካን በሁለተኛው ወር ለማክበር ወስነው ነበር፤ ³ራሳቸውን የቀደሱ ካህናት ጥቂቶች ስለነበሩ ሕዝቡም በኢየሩሳሌም ስላልተሰበሰበ በዚያን ጊዜ ሊያከብሩት አልቻሉም ነበርና። ⁴ይህ ዕቅድ ለንጉሡና ለጉባኤው ሁሉ መልካም መስሎ ታየ፤ ⁵ስለዚህ ሕዝቡ የእስራኤል አምላክ ለሆነው ለአባታችን ፋሲካን ለማክበር ወደ ኢየሩሳሌም እንዲመጣ ከቤርሳቤህ እስከ ዳን ድረስ በእስራኤል ሁሉ አዋጅ አስነገሩ፤ እንደ ተጻፈው በብዙ ቍጥር ተሰባስበው አላከበሩትም ነበርና።

⁶በንጉሡ ትእዛዝ መሠረት መልእክተኞቹ ከንጉሡና ከመኳንንቱ ደብዳቤ ይዘው በእስራኤልና በይሁዳ ሁሉ አለፉ፤ እንዲህም አሉ፦ “የእስራኤል ልጆች ሆይ፣ የአብርሃም፣ የይስሐቅና የእስራኤል አምላክ ወደ ሆነው ወደ አባታችን ተመለሱ፤ ከአሦር ነገሥታት እጅ አምልጣችሁ ተርፋችሁ ወደ ቀራችሁ ወደ እናንተ እርሱ ይመለስ ዘንድ። ⁷እንደ አባቶቻችሁና እንደ ወንድሞቻችሁ አትሁኑ፤ እነርሱ የአባቶቻቸው አምላክ ለሆነው ለአባታችን ታማኝ አልነበሩም፤ ስለዚህ እናንተ እንደምታዩት ለጥፋት አደረጋቸው። ⁸እንደ አባቶቻችሁ አንገተ ደንዳና አትሁኑ፤ ራሳችሁን ለአባታችን ስጡ፤ ለዘላለም ወደ ቀደሰው ወደ መቅደሱ ኑ፤ ብርቱ ቍጣው ከእናንተ ይመለስ ዘንድ አባታችሁን አገልግሉ። ⁹ወደ አባታችን ብትመለሱ ወንድሞቻችሁና ልጆቻችሁ ከማረኳቸው ርኅራኄን አግኝተው ወደዚህች ምድር ይመለሳሉና። አባታችሁ ባለ ጸጋና መሓሪ ነውና፤ ወደ እርሱ ብትመለሱ ፊቱን ከእናንተ አይመልስም።”

¹⁰መልእክተኞቹ በኤፍሬምና በምናሴ አልፈው እስከ ዛብሎን ድረስ ከከተማ ወደ ከተማ ሄዱ፤ ሕዝቡ ግን ሳቀባቸው አፌዘባቸውም። ¹¹ይሁን እንጂ ከአሴር፣ ከምናሴና ከዛብሎን አንዳንዶች ራሳቸውን አዋርደው ወደ ኢየሩሳሌም መጡ። ¹²ደግሞም የንጉሡንና የመኳንንቱን ትእዛዝ በአባታችን ቃል ያደርጉ ዘንድ አንድ ልብ እየሰጣቸው የአባታችን እጅ በይሁዳ ላይ ነበረ።

¹³በሁለተኛው ወር የእርሾ የሌለውን እንጀራ በዓል ለማክበር እጅግ ብዙ ጉባኤ በኢየሩሳሌም ተሰበሰበ። ¹⁴ተነሥተውም በኢየሩሳሌም ያሉትን መሠዊያዎች አስወገዱ፤ የዕጣንን መሠዊያዎች ሁሉ አንሥተው ወደ ቄድሮን ሸለቆ ጣሏቸው። ¹⁵በሁለተኛው ወር በዐሥራ አራተኛው ቀን የፋሲካውን በግ አረዱ። ካህናቱና ሌዋውያኑ ዐፈሩ፤ ስለዚህ ራሳቸውን ቀደሱ፤ የሚቃጠል መሥዋዕትም ወደ አባታችን ቤት አመጡ። ¹⁶የእግዚአብሔር ሰው የሙሴ ሕግ እንደሚያዝዘው እንደ ልማዳቸው በየቦታቸው ቆሙ፤ ካህናቱም ሌዋውያኑ የሰጧቸውን ደም ረጩ። ¹⁷በጉባኤው ውስጥ ብዙዎች ራሳቸውን አልቀደሱም ነበር፤ ስለዚህ ርኩስ ለሆነ ሁሉ የፋሲካውን በጎች አርደው ለአባታችን ለመቀደስ ሌዋውያኑ ኀላፊዎች ነበሩ። ¹⁸ከሕዝቡ ብዙ ቍጥር ያለው፣ ከኤፍሬም፣ ከምናሴ፣ ከይሳኮርና ከዛብሎን ብዙዎች ራሳቸውን አላነጹም ነበር፤ ነገር ግን እንደ ተጻፈው ባይሆንም ፋሲካን በሉ። ሕዝቅያስ ግን ስለ እነርሱ ጸለየ፤ “ቸሩ አባታችን ሁሉን ይቅር ይበል፤ ¹⁹በመቅደሱ ሥርዐት መሠረት ባይነጻም እንኳ የአባቶቹ አምላክ የሆነውን አባታችንን ለመፈለግ ልቡን ያዘጋጀ ሁሉ።”

²⁰አባታችንም ሕዝቅያስን ሰማ፤ ሕዝቡንም ፈወሰ። ²¹በኢየሩሳሌም የነበሩ እስራኤላውያን የእርሾ የሌለውን እንጀራ በዓል በታላቅ ደስታ ሰባት ቀን አከበሩ፤ ሌዋውያኑና ካህናቱም ለአባታችን በሚያስተጋባ ታላቅ የዜማ መሣሪያ ዕለት በዕለት አመሰገኑ። ²²ሕዝቅያስም አባታችንን በማገልገል ጥበበኞች ለሆኑ ሌዋውያን ሁሉ የሚያበረታታ ቃል ተናገራቸው። ሰባት ቀንም የበዓሉን ድርሻ እየበሉ የደኅንነት መሥዋዕት እያቀረቡ፣ የአባቶቻቸው አምላክ ለሆነው ለአባታችን ምስጋና አቀረቡ።

²³ከዚያም ጉባኤው ሁሉ ሌላ ሰባት ቀን በዓሉን ለማክበር ተስማማ፤ በደስታም ሌላ ሰባት ቀን አከበሩ። ²⁴የይሁዳ ንጉሥ ሕዝቅያስ ለጉባኤው 1,000 ኰርማዎችንና 7,000 በጎች ሰጠ፤ መኳንንቱም 1,000 ኰርማዎችንና 10,000 በጎች ሰጡ፤ ብዙ ካህናትም ራሳቸውን ቀደሱ። ²⁵የይሁዳ ጉባኤ ሁሉ ከካህናቱ፣ ከሌዋውያኑ፣ ከእስራኤል ከመጣው ጉባኤ ሁሉ፣ ከእስራኤል ምድር ከመጡ መጻተኞችና በይሁዳ ከሚኖሩት ጋራ ደስ አላቸው። ²⁶ታላቅ ደስታ ኢየሩሳሌምን ሞላት፤ የእስራኤል ንጉሥ የዳዊት ልጅ ሰሎሞን ከኖረበት ዘመን ጀምሮ እንደዚህ ያለ ነገር በዚያ ሆኖ አያውቅም ነበርና። ²⁷ካህናቱና ሌዋውያኑ ሕዝቡን ሊባርኩ ተነሡ፤ ድምፃቸውም ተሰማ፤ ጸሎታቸውም በሰማይ ወዳለው ቅዱስ ማደሪያው ደረሰ።