2 ዜና መዋዕል 29

29 ¹ሕዝቅያስ በሃያ አምስት ዓመቱ ነገሠ፤ በኢየሩሳሌምም ሃያ ዘጠኝ ዓመት ነገሠ። እናቱ የዘካርያስ ልጅ አብያ ትባል ነበር። ²አባቱ ዳዊት እንዳደረገው ሁሉ፣ በአባታችን ዐይን ፊት መልካሙን አደረገ። ³በነገሠ በመጀመሪያው ዓመት በመጀመሪያው ወር የአባታችንን ቤት በሮች ከፈተ፤ ጠገናቸውም። ⁴ካህናትንና ሌዋውያንን አስገባ፤ በምሥራቅም በኩል ባለው አደባባይ ሰበሰባቸው። ⁵እንዲህም አላቸው፤ “ሌዋውያን ሆይ፣ ስሙኝ! አሁን ራሳችሁን ቀድሱ፤ የአባቶቻችሁ አምላክ የሆነውን የአባታችንን ቤት ቀድሱ፤ ከቅዱሱ ስፍራም ርኩሰቱን አስወግዱ። ⁶አባቶቻችን ታማኝ አልነበሩም፤ በአባታችን ዐይን ፊት ክፉውን አደረጉ፤ ተዉት፤ ፊታቸውንም ከአባታችን ማደሪያ መለሱ፤ ጀርባቸውንም ሰጡ። ⁷ደግሞም የመመላለሻውን አዳራሽ በሮች ዘጉ፤ መብራቶቹንም አጠፉ፤ በመቅደሱም ውስጥ ለእስራኤል አምላክ ለአባታችን ዕጣን አላጠኑም፤ የሚቃጠል መሥዋዕትም አላቀረቡም። ⁸ስለዚህ የአባታችን ቍጣ በይሁዳና በኢየሩሳሌም ላይ ወረደ፤ በገዛ ዐይናችሁ እንደምታዩት፣ የድንጋጤ፣ የፍርሃትና የመሳለቂያ ነገር አደረጋቸው። ⁹አባቶቻችን በሰይፍ ወድቀዋልና፤ ወንዶችና ሴቶች ልጆቻችን፣ ሚስቶቻችንም ስለዚህ ተማርከዋል። ¹⁰አሁንም የመዓቱ ጽናት ከእኛ እንዲመለስ፣ ከእስራኤል አምላክ ከአባታችን ጋራ ኪዳን ለመግባት አስቤአለሁ። ¹¹ልጆቼ ሆይ፣ አሁን ቸል አትበሉ፤ አባታችን በፊቱ ልትቆሙ፣ ልታገለግሉት፣ አገልጋዮቹም ልትሆኑ ዕጣንም ልታጥኑ መርጦአችኋልና።”

¹²ሌዋውያኑም ተነሡ፤ ከቀዓታውያን የአማሳይ ልጅ ማሃት፣ የአዛርያም ልጅ ኢዮኤል፤ ከመረራውያን የዓብዲ ልጅ ቂስ፣ የይሃልኤልም ልጅ አዛርያ፤ ከጌድሶናውያን የዚማ ልጅ ኢዮሐ፣ የኢዮሐም ልጅ ዔድን፤ ¹³ከኤሊሳፋን ልጆች ሽምሪና ይዕኤል፤ ከአሳፍ ልጆች ዘካርያስና መጣንያ፤ ¹⁴ከሔማን ልጆች ይሒኤልና ሽሚ፤ ከይዱቱን ልጆችም ሸማያና ዑዝኤል። ¹⁵ወንድሞቻቸውን ሰበሰቡ፤ ራሳቸውንም ቀደሱ፤ ንጉሡም በአባታችን ቃል እንዳዘዘ፣ የአባታችንን ቤት ለማንጻት ገቡ። ¹⁶ካህናቱም ሊያነጹት ወደ አባታችን ቤት ውስጠኛ ክፍል ገቡ፤ በአባታችንም መቅደስ ያገኙትን ርኩሰት ሁሉ ወደ አደባባዩ አወጡት፤ ሌዋውያኑም ወደ ቄድሮን ወንዝ ወሰዱት። ¹⁷በመጀመሪያው ወር በመጀመሪያው ቀን መቀደስ ጀመሩ፤ በወሩም በስምንተኛው ቀን የአባታችን መመላለሻ አዳራሽ ደረሱ፤ የአባታችንንም ቤት ስምንት ቀን ቀደሱ፤ በመጀመሪያው ወር በዐሥራ ስድስተኛው ቀንም ፈጸሙ። ¹⁸ከዚያም ወደ ንጉሥ ሕዝቅያስ ገብተው እንዲህ አሉ፤ “የአባታችንን ቤት በሙሉ አነጻን፤ የሚቃጠለውን መሥዋዕት መሠዊያ ከዕቃዎቹ ሁሉ ጋራ፣ የገጸ ኅብስቱንም ጠረጴዛ ከዕቃዎቹ ሁሉ ጋራ አነጻን። ^a a v18 የገጸ ኅብስት፤ በእግዚአብሔር ፊት እንደ ዘውታሪ ቍርባን ሆኖ በቅዱሱ ስፍራ ባለ ልዩ ጠረጴዛ ላይ የሚቀመጥ ዐሥራ ሁለት እንጀራ ነው። ¹⁹ንጉሥ አካዝ በነገሠበትና ታማኝ ባልሆነበት ዘመን የጣላቸውን ዕቃዎች ሁሉ አዘጋጅተን ቀድሰናል፤ እነሆ፣ በአባታችን መሠዊያ ፊት ቆመዋል።”

አምልኮ ወደ አብ ቤት ተመለሰ

²⁰ንጉሥ ሕዝቅያስም ማልዶ ተነሣ፤ የከተማዪቱንም መኳንንት ሰበሰበ፤ ወደ አባታችን ቤትም ወጣ። ²¹ለመንግሥቱ፣ ለመቅደሱና ለይሁዳ የኀጢአት መሥዋዕት እንዲሆኑ ሰባት ወይፈኖች፣ ሰባት አውራ በጎች፣ ሰባት ጠቦቶች፣ ሰባት አውራ ፍየሎች አመጡ፤ የአሮን ልጆች የሆኑትንም ካህናት በአባታችን መሠዊያ ላይ እንዲያቀርቡአቸው አዘዛቸው። ²²ወይፈኖቹንም አረዱ፤ ካህናቱም ደሙን ወስደው በመሠዊያው ላይ ረጩት፤ አውራ በጎቹንም አረዱ፤ ደሙንም በመሠዊያው ላይ ረጩት፤ ጠቦቶቹንም አረዱ፤ ደሙንም በመሠዊያው ላይ ረጩት። ²³የኀጢአት መሥዋዕት የሆኑትን ፍየሎች በንጉሡና በጉባኤው ፊት አቀረቡ፤ እጆቻቸውንም በእነርሱ ላይ ጫኑ። ²⁴ካህናቱም አረዱአቸው፤ ለእስራኤልም ሁሉ ማስተስረያ እንዲሆን ደማቸውን በመሠዊያው ላይ የኀጢአት መሥዋዕት አድርገው አቀረቡ፤ ንጉሡ የሚቃጠለውን መሥዋዕትና የኀጢአትን መሥዋዕት ለእስራኤል ሁሉ እንዲሆን አዝዞ ነበርና።

²⁵ዳዊት፣ የንጉሡ ባለ ራእይ ጋድና ነቢዩ ናታን እንዳዘዙ፣ ሌዋውያኑን ከጸናጽል፣ ከበገናና ከመሰንቆ ጋራ በአባታችን ቤት አቆማቸው፤ ትእዛዙ ከአባታችን በነቢያቱ በኩል መጥቶ ነበርና። ²⁶ሌዋውያኑም በዳዊት የሙዚቃ መሣሪያዎች፣ ካህናቱም በመለከቶች ቆሙ። ²⁷ሕዝቅያስም የሚቃጠለውን መሥዋዕት በመሠዊያው ላይ እንዲቀርብ አዘዘ፤ መሥዋዕቱም በጀመረ ጊዜ፣ ከመለከቶችና ከእስራኤል ንጉሥ ከዳዊት የሙዚቃ መሣሪያዎች ጋራ የአባታችን መዝሙር ደግሞ ተጀመረ። ²⁸የሚቃጠለው መሥዋዕት እስኪፈጸም ድረስ፣ ጉባኤው ሁሉ ሰገደ፤ ዘማሪዎቹም ዘመሩ፤ መለከት ነፊዎቹም ነፉ።

²⁹መሥዋዕቱም ባለቀ ጊዜ፣ ንጉሡና ከእርሱ ጋራ የነበሩ ሁሉ ተደፍተው ሰገዱ። ³⁰ንጉሥ ሕዝቅያስና መኳንንቱም ሌዋውያኑ በዳዊትና በባለ ራእዩ በአሳፍ ቃል አባታችንን እንዲያመሰግኑ አደረጉ፤ በደስታም ዘመሩ፤ ዝቅ ብለውም ሰገዱ፤ አመለኩም።

³¹ከዚያም ሕዝቅያስ እንዲህ አለ፤ “አሁን ራሳችሁን ለአባታችን ቀድሳችኋል፤ ቅረቡ፤ መሥዋዕትና የምስጋና ቍርባን ወደ አባታችን ቤት አምጡ።” ጉባኤውም መሥዋዕትና የምስጋና ቍርባን አመጣ፤ ልባቸው ፈቃደኛ የሆኑ ሁሉም የሚቃጠል መሥዋዕት አመጡ። ³²ጉባኤው ያመጣው ሰባ ወይፈኖች፣ መቶ አውራ በጎች፣ ሁለት መቶ ጠቦቶች ነበሩ፤ እነዚህ ሁሉ ለአባታችን የሚቃጠል መሥዋዕት ነበሩ። ³³የተቀደሱትም ቍርባኖች ስድስት መቶ ወይፈኖችና ሦስት ሺህ በጎች ነበሩ። ³⁴ካህናቱ የሚቃጠለውን መሥዋዕት ሁሉ ለማለጥ ጥቂቶች ነበሩ፤ ስለዚህ የሌዋውያን ወንድሞቻቸው ሥራው እስኪፈጸምና ካህናቱም ራሳቸውን እስኪቀድሱ ድረስ ረዷቸው፤ ሌዋውያኑ ራሳቸውን በመቀደስ ከካህናቱ ይልቅ በልባቸው ቅን ነበሩና። ³⁵ከብዙዎቹ ከሚቃጠሉ መሥዋዕቶች ሌላ፣ ከደኅንነት መሥዋዕቶች የተገኘ ስብና ለእነርሱም የሚቀርብ የመጠጥ ቍርባን ነበረ፤ እንዲሁም የአባታችን ቤት አገልግሎት ዳግመኛ ተመለሰ። ³⁶ነገሩ በድንገት ስለ ሆነ፣ ሕዝቅያስና ሕዝቡ ሁሉ አባታችን ላዘጋጀላቸው ነገር ደስ አላቸው።