2 நாளாகமம் 29

29 ¹எசேக்கியா இருபத்தைந்து வயதில் ராஜாவானான்; எருசலேமில் இருபத்தொன்பது வருடம் அரசாண்டான். அவனுடைய தாய் செகரியாவின் மகளாகிய அபியாள். ²அவன் தன் தகப்பனாகிய தாவீது செய்ததுபோல, எங்கள் பிதாவின் பார்வையில் செம்மையானதைச் செய்தான். ³அவன் அரசாட்சியின் முதலாம் வருடம் முதலாம் மாதத்தில், எங்கள் பிதாவின் ஆலயத்தின் கதவுகளைத் திறந்து, அவைகளைப் பழுதுபார்த்தான். ⁴அவன் ஆசாரியர்களையும் லேவியர்களையும் அழைத்துவந்து, கிழக்கு வெளியில் அவர்களைக் கூட்டினான். ⁵அவர்களை நோக்கி: “லேவியரே, எனக்குச் செவிகொடுங்கள்! இப்பொழுது உங்களைப் பரிசுத்தம்பண்ணி, உங்கள் பிதாக்களின் தேவனாகிய எங்கள் பிதாவின் ஆலயத்தையும் பரிசுத்தம்பண்ணி, பரிசுத்த ஸ்தலத்திலிருந்து அசுத்தத்தை நீக்கிப்போடுங்கள். ⁶நம்முடைய முன்னோர்கள் உண்மையற்றவர்களாயிருந்து, எங்கள் பிதாவின் பார்வையில் பொல்லாப்பைச் செய்தார்கள்; அவரை விட்டுவிட்டு, எங்கள் பிதாவின் வாசஸ்தலத்தைவிட்டு தங்கள் முகங்களைத் திருப்பி, தங்கள் முதுகைக் காட்டினார்கள். ⁷அவர்கள் மண்டபத்தின் கதவுகளையும் அடைத்து, விளக்குகளை அணைத்து, இஸ்ரவேலின் தேவனாகிய எங்கள் பிதாவுக்குப் பரிசுத்த ஸ்தலத்தில் தூபங்காட்டாமலும் சர்வாங்க தகனபலிகளைச் செலுத்தாமலும் போனார்கள். ⁸ஆகையால் எங்கள் பிதாவின் கோபம் யூதாவின்மேலும் எருசலேமின்மேலும் இறங்கி, நீங்கள் உங்கள் கண்களால் காண்கிறபடி, அவர்களைத் திகிலுக்கும், பயங்கரத்துக்கும், இகழ்ச்சிக்கும் உரியவர்களாக்கிற்று. ⁹நம்முடைய பிதாக்கள் பட்டயத்தால் விழுந்தார்கள்; இதற்காக நம்முடைய குமாரரும் குமாரத்திகளும் மனைவிகளும் சிறைப்பட்டிருக்கிறார்கள். ¹⁰இப்பொழுது இஸ்ரவேலின் தேவனாகிய எங்கள் பிதாவோடே உடன்படிக்கைபண்ண என் மனதில் இருக்கிறது; அப்பொழுது அவருடைய கடுங்கோபம் நம்மைவிட்டுத் திரும்பும். ¹¹என் மக்களே, இப்பொழுது அசதியாயிராதேயுங்கள்; தமக்கு முன்பாக நின்று, தமக்கு ஊழியஞ்செய்து, தமக்குப் பணிவிடைக்காரராயிருந்து, தூபங்காட்டும்படி எங்கள் பிதா உங்களைத் தெரிந்துகொண்டார்.”

¹²லேவியர் எழும்பி நின்றார்கள்: கோகாத்தியரில் அமாசாயின் குமாரன் மாகாத்தும், அசரியாவின் குமாரன் யோவேலும்; மெராரியரில் அப்தியின் குமாரன் கீசும், எகலெலேலின் குமாரன் அசரியாவும்; கெர்சோனியரில் சிம்மாவின் குமாரன் யோவாகும், யோவாகின் குமாரன் ஏதேனும்; ¹³எலிஸ்பானின் குமாரரில் சிம்ரியும் எயெலும்; ஆசாபின் குமாரரில் செகரியாவும் மத்தனியாவும்; ¹⁴ஏமானின் குமாரரில் எகியேலும் சீமேயியும்; எதுத்தூனின் குமாரரில் செமாயாவும் உசியேலும் இருந்தார்கள். ¹⁵அவர்கள் தங்கள் சகோதரரைக் கூட்டி, தங்களைப் பரிசுத்தம்பண்ணி, எங்கள் பிதாவின் வார்த்தைகளின்படி ராஜா கட்டளையிட்டபடியே எங்கள் பிதாவின் ஆலயத்தைச் சுத்திகரிக்கப் போனார்கள். ¹⁶ஆசாரியர்கள் எங்கள் பிதாவின் ஆலயத்தின் உட்புறத்தைச் சுத்திகரிக்க உள்ளே பிரவேசித்து, எங்கள் பிதாவின் ஆலயத்தில் கண்ட எல்லா அசுத்தத்தையும் முற்றத்திற்குக் கொண்டுவந்தார்கள்; லேவியர் அதை எடுத்து கீதரோன் ஆற்றுக்குக் கொண்டுபோனார்கள். ¹⁷முதலாம் மாதம் முதலாம் தேதியிலே அவர்கள் பரிசுத்தம்பண்ணத் தொடங்கி, அந்த மாதத்தின் எட்டாம் தேதியிலே எங்கள் பிதாவின் மண்டபமட்டும் வந்தார்கள். எட்டு நாட்கள் எங்கள் பிதாவின் ஆலயத்தைப் பரிசுத்தம்பண்ணி, முதலாம் மாதம் பதினாறாம் தேதியிலே முடித்தார்கள். ¹⁸பின்பு அவர்கள் எசேக்கியா ராஜாவினிடத்தில் வந்து: “எங்கள் பிதாவின் ஆலயம் முழுவதையும், அதின் சகல பணிமுட்டுகளோடிருந்த சர்வாங்க தகனபலிபீடத்தையும், அதின் சகல பணிமுட்டுகளோடிருந்த சமுகத்தப்ப மேஜையையும் நாங்கள் சுத்திகரித்தோம். ^a a v18 சமுகத்தப்பம்: தேவனுக்கு முன்பாக நித்திய காணிக்கையாக, பரிசுத்த ஸ்தலத்தில் ஒரு விசேஷ மேஜையின்மேல் வைக்கப்பட்டிருந்த பன்னிரண்டு அப்பங்கள். ¹⁹ஆகாஸ் ராஜா தன் அரசாட்சியிலே உண்மையற்றுப்போய் எறிந்துவிட்ட சகல பணிமுட்டுகளையும் நாங்கள் ஆயத்தப்படுத்திப் பரிசுத்தம்பண்ணினோம்; இதோ, அவைகள் எங்கள் பிதாவின் பலிபீடத்திற்கு முன்பாக இருக்கிறது” என்றார்கள்.

பிதாவின் ஆலயத்திற்கு ஆராதனை திரும்புகிறது

²⁰எசேக்கியா ராஜா அதிகாலமே எழுந்து, நகரத்தின் பிரபுக்களைக் கூட்டி, எங்கள் பிதாவின் ஆலயத்திற்குப் போனான். ²¹ராஜ்யத்துக்காகவும், பரிசுத்த ஸ்தலத்துக்காகவும், யூதாவுக்காகவும் பாவநிவாரணபலியாக ஏழு காளைகளையும், ஏழு ஆட்டுக்கடாக்களையும், ஏழு ஆட்டுக்குட்டிகளையும், ஏழு வெள்ளாட்டுக்கடாக்களையும் கொண்டுவந்தார்கள்; அவைகளை எங்கள் பிதாவின் பலிபீடத்தின்மேல் செலுத்தும்படி ஆரோனின் குமாரராகிய ஆசாரியர்களுக்கு அவன் கட்டளையிட்டான். ²²அப்படியே காளைகளை அடித்தார்கள்; ஆசாரியர்கள் இரத்தத்தை வாங்கிப் பலிபீடத்தின்மேல் தெளித்தார்கள்; ஆட்டுக்கடாக்களையும் அடித்து இரத்தத்தைப் பலிபீடத்தின்மேல் தெளித்து, பின்பு ஆட்டுக்குட்டிகளையும் அடித்து இரத்தத்தைப் பலிபீடத்தின்மேல் தெளித்தார்கள். ²³பின்பு பாவநிவாரணபலிக்கான வெள்ளாட்டுக்கடாக்களை ராஜாவுக்கும் சபைக்கும் முன்பாகக் கொண்டுவந்தார்கள்; அவர்கள் அவைகளின்மேல் தங்கள் கைகளை வைத்தார்கள். ²⁴ஆசாரியர்கள் அவைகளை அடித்து, இஸ்ரவேலனைவருக்காகவும் பாவநிவிர்த்தி செய்யும்படி அவைகளின் இரத்தத்தைப் பலிபீடத்தின்மேல் பாவநிவாரணபலியாகச் செலுத்தினார்கள்; ஏனெனில் இஸ்ரவேலனைவருக்காகவும் சர்வாங்க தகனபலியையும் பாவநிவாரணபலியையும் செலுத்தும்படி ராஜா கட்டளையிட்டிருந்தான்.

²⁵தாவீதும், ராஜாவின் ஞானதிருஷ்டிக்காரனாகிய காத்தும், தீர்க்கதரிசியாகிய நாத்தானும் கட்டளையிட்டபடியே, அவன் லேவியரைக் கைத்தாளங்களோடும் தம்புருகளோடும் சுரமண்டலங்களோடும் எங்கள் பிதாவின் ஆலயத்தில் நிறுத்தினான்; ஏனெனில் அந்தக் கட்டளை எங்கள் பிதாவினிடத்திலிருந்து அவருடைய தீர்க்கதரிசிகள் மூலமாய் வந்தது. ²⁶லேவியர் தாவீதின் கீதவாத்தியங்களோடும், ஆசாரியர்கள் பூரிகைகளோடும் நின்றார்கள். ²⁷எசேக்கியா பலிபீடத்தின்மேல் சர்வாங்க தகனபலியைச் செலுத்தும்படி கட்டளையிட்டான்; அது ஆரம்பமானபோது, பூரிகைகளோடும் இஸ்ரவேலின் ராஜாவாகிய தாவீதின் கீதவாத்தியங்களோடும் எங்கள் பிதாவின் கீதமும் ஆரம்பமாயிற்று. ²⁸சர்வாங்க தகனபலி முடியுமளவும், சபையனைத்தும் பணிந்துகொண்டது, பாடகர் பாடினார்கள், பூரியூதுகிறவர்கள் பூரிகை ஊதினார்கள்.

²⁹பலிசெலுத்தி முடிந்தபோது, ராஜாவும் அவனோடிருந்த யாவரும் பணிந்து ஆராதனை செய்தார்கள். ³⁰எசேக்கியா ராஜாவும் பிரபுக்களும், தாவீதின் வார்த்தைகளினாலும் ஞானதிருஷ்டிக்காரனாகிய ஆசாபின் வார்த்தைகளினாலும் எங்கள் பிதாவைத் துதிக்கும்படி லேவியருக்குச் சொன்னார்கள். அவர்கள் மகிழ்ச்சியோடே துதித்து, தலைகுனிந்து ஆராதனை செய்தார்கள்.

³¹அப்பொழுது எசேக்கியா: “நீங்கள் இப்பொழுது எங்கள் பிதாவுக்கு உங்களைப் பிரதிஷ்டைபண்ணினீர்கள்; அணுகி வந்து, எங்கள் பிதாவின் ஆலயத்திற்குப் பலிகளையும் ஸ்தோத்திரபலிகளையும் கொண்டுவாருங்கள்” என்றான். அப்படியே சபையார் பலிகளையும் ஸ்தோத்திரபலிகளையும் கொண்டுவந்தார்கள்; உற்சாக மனதுள்ளவர்கள் யாவரும் சர்வாங்க தகனபலிகளைக் கொண்டுவந்தார்கள். ³²சபையார் கொண்டுவந்த சர்வாங்க தகனபலிகளின் தொகை: எழுபது காளைகளும், நூறு ஆட்டுக்கடாக்களும், இருநூறு ஆட்டுக்குட்டிகளும்; இவையெல்லாம் எங்கள் பிதாவுக்குச் சர்வாங்க தகனபலியாயிருந்தது. ³³பரிசுத்தம்பண்ணப்பட்ட காணிக்கைகள் அறுநூறு காளைகளும் மூவாயிரம் ஆடுகளுமாயிருந்தன. ³⁴ஆசாரியர்கள் கொஞ்சம்பேராயிருந்தபடியால், எல்லாச் சர்வாங்க தகனபலிகளின் தோலையும் உரிக்க அவர்களால் கூடாமற்போயிற்று; ஆகையால் அந்த வேலை முடியுமளவும், மற்ற ஆசாரியர்கள் தங்களைப் பரிசுத்தம்பண்ணிக்கொள்ளுமளவும், அவர்களுடைய சகோதரராகிய லேவியர் அவர்களுக்கு உதவிசெய்தார்கள்; தங்களைப் பரிசுத்தம்பண்ணிக்கொள்ள ஆசாரியரைப்பார்க்கிலும் லேவியர் மனநேர்மையுள்ளவர்களாயிருந்தார்கள். ³⁵திரளான சர்வாங்க தகனபலிகளையல்லாமல், சமாதானபலிகளின் கொழுப்பும், சர்வாங்க தகனபலிகளுக்கான பானபலிகளும் இருந்தன. இப்படியே எங்கள் பிதாவின் ஆலயத்தின் ஆராதனை திரும்பவும் ஸ்தாபிக்கப்பட்டது. ³⁶எங்கள் பிதா ஜனங்களுக்கு ஆயத்தம்பண்ணினதைக்குறித்து எசேக்கியாவும் ஜனங்களனைவரும் சந்தோஷப்பட்டார்கள்; ஏனெனில் அந்தக் காரியம் சடிதியாய் நடந்தது.