2 Thotrinchān 29

29 ¹Hezekiahna mungkaphok tharan a zingkum maga̱da phangā kāshunghairasai, kala ana Jerusalemli zingkum maga̱da chiko munga. Ava̱va̱ chi Zechariahwui naongalāva̱ Abijahna. ²Awui shāvā Davidna sākahai tākam eina ana ithumwui Avāwui mangāli khamashung khangarong ot sai. ³Ana mungkhare kum kachāng khareli ithumwui Avāwui shimwui khāmongbing shomida chiphoi. ⁴Ana pāngmonbing eina Levinaobingli thānvāda, zingshoshongwui kayangli kazipkhui. ⁵Ana athumli hānga, "O Levinaobing, nganālu! Ara nathum khalattali tharchigatlu, kala ithumwui Avāwui shim, nathumwui avā ngarāwui Vare, tharchigatlu, kala katharapamwui eina makathar chi khuithuihaolu. ⁶Ithumwui avā ngarā shitkasang makhaleiva̱ ngasāda, ithumwui Avāwui mangāli makaphā sai; athumna ali horhaowa, ithumwui Avāwui pamkhavaiwui eina amai ngareiungda akhanuk ngareithuihaowa. ⁷Athumna shimreiwui khāmongbing shungnamhaira, thaomeibing chui, kala katharapamli ithumwui Avā, Israelwui Vareli nganamkaphā mariktāmana, rikkatā kachigatla machigatmana. ⁸Chieina ithumwui Avāwui malungkhavāt Judah eina Jerusalemwuitungli leihaowa, kala nathumna namik eina theikahai thada, athumli khangachee, khangachā, kala mana̱shi khavai sāmihaowa. ⁹Kaja ithumwui avā ngarā raighai eina thihaowa; ithumwui mayarnao, naongalāva̱ngarā, kala preiva̱ngarā hiwui vang eina tukthui kahaina. ¹⁰Ara ining eina ithumwui Avā, Israelwui Vareli tuingashit akha sākida lei, chieina awui malungvātshun kahai ithumwui eina thuihaora. ¹¹Inaongarā, ara nathum ning masuitālu; kaja ithumwui Avāna nathumli awui mangāli nganingshing khavai, ali otram ngatha̱mi khavai, awui raobing ngasā khavai, kala nganamkaphā riktā khavai kapangkhui."

¹²Chieina Levinaobing nganinga: Kohathwui naomayarabingwui eina, Amasaiwui naomayara Mahath eina Azariahwui naomayara Joel; Merariwui naomayarabingwui eina, Abdiwui naomayara Kish kala Jehallelelwui naomayara Azariah; Gershonwui naomayarabingwui eina, Zimmahwui naomayara Joah eina Joahwui naomayara Eden; ¹³Elizaphanwui naomayarabingwui eina, Shimri eina Je-iel; Asaphwui naomayarabingwui eina, Zechariah eina Mattaniah; ¹⁴Hemanwui naomayarabingwui eina, Jehiel eina Shime-i; kala Jeduthunwui naomayarabingwui eina, Shemaiah eina Uzziel. ¹⁵Athumna achinā ngarāli kazipkhuida khalattali tharngasakta awungana ithumwui Avāwui tui eina kasokahai athishurda ithumwui Avāwui shim tharngasak khavai vai. ¹⁶Pāngmonbingna tharngasak khavai ithumwui Avāwui shimwui alungshong azangda, ithumwui Avāwui khorumshimli phākahai makathar saikora chi yāngkhupli khuishokhaowa. Levinaobingna chi Kidron kongrā khuivāhaowa. ¹⁷Athumna kachāng khare kharethang tharchigat kaphokta; kachāng chiwui kachishatathang ithumwui Avāwui shimreili marāshung. Athumna ithumwui Avāwui shim thang chishat tharchigatta, kachāng khare tharāda katharukathang sākuphaowa. ¹⁸Chieina athumna awunga Hezekiahli khavāda hānga, "Ithumna ithumwui Avāwui shim saikora sursāhaira; rikkatā kachigat hanphut kala chiwui khorkhongbing saikora, kala Ngasokhamiwui khamuiwui table kala chiwui khorkhongbing saikorala sursāhaira. ^a a v18 Ngasokhamiwui khamui: kathara pamli table kateiwui tungli thākahai khamui tharāda khani, Varewui mangāli katang kachigat thada. ¹⁹Awunga Ahazna malaikhangai munglakha zatta horhaikahai khorkhongbing saikora ithumna ngarānda tharchigathaira, kala chi ithumwui Avāwui hanphutwui mangāli nganinga."

Avāwui Shimli Khorum Latluida Rā

²⁰Awunga Hezekiahna ngathorthak thuida, keinungwui wungnaobingli kazipkhuida, ithumwui Avāwui shimli kāhaowa. ²¹Athumna mukvā shini, yaovā shini, yaonao shini, kala wungram, katharapam, kala Judahwui vang suihamchigatwui vang mevā shini khuirāda, ana ithumwui Avāwui hanphuttungli chigat khavai Aaronwui naomayarabing pāngmonbingli kasoi. ²²Athumna mukvābing taithata; pāngmonbingna ashee khuilaga hanphutli heirora. Athumna yaovābing taithatlaga ashee chi hanphutli heirora, chiwui thili yaonaobing taithatlaga ashee chi hanphutli heirora. ²³Athumna suihamchigatwui mebing chi awunga kala yaruiwui mangāli khuirāda, athumtungli pāng para. ²⁴Pāngmonbingna taithatlaga athumwui ashee eina hanphutli Israel saikorawui vang pheomi khavai suihamchigat sai, kaja awungana Israel saikorawui vang rikkatā kachigat eina suihamchigat kasohaira.

²⁵David, awungawui marān Gad kala marān Nathanna kasohai athishurda ana ithumwui Avāwui shimli kortar, tingteilā kala lyre ngasoda Levinaobingli pamngasaka; kaja kakaso chi ithumwui Avāna awui marānbingli hāngngasaka. ²⁶Levinaobingna Davidwui akap-akaibing ngasoda nganinga, kala pāngmonbingna talla̱ ngasoda nganinga. ²⁷Hezekiahna hanphuttungli rikkatā kachigat chigat khavai kasoi; chi sāphokthang, talla̱ kala Israelwui awunga Davidwui akap-akaibing ngasoda, ithumwui Avāwui laala sāphokluishita. ²⁸Rikkatā kachigat kupkahai eina tangda yarui katonga kui mashunzanga, laa kasābingna laa sai, talla̱ kakhongbingna talla̱ khongsai.

²⁹Kachigat kupkahaiwui thili, awunga kala ali ngasoda leikahai saikorana kui mashunzangda khoruma. ³⁰Awunga Hezekiah kala wungnaobingna, David kala marān Asaphwui tuibing eina ithumwui Avāli sochikat khavai Levinaobingli kasoi. Athumna mathānda laa sai, kui mashunzangda khoruma.

³¹Chiwui thili Hezekiahna hānga, "Nathum ara ithumwui Avāli tharmathengluishithaira. Rānganailu, ithumwui Avāwui shimli pha̱kaphayā kala ningkashiwui kachigat khuirālu." Chieina yaruina pha̱kaphayā kala ningkashiwui kachigat khuirā; ning sāngairereo kahai saikorana rikkatā kachigat khuirā. ³²Yaruina mukvā hangshini, yaovā shākha, yaonao shākhani khuirā; saikora hi ithumwui Avāli rikkatā kachigat serra. ³³Kala tharchigat kahai kachigatbing chi mukvā shātharuk kala yao thing kathumna. ³⁴Pāngmonbing chi rikkatā kachigat saikora ahui hem khavai kateokha, chiwui vang athumwui Levinao ivānaobingna ot chi kupkahai eina tangda, kala pāngmonbingna athum khalatta tharchigat eina tangda ngachonmi; athum khalatta tharchigat khavai Levinaobing chi pāngmonbingli ning khamashung suitāmei. ³⁵Rikkatā kachigat kachungkhali lāngda, ningyatchigatwui athao eina ra̱shakchigat athumwui vang leisai. Chithāda sāda ithumwui Avāwui shimli otram khangatha̱ chi hanmiluishita. ³⁶Hezekiah eina mibing saikorana, ithumwui Avāna athumwui vang ngarān kahai chiwui vang ringphālakhaowa; kaja chi thākta shokkahaina.