2 Thotrinchān 28

28 ¹Ahaz mungkaphok tharan zingkum maga̱ kāshunghairasai; kala Jerusalemli zingkum tharāda tharuk munga. Avāva̱ Davidna kasā thāda, ana ithumwui Avāwui mangāli khamashung otmāng masāmana. ²Chiwui mahutle, ana Israelwui awungabingwui shongfa thishura, kala Baalwui vang heikakhui meoma̱bing sākhui. ³Ana Hinnomwui naomayarawui tampākli nganamkaphā riktāda awui naomayara ngarā meili riktai; ithumwui Avāna Israelnaobingwui mangāli kasham kahai yurbingwui otsak ningkakachaibing chi ana sai. ⁴Ana kajujuiwui apambing, kaphungbing, kala khaneinā thingphāng saikorawui khanāli pha̱phayāda nganamkaphā riktāchinga. ^a a v4 Kajujuiwui apambing chi phungrei aton lah availi khalei khorumshimbing, Canaan ngalei peida meoma̱ khorum sākhavai khalen sākahaibingna.

⁵Chiwui vang eina ithumwui Avāna ali Syriawui awungawui pāngli tāngasakhaowa, ana ali yuihaida narkahaiya kachungkha Damascusli khuiungmi; kala Israelwui awungawui pānglila tāngasakta, ana ali kashao kharar akha shaomihaowa. ⁶Remaliahwui nao Pekahna thangkha akhali Judahwui raikapingbing lakh akhada thingmaga̱ shaothata, khikhalajila athumna ithumwui Avā, athumwui avā ngarāwui Vareli horhaowa. ⁷Ephraimwui raikapinga Zichrina awungawui naomayara Ma-aseiah, konungwui yangkhame Azrikam, kala awungawui thili leisā Elkanahli shaothata. ⁸Israelnaobingna athumwui theisā sha̱nao, mayarnao ngarā kala naongalāva̱ ngarā lakh-khani ngapaikhuida ngapon kachungkhala Samariali khuiungmi. ⁹Chili ithumwui Avāwui marān Oded akha leisai. Ana Samariali unghaowa raimibingli samphangda hānga, "Yanglu, nathumwui avā ngarāwui Vare, ithumwui Avā, Judahli malungvāthaida, ana athumli nathumwui pāngli tāngasakhaira. Kha nathumna kazingram shangda malungvāt eina athumli shaothata. ¹⁰Ara nathumna Judah eina Jerusalemwui mayarnao kala sha̱nao mibingli raonao sākhavai phaninga. Kha nathum khalatta eina tangdala nathumwui Avāwui mangāli morei masāmala? ¹¹Ara nganālu: nathumna narkahai nathumwui achinābing chi latung ngasakmilu, khikhalajila ithumwui Avāwui malungvātshun kahai nathumwuitungli lei." ¹²Ephraimwui khararabing kaikha, Johananwui nao Azariah, Meshillemothwui nao Berechiah, Shallumwui nao Jehizkiah, kala Hadlaiwui nao Amasana rai eina latung rāra̱bingli maingatlak eina nganinga. ¹³"Narkahaibing chi hili makhuirāhaialu," da athumna hānga. "Nathumna ithumwui morei kala khayonkhamāng ithumwui Avāwui mangāli mataisangkhangai phaninga. Ithumwui khayonkhamāng arui kharar khairasai, kala malungvātshun kahai Israelwuitungli hokthanghairasai."

¹⁴Chiwui vang shipaibingna narkahaibing kala ngapon chi kathānabingwui mangāli, yarui saikorawui mangāli tāngasakhaowa. ¹⁵Aming hāngphokhai mibingna narkahaibing chi khuiphungda, ngapon eina khamahong saikorali kachon ngavaimi. Athumna kachon kala pheihop ngavaimilaga zākhavai kala tuikhavai mida athumli thao eina neomi. Khangazanabingli gadhātungli tongngasakta, khaneirongwui keinung Jericholi athumwui achinā Israelnaobingwui pāngli khuiungmi, chiwui thili Samariali latunga.

¹⁶Chiwui atamli awunga Ahazna khangachonwui vang Assyriawui awungawui pāngli mi chihovai. ¹⁷Edomnaobingna latluida Judahli rangararluida, kala narkahaiya khuiungmi, ¹⁸Philistinenaobingna Judahwui angako kala Negeb keinungbingli ngaponzatlaga, Beth-shemesh, Aijalon, Gederoth, Soco, Timnah, kala Gimzo, athumwui kha̱bing eina ngasoda tukkhuida, apam chili sompama. ¹⁹Israelwui awunga Ahazwui vang eina ithumwui Avāna Judahli maishi ngasaka, kaja ana Judahli morei sākhangasaka, kala ithumwui Avāli katonga ning makatong sai. ^b b v19 Ahazna Judahwuitungli munga; ali "Israelwui awunga" da hangkahai china, atungshong wungramwui ning makatong awungabingwui shongfali kathāda katonga zata chi mayaina. ²⁰Assyriawui awunga Tiglath-pileserna Ahazli rāhaowa, kha ali ngachonmiwui mahutle, ali kakhanang mihaowa. ²¹Ahazna ithumwui Avāwui shim, awungawui shim, kala wungnaobingwui lan khuida, Assyriawui awungali miserhaowa; chithālala ali makhangachonmimana.

²²Awui kasak kharā tharan, hi Awunga Ahaz china ithumwui Avāli reimei ning makatong sai. ²³Ana ali sāshimitmi kahai Damascuswui varebingli pha̱phayai; "Aramwui awungabingwui varebingna athumli ngachonmi; ili ngachonmi khavai ina athumli pha̱phayāra" da phaninga. Kha china ali kala Israel saikorali sāshimān ngasaka. ²⁴Ahazna ithumwui Avāwui shimli khalei khorkhong kazipkhuida, chila amarimrim sa̱tāda, ithumwui Avāwui shimwui khāmong shungnamhaida, kala Jerusalemwui achithek kachida khalattawui vang hanphutbing sakai. ²⁵Judahwui keinung kachiva̱li ana vare khangateibingli nganamkaphā rikkatā khavai kajujuipam sakāda, ithumwui Avā, awui avāva̱ ngarāwui Vare chili malungvāt ngasaka.

²⁶Awui kasā khavā kala awui shongfa saikora, khare eina thuilaga khanao eina tangda, Judahwui kala Israelwui Awungabingwui Lairikli kapiserhaida lei. ²⁷Ahaz thihaida avāva̱ ngarāli ngasoda Jerusalemli chifaya, kha Israelwui awungabingwui chikhurli machifamana. Kala anaomayara Hezekiahna awui mahut thuishina.