Umwami yavuye kuri Data

Ahazi atanga abahungu biwe ngo baturirwe mu kibaya, maze ashikanwa mu maboko ya Aramu na Isirayeli. Igitangaje ni abahanuzi n'abakuru bo mu buraruko basubiza imbohe za Yuda i muhira zambitswe kandi zagaburiwe. Ahazi yishura gutsindwa atambira imana zamutsinze, kandi yugara imiryango y'inzu ya Data.

Igice 28.

Ahazi yabaye umwami afise imyaka mirongo ibiri; ategeka imyaka cumi n’itandatu i Yeruzalemu. Ntiyagize ivyiza mu maso ya Data wa twese, nk’uko sekuruza Dawidi yari yabigize. Ahubwo yagenda mu nzira z’abami ba Isirayeli, arakora n’ibigirwamana vy’ibyuma vya Bayali. Yatwika ububani mu Mwonga wa Beni-Hinomu, atwika n’abahungu biwe mu muriro, yigana ingeso zinuka z’amahanga Data wa twese yirukanye imbere ya Isirayeli. Yatanga ibimazi atwika n’ububani ku bibanza bikirije, ku dusozi no munsi ya buri giti kibisi. ^a

Nuko Data wa twese aramuha mu minwe y’umwami w’Aramu, uwamukubise, afata n’imbohe nyinshi azijana i Damasiko; aratangwa kandi mu minwe y’umwami wa Isirayeli, uwamukubise igikubagubo gikomeye. Peka mwene Remaliya yica abagabo b’intwari b’i Buyuda ibihumbi ijana na mirongo ibiri ku musi umwe, kuko bari bavuye kuri Data wa twese, Imana ya ba sekuruza. Zikiri, intwari y’i Efurayimu, yica Maaseya umuhungu w’umwami, na Azirikamu umukuru w’ingoro, na Elukana, uwa kabiri ku mwami. Isirayeli yafata incuti ibihumbi amajana abiri, abagore, abahungu n’abakobwa, hamwe n’iminyago myinshi, bivyikorera bijana i Samariya. Odedi, umuhanuzi wa Data wa twese, yari ng’aho. Asanganira ingabo zisubira i Samariya, ati: “Ehe Data wa twese, Imana ya ba sekuruza, yararakariye Abayuda, nuko abaha mu minwe yanyu. Mugabo mwabishe mufise ishavu rishitse mw’ijuru. Ubu mwiyemeje kugira imbata z’abo b’i Buyuda n’ab’i Yeruzalemu, abagabo n’abagore. Mbega namwe nyene ntimufise ibicumuro imbere ya So wanyu? None nimwumve: nimusubize incuti mwafashe imbohe, kuko uburake bukaze bwa Data wa twese buri hejuru yanyu.” Bamwe mu bakuru b’i Efurayimu, Azariya mwene Yohanani, na Berekiya mwene Mesilemoti, na Yehizikiya mwene Shalumu, na Amasa mwene Hadulayi, barahagarara bagarariza abava ku rugamba. Bati: “Ntimuze n’izi mbohe hano. Mugambiriye kongera ku bicumuro vyacu n’ibicumuro imbere ya Data wa twese. Icaha cacu kimaze kuba kinini, kandi uburake bukaze buri hejuru ya Isirayeli.”

Nuko abasirikare bashikiriza imbohe n’iminyago imbere y’abakuru, imbere y’ikoraniro ryose. Abagabo bavuzwe amazina bafata imbohe, bambika bose bari gusa mu minyago. Babaha impuzu n’inkweto, imfungurwa n’ibinyobwa, barabasiga amavuta. Bageretse abagoyagoya ku ndogoba, babajana kuri bene wabo b’Abisirayeli i Yeriko, igisagara c’amakindi, maze basubira i Samariya.

Muri ico gihe umwami Ahazi yarungika kubwa umwami w’i Ashuru ngo amutabare. Abedomu bari baratera Abayuda ubwa kabiri, bajana n’imbohe, mu gihe Abafilisitiya bateye ibisagara vy’Abayuda vyo mu kiyaya no mu Negebu, bafata Beti-Shemeshi, na Ayaloni, na Gederoti, na Soko, na Timuna, na Gimuzo hamwe n’imidugudu yavyo, maze batuhamwo. Data wa twese yaciye bugufi Abayuda kubera Ahazi umwami wa Isirayeli, uwakwiragije ubugizi bwa nabi mu Buyuda, agambararira Data wa twese rwose. ^b Tigilati-Pileseri umwami w’i Ashuru yaza kuri Ahazi, mugabo Tigilati-Pileseri amuzanira amagorwa aho kumutabara. Ahazi yambuye inzu ya Data wa twese, n’ingoro y’umwami, n’abakuru, ibintu vyabo vy’agaciro, abiha umwami w’i Ashuru, ariko ntivyamutabaye.

Mu gihe c’amarushwa yiwe, uwo mwami Ahazi nyene araheza aragira ubuhemu bwinshi kuri Data wa twese. Yatanga ibimazi ku bigirwamana vy’i Damasiko, ibyamutsinze, yiyumvira ati: “Ibigirwamana vy’abami b’Aramu vyarabatabaye; nzobitangira ibimazi kugira bintabare.” Mugabo vyaramuhonije hamwe na Isirayeli yose. Ahazi yakoranije ibikoresho vy’inzu ya Data wa twese, abimanyagura, apfundikira imiryango y’inzu ya Data wa twese, yishiriraho ibicaniro ku masaka yose y’i Yeruzalemu. Mu bisagara vyose vy’i Buyuda yubatse ibibanza bikirije kugira atwikireyo ibimazi ibindi bigirwamana, araheza ararakaza Data wa twese, Imana ya ba sekuruza.

Ibisigaye mu vyo yakoze n’inzira ziwe zose, uhereye ku ntango gushika ku mpera, vyanditswe mu Gitabu c’Abami b’i Buyuda n’ab’i Isirayeli. Ahazi aruhukana na ba sekuruza, bamuhamba i Yeruzalemu, ariko ntibamuhamba mu mva z’abami ba Isirayeli. Umuhungu wiwe Hezekiya aba umwami mu kibanza ciwe.