Me basika na mukanda
Dibuku

Kyadi samu na Yakobi

Tata ya beto me pesa Isayeli luvundulu, mpe Isayeli ke baka mambu ya kuseka na zulu ya munyokodi yina me bwa: ntoto kele pi, ata bayinti ya sedele me baka kiese. Muntu yina tubaka ti yandi ke yuluka na zulu ya bambwetete ke lala na kati ya bampese, ba pesa yandi ndyamu ve. Na manima, ba ke kebisa Filiseti na kuyangalala ve.

Tata ya beto ke zonza na bavese 22–27

Kapu 14.

Samu ti Tata ya beto ke tala Yakobi kyadi; yandi ke soola dyaka Isayeli mpe ke vwandisa bawu na yinsi ya bawu mosi. Munzenza ke vukana na bawu mpe ke kangama na dikanda ya Yakobi. Makanda ya bantu ke baka bawu mpe ke nata bawu na kisika ya bawu, mpe bantu ya Isayeli ke vwanda na bawu mutindu bisadi ya babakala mpe ya bakento na yinsi ya Tata ya beto. Bawu ke bwila bantu yina bwilaka bawu mpe ke yala bantu yina vwandaka nyokola bawu.

Na kilumbu yina Tata ya beto ke pesa nge kizunu na mpasi ya nge, na mavwanga, mpe na kisalu ya ngolo yina ba pusaka nge, nge ke baka mambu yayi ya kuseka samu na ntinu ya Babilone: Tala mutindu munyokodi me manisa! Tala mutindu nkele ya yandi me manisa! Tata ya beto me buka yinti ya bantu ya yimbi, mukawa ya kintinu ya bamfumu, yina bulaka makanda ya bantu na nkele na kubula yina kele na nsuka ve, yina yalaka makanda na nkele na minyokolo yina ke manisa ve. Ntoto ya mvimba kele na kizunu mpe pi; bantu ke yimbila na nsayi. Ata bayinti ya sipelese ke sepela samu na nge, mpe bayinti ya sedele ya Libane: «Katuka ntangu nge lalaka, ata muntu ya kuzenga bayinti ke tombuka ve samu na kununga beto.» Yinsi ya bantu ya kufwa na nsi ke ningana samu na kukutana na nge na ntangu nge ke kwiza; yawu ke vumbula bampeve samu na kupesa nge mbote, bawu nyonso yina vwandaka bamfumu ya ntoto; yawu ke vumbula na bakiti ya kintinu ya bawu bantu nyonso yina vwandaka bantinu ya makanda. Bawu nyonso ke vutula na nge: «Nge mpe me lemba mutindu beto! Nge me kuma mutindu beto! Nkembo ya nge ba me kulumuna na yinsi ya bantu ya kufwa, kumosi na musiku ya bansambi ya nge; ba me yala bantunga mutindu mfulu ya nge na nsi ya nge, mpe bantunga kele kima ya kufuka nge.» Tala mutindu nge me bwa katuka na zulu, Mbwetete ya Mene-mene, mwana ya suka-suka! Tala mutindu ba me zenga nge tii na ntoto, nge yina bwisaka makanda ya bantu! a a v12 Mbwetete ya Mene-mene yina bwaka vwandaka me zaba Tata ya beto kasi yandi buyaka yandi, na kumekaka kubaka kisika ya Tata ya beto na kisika ya kundima kisika ya yandi mosi mutindu kima yina Tata ya beto gangaka. Nge tubaka na ntima ya nge: «Mu ke tombuka na zulu; mu ke tombula kiti ya munu ya kintinu na zulu ya bambwetete ya Nzambi; mu ke vwanda na mongo ya lukutakanu, na suka ya node. Mu ke tombuka na zulu ya matuti; mu ke kitula munu mosi mutindu Muntu ya Kuluta Zulu.» Kasi ba me kulumuna nge na yinsi ya bantu ya kufwa, na suka ya dibulu. Bayina ke tala nge ke tula meso ya bawu na nge mpe ke yituka: «Keti muntu yayi yina salaka ti ntoto kutekita, yina salaka ti bimfumu kuningana, yina salaka ti yinza kukuma mutindu yinsi ya kuyuma mpe bebisaka bambanza ya yawu, yina zolaka ve kuyambula bankole ya yandi na kuvutuka na yinzo ya bawu?» Bantinu nyonso ya makanda ke lala na nkembo, muntu na muntu na dibulu ya yandi mosi; Kasi ba me losa nge na ngaanda, ntama ya dibulu ya nge, mutindu kintala ya nsisi, ya ba me fuka na bantu ya kufwa, bayina ba tobolaka na mbele ya mvita, bayina ke kulumuka na matadi ya dibulu, mutindu mvumbi yina bantu me dyata. Nge ke vukana ve na bawu na nzikulu, samu ti nge bebisaka yinsi ya nge mosi, nge fwaka bantu ya nge mosi. Bika ti ba tanga dyaka ve nkumbu ya bana ya bantu ya yimbi! Beno yidika kufwa samu na bana ya yandi samu na masumu ya batata ya bawu, samu ti bawu telama ve mpe baka ntoto mpe fulusa yinza ya mvimba na bambanza.

«Mu ke telama samu na kunwanisa bawu, Tata ya binwani ya zulu ke tuba, mpe mu ke katula na Babilone nkumbu na bantu yina me bikana, bana na bana ya bana ya bawu, Tata ya beto ke tuba. Mu ke sala yawu kisika ya kuzinga ya banungu mpe mabulu ya maza, mpe mu ke kombola yawu na kikombolo ya kubebisa, Tata ya binwani ya zulu ke tuba.»

Lukanu ya Tata

Tata ya binwani ya zulu me dya ndefi: «Ya tsyelika, mutindu mu kanisaka, yawu ke salama mutindu yina; mutindu mu bakaka lukanu, yawu ke telama mutindu yina. Mu ke bukuna mu-Asili na yinsi ya munu, mpe na zulu ya myongo ya munu mu ke dyata yandi; vangu ya yandi ke katuka na bawu, mpe kizitu ya yandi ke katuka na digembo ya bawu. Yayi kele lukanu yina ba me baka samu na ntoto ya mvimba, mpe yayi kele diboko yina me tandama na zulu ya makanda nyonso. Samu ti Tata ya binwani ya zulu me baka lukanu, mpe nani lenda kukabikisa yawu? Diboko ya yandi me tandama, mpe nani lenda kuvutula yawu?»

Ntangu Ntinu Akaze Fwaka

Na mvula yina ntinu Akaze fwaka, mbikudulu yayi kwizaka: Beno sepela ve, beno nyonso ya Filiseti, samu ti nti yina bulaka beno me buka; samu ti na myanzi ya nyoka, nyoka ya mbi ke basika, mpe mbuma ya yawu ke vwanda nyoka ya tiya yina ke pumbuka. Bamputu ya kuluta bamputu ke dikila na kati ya lukengolo, mpe bamputu ke lala na lukengolo; kasi mu ke fwa myanzi ya nge na nzala, mpe yawu ke bebisa bantu ya nge yina me bikana. Dila, kyelo; sala milolo, mbanza; beno nyonso ya Filiseti, beno lemba na boma! Samu ti mulinga ke basika na node, mpe ata kinwani mosi ke bikana na nima ve na mikangu ya yawu. Mvutu nki ba ke pesa na bantumwa ya dikanda? «Tata ya beto me yidika Siyone, mpe na kati ya yawu, bantu ya yandi ya kukuluka ke bumbama.»