Isaiah 14

14 ¹Kaja ithumwui Avāwui ninga Jacobwui vang lukhamashana pemtinghaira; ana Israelli latluida pangkhuida athumli ichichāwui ngaleili pamngasakra. Ramkazata athumli ngasozatra kala Jacobwui shimkhurli khalatta hoksangra. ²Miyurbingna athumli khuida athumwui apamli thānvāra, kala Israelwui shimkhurna athumli ithumwui Avāwui ngaleili mayarnao rao eina sha̱nao rao thāda shimlui khuira. Athumna athumli tukkakhuibingli tukkhuira kala athumwui rekakharekabing tungli mungra.

³Ithumwui Avāna nathumwui khangashei, kakhanang, kala nathumli tandi sāhai kharita ot eina nathumli ngasāmkakhui mi zimiksho chili, ⁴nathumna Babylonwui awungawui pongli hi mana̱shi tui hāngra: Rekakhareka kathāda shihaira! Awui malungvāt kathāda shihaira! ⁵Ithumwui Avāna makhayābingwui lijei sātekmihaira, khamungabingwui khānthing, ⁶Chi malungkhavāt eina mibingli katang makhavai khamā za̱mi, kala malungvāt eina makai makhavai rekakharek eina yurbingli munga. ⁷Okathui saikora ngasāmkhuida lei kala va̱ri kahaina; mibingna laa sāphokhaira. ⁸Cypressthingla nawui vang ringphāpaira, kala Lebanonwui cedarthingla: "Na maishi ngasakhaowa eina, thing kata̱pa akhala ithumli latrāda maleimana." ⁹Azingshong khalei Kathewui ram na kharā tharan nali samphang khavai ngatha̱paira; nali shālam mi khavai ana okathuiwui akhavābing ngarā saikorawui manglābingli ngatha̱ ngasakra; ana yurbingwui awunga ngarā saikorali athumwui wungpamkhong eina khāngmathotmi. ¹⁰Athum saikorana nali ngahānkāda hāngra: "Nala ithum thāda khangazana ngasāhaira! Na ithum thāda ngasāhaira! ¹¹Nawui tingteilāwui laakhon ngasoda nawui kashang-kharei Kathewui ramli khuitāhaira; nawui azingli ka̱lom nawui pet thāda hamizahaira, kala kachai nawui faror ngasāhaira." ¹²O Zingthanwo, kazing kathangwui naomayara, na kazingramwui eina kathāda kongluihaokhala! Na ngaleili kathāda ta̱tekahaokhala, na yurbingli maishi ngasakhaipa! ^a a v12 Kongluihai Zingthanwo chi ithumwui Avāli theikahaisi kaje awui eina ngareithuihaira; ithumwui Avāna sāhai otsem akha thāda khalattawui apam samkaphang khavai shongli, ithumwui Avāwui apamli khuikhavai chuktakhaira. ¹³Na naningli hānga, "Ina kazingram kāra; iwui wungpamkhong Varewui sirābingwui tungli khāngkāra; atungshongwui akatangli kazip kaphungli ina pamra. ¹⁴Muiyā kajujuiwui tungli ina kāra; Juikhamatai thāda ina khalatta sākhuira." ¹⁵Kha na Kathewui ramli, chomwui akatangli khuitāhaira. ¹⁶Nali theibingna nali yangda, matakhak eina hāngra: "Hi ngaleili nganukyik ngasakpa, wungrambingli khanukshokpa mipā chila, ¹⁷okathuili lamhāng thāda sakahaipa, kala chiwui keinungbing shaokhaimipa, awui narkahaibingli shimli ung mangasakpa?" ¹⁸Yurbingwui awunga saikora mi kachiva̱na khalattawui chikhurli tekhamatei eina pisang; ¹⁹kha nava ningkachai kahai aphāng thāda nawui chikhurwui eina horhaida, chomwui lungguitungli zatabing, raighai eina rungthat kahaibing, shaokathat kahaibing eina khaluiphinda, naikazam kahai kathingun thāda ngasāra. ²⁰Nava chifali athumli ngasoda mangarummana, kaja nana khalattawui ngalei sāshimānhaira, nana khalattawui mibing shaothata. Makaphā kasābingwui ara̱-azā katang mavaila mashokngasakluimaranu! ²¹Athumwui shāvā ngarāwui khayonkhamāngwui vang awui naobingwui vang taithat khangarānlu; chithāda athumna ngakarthuida ngalei chi mapangngasak, kala okathui saikora keinung eina machipemaranu.

²²"Ina athumli ngakaishida ngakarthuira, da saikorawui Avāna hānga, kala ina Babylonwui eina aming kala shākkahai, ara̱-azā kala naotun katathaira, da ithumwui Avāna hānga. ²³Ina chi ngaleihokwui pam kala tara̱ ra̱khong ngasakra, kala ina ali sākashimānwui kashamshok eina kashamshokra, da saikorawui Avāna hānga."

Avāna Kharin Sākahai

²⁴Saikorawui Avāna ngashithaira: "Kachangkhata ina phaningkasā thāda, chithāda shokra; ina ngarān kahai thāda, chithāda nganingra. ²⁵Iwui ngaleili ina Assyriali sātekmira, kala iwui kaphungbingli ina ali pheizingli naikazamra; awui kashai chi athumwui eina sāshatmihaora, kala awui otphun athumwui yartuiwui eina ngavātāmira. ²⁶Hi okathui saikorali ngakaishida ngarān kahai kaphaning chilina, kala hi yur saikorawuitungli katingshok kahai pāng chilina. ²⁷Kaja saikorawui Avāna khamayā mihaira, kala khipāna chi yuimirakhala? Awui pāng katingshok kahaina, kala khipāna chi ngalanngasakrakhala?"

Awunga Ahaz Thihai Tharan

²⁸Awunga Ahazna thipai zingkumli, hi khamarān rāhaira: ²⁹O Philistiawui mibing saikora, nali shao kahai lijei sātekmihaira da maringphāalu; kaja phara̱wui angayung eina chaoshai akha shokra, kala chiwui athei yongkazata, meiwon phara̱ ngasāra. ³⁰Kachāma khamataibingna tāphup eina phāshaira, kala khavātabingna reisanglak eina pira; kha ina nawui angayung chāmrei eina sāthatra, kala china nawui shākkahai sāshimānra. ³¹O ngavei, chaplu; O keinung, vaolu; O Philistiawui mibing saikora, khangachee eina menglu! Kaja atungshongwui eina meikhut shoka, kala awui rankhali raimi akhalila khanukshong matukmara. ³²Khi ngahānkā yurwui paomebingli khamira? "Ithumwui Avāna Zion sākai kahaina, kala chiwui alungli awui miwui kachotabingna ngayinkhui."