Rireenet agobo Jakobo
Ye kagoon Kwandanyo kamuung'et, konam Israel taunet agobo usiindet ne kabut: komeng'iis ng'wony komugul ak koreeng', agot taragonik koboiboentos. Ineendet ne ki le atogoste kosiir kotutik, konyooru eng' kwenutap tamirmirik, ne ma kigoochin kererit. Yeityo kikergong'ei Philistiik kole matoboiboigei.
Ng'alaali Kwandanyo eng' mustarisyek 22–27
14 1Amu iriiree Kwandanyo Jakobo; ko tuun kolewen kogeny Israel ak komenyei icheek eng' emennywa. Kotuitos punindo ak icheek ak koratyigei eng' kootap Jakobo. 2Konam pororyosyek icheek ak koibu icheek koit komostanywa, ak konyaban koot ne po Israel icheek koek otwogik che murenik ak che kwonyiik eng' emetap Kwandanyo. Konyaban luulenikwak ak koboun usiikwak.
3Eng' peetuut ne goonok Kwandanyo kamuung'et eng' nyaliildang'wong', ak eng' kong'etyet, ak eng' poisyet ne nwaan ne ki kigosibwok, 4inamtoos taunet ni agobo laitoryatap Babilon: Ano u kagosiis usiindet! Ano u kagosiis nyitatennyi! 5Kagobar Kwandanyo kirokto ne po che yaacheen, kirokto ne po pounik, 6ne ki pir pororyosyek eng' nyitatet eng' korotwek che ma betos, ne ki boun pororyosyek eng' angeet eng' usiisyet ne ma iterei. 7Meng'iisyei ng'wony komugul ak koreeng'; kotoi piik kotyen. 8Agot saipresisyek koboiboentos agobo inyee, ak taragonigap Lebanon: “Kobooch ye ki ipochinin ng'wony, mabwa chii ne tilei keetiik kobarech.” 9Ilengei kererit ne ng'wony kotoretkei ak inyee eng' nyoonetng'ung'; ing'eeti tamirmirik kogaten inyee, tugul che ki kandoigap ng'wony; ing'eeti eng' ng'echerokwak tugul che ki laitorinigap pororyosyek. 10Kowolu icheek tugul koleenjin: “Kagiegu inyee agine ne nyolyool ko uu acheek! Kagiegu ko uu acheek! 11Kagichoorta mogornateng'ung' koba kererit, kobooto musigap kibugandiniguk; kigayachi kuutik koigei karneng'ung' ng'wony eng' inyee, ak koek kuutik iitutyeng'ung'.” 12Ano u kagibut inyee eng' kipsengwet, Taboiyatap Betut, weeriitap karon! Ano u kagitilin kiwir ng'wony, inyee ne ki ipochin pororyosyek ng'wony! a a v12 Taboiyatap Betut ne ki but ko ki kingen Kwandanyo ak koyewe ineendet, ki yaei kotabaan konam ole po Kwandanyo kosiir konyoor ole nyinenyi ko uu chii ne ki kiyai Kwandanyo. 13Ki imwa eng' muguleldang'ung', “Atogoste kipsengwet; Ang'eeti ng'echerennyu kobaklda taboiyosyekap Kamuktaindet; Atebi eng' tulweetap tuiyet, eng' komoswek che loo che po murot. 14Atogoste kobaklda tordosyegap poolik; Ayaigei koek ko uu ne Toroor miising'.” 15Ago kagichoortin koba kererit, koit let ne loo ne po keriinget. 16Che geerin konyali inyee ak kobwaat: “Tos chiini ne ki yai ng'wony kopotan, ne ki ipotyo laitornatosyek, 17ne ki yai ng'wony koigei timdo, ak kowechi nganasosyekyik, ne ki ma yachi luulenikyik koweek koonnywa?” 18Ruei laitorinigap pororyosyek tugul eng' toroornatet, age tugul eng' tubennyi; 19ago kagiwirin inyee, kobun kererinng'ung', ko uu temeet ne kingwechaat, kagiputee piik che kiga kobar, che ki kitoor eng' rotwetap chok, che chooto koba koigap keriinget, ko uu muusto ne kagityegaat. 20Matuiyo inyee ak icheek eng' tubeet, amu ki iwech emeng'ung', ki ibar piiguk. Mamuche konaamei iyotap yaigap yaityet agine! 21Ochopchi parak weeriikyik amu tengektap kwanisyekwak, si matang'eet konyaban ng'wony ak koityi nganasosyek ng'wony komugul.
22“Ang'eetyi icheek, kole Kwanda ne po lugosyegap kipsengwet, ak atil eng' Babilon kainet ak che ng'et, iyoteet ak che isubu, kole Kwandanyo. 23Ayai koek ole menye tyong'in ak tamboinik che po peek, ak abuch eng' kibuchetap keesiset, kole Kwanda ne po lugosyegap kipsengwet.”
Kiit ne Kayachi Kwanda
24Kaayas Kwanda ne po lugosyegap kipsengwet, koleenji: “Iman, ko uu ye ki abwaati, ko uu nooto ne koek; ko uu ye ki atil, ko uu nooto ne kotonon. 25Atyech Asuriandet eng' emennyu, ak eng' tulwoonikyuk aiyeste ineendet; ak keisto kurereennyi eng' icheek, ak keisto kipkoonennyi eng' logoennywa. 26Ni ko bwaatet ne kayachi agobo ng'wony komugul, ak ni ko euut ne kagichuulda kotokyi pororyosyek tugul. 27Amu kagotil Kwanda ne po lugosyegap kipsengwet, ak ng'oo ne imuuchi koterteer? Kagichuulda eunnyi, ak ng'oo ne imuuchi koweechi?”
Ye Kime Laitoryat Ahaz
28Eng' kenyiit ne ki kime Laitoryat Ahaz, ko ki nyo ng'olyoondoni: 29Mat oboiboitu, okweek Philistiik tugul, amu kagituch kirokto ne ki kopirok; amu konyonei ereneet eng' tigityotap ereneet, ak koek logoennyi ereneet ne po maat ne lelyei. 30Oagetei kibananogap kibananook eng' kaalyeet, ak koru che nyalilen eng' kaalyeet; ago abar tigityeng'ung' eng' rubeet, ak kogees che ng'etchok. 31Iriir, kurgeet; iwaach, nganaseet; omeyo eng' koiyweet, okweek Philistiik tugul! Amu mong' iyeet eng' kaataam, ak ma mi chii age tugul ne kabagak eng' lugosyekyik. 32Nee wolet ne kiwolji kiyooktindogap pororyet? “Kagigimit Kwandanyo Zion, ak komang'u che nyalilen eng' piiguk eng' ineendet.”