Izaiya 14 FHB Father's Heart Bible™

14 ¹Thangwi ntima wa Baba wathu unadzabva ntsisi kuna Yakobo; Iye anadzasankhula pontho Izarayeli, mbaaikha m'dziko yawo yene. Anendo anadzabverana nawo, mbaphatana na nyumba ya Yakobo. ²Mitundu ya anthu inadzaakwata mbaaperekeza ku mbuto yawo, na nyumba ya Izarayeli inadzaakhala nawo ninga atumiki amuna na akazi m'dziko ya Baba wathu. Anadzamanga ale akhaamanga, mbatonga ale akhaathabusa.

³Pa ntsiku inakupasani Baba wathu kupuma ku kupha kwanu, ku nyatwa zanu, na ku basa yakuwanga ikhakumangani imwe, ⁴munadzakuza nyimbo iyi yakunyoza kuna mambo wa Bhabhilonya: Nyakuthabusa alekeswa tani! Ukali wace wamala tani! ⁵Baba wathu waswa ndodo ya anyakuipa, ndodo yaumambo ya atongi, ⁶idamenya mitundu ya anthu mu ukali na kumenya kwakukhonda kumala, idatonga madzindza mu ukali na kuthabusa kwakukhonda kuleka. ⁷Dziko yonsene iri pakupuma na pantendere; anthu asatoma kuimba. ⁸Miti ya sipresimbo isakutsandzayira pa iwe, na mikedri ya Lebhanoni: “Kubulukira pidagwiswa iwe, nkhabe nyakugwanda miti anakwira kudza kuna ife.” ⁹Manda a pantsi asatekenyeka toera kukuchingamira pakufika kwako; asalamusa mizimu toera ikulandire iwe, onsene akhali atsogoleri a dziko; asalamusa pa mipando yawo ya umambo onsene akhali amambo a madzindza. ¹⁰Onsene anadzatawira mbakupanga iwe tenepa: “Iwembo wacitika wakufewa ninga ife! Wacitika ninga ife! ¹¹Mbiri yako yatcithwa pantsi ku manda, pabodzi na nyimbo za mazeze ako; nyongolodzi zayalwa ninga nkhuphi wako pantsi pako, na mbamba ndi cakufukatira cako.” ¹²Wagwa tani kubuluka kudzulu, Nyenyezi ya Namacibese, mwana wa kuca kwa ntsiku! Wagwandiwa tani mpaka pantsi, iwe udagwisa madzindza! ^a a v12 Nyenyezi ya Namacibese idagwa ikhadziwa kale Baba wathu mbwenye yaankhonda, mbiyesera kutenga mbuto ya Baba wathu, m'mbuto mwa kutambira mbuto yace yene ninga cinthu cidalengwa na Baba wathu. ¹³Iwe walonga muntima mwako: “Ndinakwira kudzulu; ndinakweza mpando wanga wa umambo padzulu pa nyenyezi za Mulungu; ndinakhala pa phiri ya misonkhano, kutali kwene ku kumpoto. ¹⁴Ndinakwira padzulu pa kutalika kwa makole; ndinadzicita ninga Wapadzulu Kakamwe.” ¹⁵Mbwenye iwe watcithwa ku manda, ku makoleko a dindi. ¹⁶Ale anakuona anadzayang'ana pa iwe mbadzumatirwa tenepa: “Uyu ndiye mamuna adacitisa dziko kutekenyeka, adagwedesa maumambo, ¹⁷adacita dziko ninga thando mbagomola mizinda yace, adakhonda kutawirisa anyakumangiwa ace kubwerera kunyumba?” ¹⁸Amambo onsene a madzindza agona mu mbiri, m'bodzi na m'bodzi mu nthumbi yace yene; ¹⁹mbwenye iwe watayirwa kunja, kutali na manda ako, ninga nthambi yakuidiwa, wafukatirwa na anyakuphiwa, ale adabayiwa na supada, ale anatcita ku miyala ya dindi, ninga nthembe yakuponderwa. ²⁰Iwe nkhabe kudzaphatanizwa nawo pa kuikhwa m'manda, thangwi wafudza dziko yako yene, wapha mbumba yako yene. Mbeu ya anyakucita pyakuipa ileke kucemerwa pontho ndzidzi onsene! ²¹Khunganyani kupha ana ace amuna thangwi ya madawo a ababa awo, toera akhonde kulamuka mbatonga dziko, mbadzadza dziko yonsene na mizinda.

²²“Ine ndinalamuka toera kumenyana nawo, asalonga Baba wa magulu a nkhondo a kudzulu, ndinagwanda ku Bhabhilonya dzina na anyakusala, mbeu na dzindza, asalonga Baba wathu. ²³Ndinaicita mbuto ya nungu na maziba a madzi, ndinaipupa na mphaso ya cifudzo, asalonga Baba wa magulu a nkhondo a kudzulu.”

Pidatonga Baba

²⁴Baba wa magulu a nkhondo a kudzulu wadumbira tenepa: “Mwandimomwene, ninga mudanyerezera Ine, pinadzacitika tenepo; ninga mudatonga Ine, pinadzakhazikika tenepo. ²⁵Ine ndinaswa Muasiriya m'dziko yanga, pa mapiri anga ndinampondaponda pantsi; goli yace inadzabuluswa kuna iwo, na ntolo wace unadzabuluswa pa pewa yawo. ²⁶Ici ndi cifuniro cidatongwa kuna dziko yonsene, uwu ndi nkono udafunyulwa padzulu pa madzindza onsene. ²⁷Thangwi Baba wa magulu a nkhondo a kudzulu watonga kale, mbwenye mbani anakwanisa kucinja? Nkono wace wafunyulwa, mbani anakwanisa kuubweza?”

Pidafa Mambo Ahazi

²⁸M'caka cidafa Mambo Ahazi, mphangwa iyi yabwera: ²⁹Lekani kutsandzaya, imwe monsene a Filistiya, thangwi ndodo idakumenyani yasweka; thangwi ku muzi wa nyoka inadzabuluka nyoka yausumu, na misapo yace inadzakhala nyoka yamoto yakutsambuka. ³⁰Anyakutcerenga pakati pa akutcerenga anadzadya mwantendere, anyakusowa anadzagona mwakutsidzikizika; mbwenye Ine ndinapha muzi wako na njala, njala inadzafudza anyakusala ako. ³¹Lirani, imwe nsuwo; kuwani, imwe nzinda; nyenyeukani na kugopa, imwe monsene a Filistiya! Thangwi utsi usabuluka kumpoto, nkhabe nyankhondo m'bodzi anasala nduli mu misoka yace. ³²Ndi ntawiro wanji unadzaperekwa kuna amithumwa a dzindza? “Baba wathu wakhazikisa Siyoni, mu iyi anyakuthabuka a mbumba yace anagumana pakubisalira.”