Ezayi 14 FHB Father's Heart Bible™

14 ¹Paske kè Papa nou pral gen pitye pou Jakòb; l'ap chwazi Izrayèl ankò, l'ap tabli yo nan pwòp peyi pa yo. Etranje a va mete tèt li ansanm ak yo, l'a tache kò li ak kay Jakòb la. ²Pèp yo va pran yo, y'a mennen yo tounen nan plas yo, epi kay Izrayèl la va posede yo tankou domestik, fanm kou gason, nan peyi Papa nou an. Y'a fè moun ki te fè yo prizonye yo tounen prizonye, y'a donminen sou moun ki t'ap peze yo.

³Jou Papa nou va ba ou repo apre doulè ou, apre tèt chaje ou, ak apre travay di yo te fòse ou fè a, ⁴w'a pran chante mokri sa a kont wa Babilòn nan: Gade ki jan moun ki t'ap peze nou an sispann! Gade ki jan raj li sispann! ⁵Papa nou kase baton mechan yo, baton otorite chèf yo, ⁶ki te frape pèp yo ak kòlè, ki t'ap ba yo kou san rete, ki te donminen nasyon yo ak raj, ak yon pèsekisyon ki pa t'ap janm sispann. ⁷Tout latè nan repo, li trankil; moun yo pete chante. ⁸Menm pye sipre yo kontan pou ou, ak pye sèd peyi Liban yo: “Depi ou tonbe atè, pa gen moun k'ap koupe bwa ki monte vin atake nou.” ⁹Peyi kote mò yo ye anba a boulvèse pou l vin rankontre ou lè w'ap rive; li reveye lespri mò yo pou yo salye ou, tout moun ki te chèf sou latè; li fè tout moun ki te wa nan nasyon yo leve soti sou fòtèy yo. ¹⁰Yo tout va reponn, y'a di ou: “Ou menm tou ou vin fèb menm jan ak nou! Ou vin tankou nou! ¹¹Yo desann tout bèl pouvwa ou nan peyi mò yo, ansanm ak mizik gita ou yo; yo blayi vè atè pou sèvi ou kabann anba ou, epi se vè ki sèvi ou kouvèti.” ¹²Ki jan ou fè tonbe soti nan syèl, Zetwal Maten, pitit douvanjou a! Ki jan yo fè koupe ou jete atè, ou menm ki te kraze nasyon yo! ^a a v12 Zetwal Maten ki te tonbe a te konnen Papa nou, men li te rejte li, li t'ap chèche pran plas Papa nou olye li te aksepte pwòp plas pa li tankou yon kreyati Papa nou te fè. ¹³Ou te di nan kè ou, “M'ap monte nan syèl la; m'ap leve fòtèy mwen pi wo pase zetwal Bondye yo; m'ap chita sou mòn kote yo reyini an, byen lwen nan nò a. ¹⁴M'ap monte pi wo pase tèt nwaj yo; m'ap fè tèt mwen tankou Bondye ki anwo nan syèl la.” ¹⁵Men yo desann ou nan peyi mò yo, jouk nan fon twou a. ¹⁶Moun ki wè ou va gade ou byen epi y'a mande tèt yo: “Èske se nonm sa a ki te fè latè tranble a, ki te souke tout wayòm yo, ¹⁷ki te fè monn lan tounen yon dezè, ki te kraze vil yo, ki pa t vle kite prizonye li yo tounen lakay yo?” ¹⁸Tout wa nasyon yo kouche nan laglwa, chak nan pwòp kavo pa li; ¹⁹men ou menm, yo voye ou jete lwen kavo ou, tankou yon branch moun rayi, kouvri ak kadav moun yo touye, moun nepe pèse, moun k'ap desann nan wòch fon twou a, tankou yon kadav yo pile anba pye. ²⁰Yo p'ap antere ou ansanm ak yo, paske ou te detwi pwòp peyi pa ou, ou te touye pwòp pèp pa ou. Se pou non pitit mechan yo pa janm nonmen ankò! ²¹Pare pou nou masakre pitit gason li yo poutèt peche papa yo, pou yo pa ka leve pran latè a nan men moun, pou yo pa plen monn lan ak vil.

²²“M'ap leve kanpe kont yo, se Papa ki kòmande lame syèl la ki di sa, epi m'ap retire sou Babilòn non li ak rès moun li yo, pitit li ak pitit pitit li, se Papa nou ki di sa. ²³M'ap fè l tounen yon kote ki plen zannimo pikan ak ma dlo, epi m'ap bale l ak bale destriksyon, se Papa ki kòmande lame syèl la ki di sa.”

Sa Papa a deside

²⁴Papa ki kòmande lame syèl la fè sèman: “Sa m te planifye a, se sa k'ap fèt vre; sa m te deside a, se sa k'ap kanpe fèm. ²⁵M'ap kraze moun Lasiri a nan peyi mwen, epi sou mòn mwen yo m'ap pile l anba pye; y'ap wete jouk li sou yo, y'ap retire chay li sou zepòl yo. ²⁶Men plan yo deside kont tout latè a, epi se men sa a ki lonje sou tout nasyon yo. ²⁷Paske Papa ki kòmande lame syèl la deside, kilès ki ka defèt sa? Men li lonje, kilès ki ka fè l tounen dèyè?”

Lè wa Akaz te mouri

²⁸Nan lanne wa Akaz te mouri a, mesaj sa a te vini: ²⁹Nou menm, tout moun Filisti, pa fè kè nou kontan, dèske baton ki te frape nou an kase; paske nan rasin sèpan an va soti yon sèpan ki gen pwazon, epi fwi li va yon sèpan dife k'ap vole atake. ³⁰Moun ki pi pòv pami pòv yo va manje san danje, moun ki nan nesesite va kouche san pè; men m'ap touye rasin ou ak grangou, epi grangou a va detwi rès moun ou yo. ³¹Nou menm pòtay, rele anmwe; nou menm vil, kriye; nou menm tout moun Filisti, kè nou fann ak laperèz! Paske lafimen ap soti nan nò a, epi pa gen yon sèl sòlda ki rete dèyè nan ran yo. ³²Ki repons y'a bay mesaje nasyon an? “Se Papa nou ki te fonde Siyon, epi se nan li moun ki nan lapenn nan pèp li a jwenn pwoteksyon.”