U-Izaya 14

14 ¹Ngokuba inhliziyo kaBaba wethu iyakuba nesihawu ngoJakobe; uyakuphinda akhethe u-Israyeli abahlalise ezweni labo. Owezizwe uyakuhlangana nabo, azihlanganise nendlu kaJakobe. ²Izizwe ziyakubathatha zibayise endaweni yabo, indlu ka-Israyeli iyakuba nabo njengezinceku nezincekukazi ezweni likaBaba wethu. Bayakubathumba abathumbi babo, babuse abacindezeli babo.

³Ngosuku uBaba wethu akunika ngalo ukuphumula ebuhlungwini bakho, ekuyaluzeni, nasemsebenzini onzima owawuwenziswa ngenkani, ⁴uyakuphakamisa le ngoma yokuklolodela inkosi yaseBabiloni, uthi: Yeka ukuma komcindezeli! Yeka ukuphela kolaka lwakhe! ⁵UBaba wethu uyephule induku yababi, intonga yababusi, ⁶eyashaya izizwe ngentukuthelo ngemivimbo engapheliyo, eyabusa izizwe ngolaka ngokuhlushwa okungayekiyo. ⁷Umhlaba wonke usuphumule wathula; abantu baqhumuka ngengoma. ⁸Ngisho nemisayipuresi iyajabula ngawe, nemisedari yaseLebanoni, ithi: “Selokhu wehliselwa phansi, akusekho umgawuli wezihlahla okhuphukela kithi.” ⁹Ingcwaba phansi liyanyakaziswa ukuba likuhlangabeze ekufikeni kwakho; livusa imimoya ukuba ibingelele wena, bonke ababengabaholi bomhlaba; liphakamisa ezihlalweni zabo zobukhosi bonke ababeyizinkosi zezizwe. ¹⁰Bonke bayakuphendula bathi kuwe: “Nawe usuphenduke wabuthakathaka njengathi! Usufana nathi! ¹¹Ubukhazikhazi bakho sebehliselwe engcwabeni, kanye nomculo wamahabhu akho; impethu yendlalwa yaba ngumbhede wakho ngaphansi kwakho, nezibungu ziyingubo yakho yokwembesa.” ¹²Yeka ukuwa kwakho usuka ezulwini, wena Nkanyezi Yokusa, ndodana yokusa! Yeka ukunqunywa kwakho uwiselwa phansi emhlabeni, wena owawisela phansi izizwe! ^a a v12 INkanyezi Yokusa ewileyo yayimazi uBaba wethu kodwa yamala, izama ukuthatha indawo kaBaba wethu esikhundleni sokwamukela eyayo njengesidalwa esadalwa nguBaba wethu. ¹³Wathi enhliziyweni yakho: “Ngiyakwenyukela ezulwini; ngiyakuphakamisela isihlalo sami sobukhosi ngaphezu kwezinkanyezi zikaNkulunkulu; ngiyakuhlala entabeni yomhlangano, ezingxenyeni ezikude zasenyakatho. ¹⁴Ngiyakwenyuka ngaphezu kweziqongo zamafu; ngiyakuzenza ngifane noPhezukonke.” ¹⁵Kodwa wehliselwa engcwabeni, ezingxenyeni ezikude zomgodi. ¹⁶Labo abakubonayo bayakugqolozela kuwe bemangale, bathi: “Ingabe yilo muntu owenza umhlaba wathuthumela, owanyakazisa imibuso, ¹⁷owenza izwe laba njengehlane wadiliza imizi yalo, ongazange avumele abathunjwa bakhe ukuba babuyele ekhaya?” ¹⁸Zonke izinkosi zezizwe zilele ngenkazimulo, yileyo naleyo ethuneni layo; ¹⁹kodwa wena ulahlelwe ngaphandle, kude nethuna lakho, njengegatsha elinengekayo, umbozwe ngababuleweyo, labo abagwazwe ngenkemba, abehlela ematsheni omgodi, njengesidumbu esinyathelwayo. ²⁰Awuyikuhlanganiswa nabo ekumbelweni, ngoba wachitha izwe lakho, wabulala abantu bakho. Inzalo yabenzi bokubi mayingaphindi iphathwe ngegama naphakade! ²¹Lungiselani amadodana akhe ukubulawa ngenxa yecala laboyise, ukuze bangavuki bathathe umhlaba bagcwalise izwe lonke ngemizi.

²²“Ngiyakuvukela bona, kusho uBaba wamabutho asezulwini, ngiyakunquma eBabiloni igama nensali, inzalo nozalo, kusho uBaba wethu. ²³Ngiyakulenza libe yindawo yokuhlala kwengungumbane, namachibi amanzi, ngilishanele ngomshanelo wencithakalo, kusho uBaba wamabutho asezulwini.”

Lokho uBaba akuhlosile

²⁴UBaba wamabutho asezulwini ufungile, wathi: “Impela njengoba ngihlosile, kuyakuba njalo; njengoba nginqumile, kuyakuma kanjalo. ²⁵Ngiyakumephula umAsiriya ezweni lami, nasezintabeni zami ngiyakumnyathela phansi; ijoka lakhe liyakususwa kubo, nomthwalo wakhe ususwe emahlombe abo. ²⁶Yileli icebo elinqunyelwe umhlaba wonke, futhi yilesi isandla eseluliwe phezu kwazo zonke izizwe. ²⁷Ngokuba uBaba wamabutho asezulwini unqumile, ngubani ongakuchitha na? Isandla sakhe seluliwe, ngubani ongasibuyisa na?”

Lapho iNkosi u-Ahazi ifa

²⁸Ngonyaka iNkosi u-Ahazi efa, kwafika lesi siprofetho: ²⁹Ungajabuli, wena Filistiya wonke, ngokuthi induku eyakushayayo yephukile; ngokuba empandeni yenyoka kuyakuphuma ibululu, nesithelo sayo siyakuba yinyoka enomlilo endizayo. ³⁰Abampofu kakhulu bayakudla bevikelekile, nabaswele bayakulala bephephile; kodwa ngiyakubulala impande yakho ngendlala, yona iyakubhubhisa insali yakho. ³¹Lila, sango; khala, muzi; ncibilika ngokwesaba, wena Filistiya wonke! Ngokuba kuphuma intuthu enyakatho, akukho nalinye ibutho elisalela emuva emaviyweni ayo. ³²Kuyakuphendulwani ezithunyweni zesizwe na? “UBaba wethu usekele iZiyoni, futhi kuyo abahluphekayo babantu bakhe bayaphephela.”