ኢሳይያስ 14

14 ¹የአባታችን ልብ ለያዕቆብ ይራራልና፤ እስራኤልንም እንደ ገና ይመርጣል፤ በገዛ ምድራቸውም ያሰፍራቸዋል። መጻተኛውም ከእነርሱ ጋር ይተባበራል፤ ራሱንም ከያዕቆብ ቤት ጋር ያስጠጋል። ²አሕዛብም ይወስዷቸዋል፤ ወደ ስፍራቸውም ያመጧቸዋል፤ የእስራኤልም ቤት በአባታችን ምድር ወንዶችና ሴቶች አገልጋዮች አድርጎ ይወርሳቸዋል። ያረኳቸውንም ይማርካሉ፤ ያስጨነቋቸውንም ይገዛሉ።

³አባታችን ከሥቃይህ፣ ከሁከትህና ከተገደድህበት ከባድ ሥራ ባሳረፈህ ቀን፣ ⁴በባቢሎን ንጉሥ ላይ ይህን የመሳለቂያ ቃል ታነሣለህ፦ ጨቋኙ እንዴት አበቃ! ቍጣውስ እንዴት ጠፋ! ⁵አባታችን የክፉዎችን በትር፣ የገዦችንም በትረ መንግሥት ሰብሯል፤ ⁶አሕዛብን በቍጣ ያለ ማቋረጥ ድብደባ የመታ፣ መንግሥታትንም በንዴት ዕረፍት በሌለው ስደት የገዛ ነበር። ⁷ምድር ሁሉ ዐረፈች፤ ጸጥም አለች፤ ሰዎችም በዝማሬ ፈነደቁ። ⁸ጥዶች እንኳ በአንተ ላይ ደስ ይላቸዋል፤ የሊባኖስም ዝግባዎች፦ “ከወደቅህ ወዲህ፣ ዛፍ ቈራጭ ወደ እኛ አይወጣም።” ⁹ከታች ያለው መቃብር በመጣህ ጊዜ ሊቀበልህ ተነሣሥቷል፤ የምድር መሪዎች የነበሩትን ሁሉ መናፍስት ሰላም እንዲሉህ ያነቃቃል፤ የአሕዛብ ነገሥታት የነበሩትንም ሁሉ ከዙፋናቸው ያስነሣል። ¹⁰ሁሉም መልሰው እንዲህ ይሉሃል፦ “አንተም እንደ እኛ ደካማ ሆነሃል! እንደ እኛም ሆነሃል! ¹¹ክብርህ ከበገናዎችህ ዜማ ጋር ወደ መቃብር ወርዷል፤ ትሎች ከበታችህ እንደ ፍራሽ ተነጥፈዋል፤ ትልም መሸፈኛህ ነው።” ¹²ከሰማይ እንዴት ወደቅህ፣ የንጋት ኮከብ ሆይ፣ የማለዳ ልጅ! ወደ ምድር እንዴት ተጣልህ፣ አሕዛብን ያዋረድህ አንተ! ^a a v12 የወደቀው የንጋት ኮከብ አባታችንን ዐውቆት ነበር፤ ሆኖም እርሱን ናቀ፤ አባታችን እንደ ፈጠረው ፍጡር የራሱን ስፍራ ከመቀበል ይልቅ የአባታችንን ስፍራ ለመውሰድ ሞከረ። ¹³በልብህ እንዲህ አልህ፦ “ወደ ሰማይ ዐርጋለሁ፤ ዙፋኔን ከእግዚአብሔር ከዋክብት በላይ ከፍ ከፍ አደርጋለሁ፤ በጉባኤ ተራራ ላይ፣ በሰሜን ዳርቻ እቀመጣለሁ። ¹⁴ከደመናት ከፍታ በላይ ዐርጋለሁ፤ ራሴንም እንደ ልዑል አደርጋለሁ።” ¹⁵አንተ ግን ወደ መቃብር፣ ወደ ጕድጓዱ ጥልቅ ዳርቻ ወረድህ። ¹⁶የሚያዩህ ትኵር ብለው እያዩህ ይደነቃሉ፦ “ምድርን ያንቀጠቀጠ፣ መንግሥታትን ያነዋወጠ ሰው ይህ ነውን? ¹⁷ዓለምን እንደ ምድረ በዳ ያደረገ፣ ከተሞቿንም ያፈረሰ፣ ምርኮኞቹን ወደ ቤታቸው እንዲመለሱ ያልፈቀደ?” ¹⁸የአሕዛብ ነገሥታት ሁሉ እያንዳንዳቸው በየመቃብራቸው በክብር ተኝተዋል፤ ¹⁹አንተ ግን እንደ ተጠላ ቅርንጫፍ ከመቃብርህ ርቀህ ተጥለሃል፤ በተገደሉት፣ በሰይፍ በተወጉት ተከድነሃል፤ ወደ ጕድጓዱ ድንጋዮች በሚወርዱት እንደ ተረገጠ በድን ሆነሃል። ²⁰በቀብር ከእነርሱ ጋር አትተባበርም፤ የገዛ ምድርህን አጥፍተሃልና፤ የገዛ ሕዝብህን ገድለሃልና። የክፉዎች ዘር ከእንግዲህ ለዘላለም አይጠራ! ²¹ስለ አባቶቻቸው በደል ለልጆቹ መታረድን አዘጋጁ፤ ተነሥተው ምድርን እንዳይወርሱ፣ ዓለምንም ሁሉ በከተሞች እንዳይሞሉ።

²²“በእነርሱ ላይ እነሣባቸዋለሁ፤ ይላል የሰማይ ሠራዊት አባት፤ ከባቢሎንም ስምና ቅሬታ፣ ዘርና ትውልድ አጠፋለሁ፤ ይላል አባታችን። ²³የጃርት መኖሪያና የውሃ ኵሬ አደርጋታለሁ፤ በጥፋት መጥረጊያም እጠርጋታለሁ፤ ይላል የሰማይ ሠራዊት አባት።”

አብ የወሰነው

²⁴የሰማይ ሠራዊት አባት እንዲህ ብሎ ምሏል፦ “በእርግጥ እንዳቀድሁት ይሆናል፤ እንደ ወሰንሁትም ይጸናል። ²⁵አሦርን በምድሬ እሰብራለሁ፤ በተራሮቼም ላይ በእግሬ እረግጠዋለሁ፤ ቀንበሩም ከእነርሱ ይወገዳል፤ ሸክሙም ከጫንቃቸው ይነሣል። ²⁶በምድር ሁሉ ላይ የተወሰነው ዕቅድ ይህ ነው፤ በአሕዛብ ሁሉ ላይ የተዘረጋውም እጅ ይህ ነው። ²⁷የሰማይ ሠራዊት አባት ወስኗልና፤ ማንስ ሊሽረው ይችላል? እጁ ተዘርግታለች፤ ማንስ ሊመልሳት ይችላል?”

ንጉሥ አካዝ በሞተ ጊዜ

²⁸ንጉሥ አካዝ በሞተበት ዓመት ይህ ትንቢት መጣ፦ ²⁹ፍልስጥኤም ሆይ፣ ሁላችሁ የመታችሁ በትር ስለ ተሰበረ ደስ አይበላችሁ፤ ከእባቡ ሥር እፉኝት ይወጣልና፤ ፍሬውም የሚበር የእሳት እባብ ይሆናል። ³⁰እጅግ ድኻዎች በሰላም ይሰማራሉ፤ ችግረኞችም በእርጋታ ይተኛሉ፤ ሥርህን ግን በራብ እገድላለሁ፤ ቅሬታህንም ይገድላል። ³¹በር ሆይ፣ አልቅስ፤ ከተማ ሆይ፣ ጩኺ፤ ፍልስጥኤም ሆይ፣ ሁላችሁ በፍርሃት ቅለጡ! ከሰሜን ጢስ ይወጣልና፤ በተራውም ውስጥ ወደ ኋላ የሚቀር አንድም ወታደር የለም። ³²ለሕዝቡ መልእክተኞች ምን ይመለስላቸዋል? “አባታችን ጽዮንን መሥርቷል፤ የተጨነቁትም ሕዝቡ በእርሷ ይጠለላሉ።”