Jacob nimite morom
Amar Pitri pora aram diya pichete, Israel pora giri jowa atyachari ke hasi kori kene ekta gana gai: prithibi tu shanti hoise, cedar gos khan bhi aram paise. Jun pora koise tai tara khan pora bhi upor te uthibo, tai etiya puk khan majot huwe, kobor bhi napai. Pichete Philistia ke koise khushi nakoribi.
14 1Kilemane amar Pitri laga mon Jacob nimite morom koribo; Tar pora Israel ke aru bar basi lobo aru tarkhan ke nijor desh te bohai dibo. Dusra desh laga manuh tarkhan logote milibo aru Jacob laga ghor logote nijor ke juri lobo. 2Manuh khan pora tarkhan ke loi kene tarkhan laga jaga te anibo, aru Israel laga ghor pora amar Pitri laga desh te tarkhan ke mota-maiki noukar hisab te adhikar koribo. Tarkhan ke bondi kora khan ke tarkhan pora bondi koribo aru tarkhan ke dukh diya khan uporte raj koribo.
3Jun din te amar Pitri pora tumi ke tumar dukh, chinta, aru tumar uporte joborjosti dhori diya tan kaam pora aram dibo, 4tumi Babylon laga raja birodh te eitu thatta kora kotha lobo: Dukh diya manuh kineka rukhi jaise! Tar khong kineka rukhi jaise! 5Amar Pitri pora biya manuh laga lathi, raj kora khan laga raj-lathi bhangi dise, 6jun pora khong te manuh khan ke narukha mar marise, jun pora khong te narukha dukh di kene desh khan ke raj korise. 7Pura prithibi aram aru chup-chap ase; manuh khan gana gabole shuru korise. 8Cypress gos khan bhi aru Lebanon laga devdar gos khan bhi tumar uporte khushi kori ase: “Jitia pora tumi ke niche girai dise, amikhan birodh te kun bhi gos-kata manuh aha nai.” 9Tolte thaka kobor tu tumi aha homoi te tumi ke lok koribole uthi jaise; prithibi laga cholawta thakise jiman manuh, tarkhan laga atma khan ke tumi ke salam koribole jagai dise; desh khan laga raja thakise jiman manuh, tarkhan ke nijor singhason pora uthai dise. 10Tarkhan sob pora jawab di kene tumi ke kobo: “Tumi bhi amikhan nisena komjur hoi jaise! Tumi amikhan nisena hoi jaise! 11Tumar dhum-dham tu tumar baja laga awaj logote kobor te niche girai dise; tumar tolte puka khan tumar bisna hisab te bisrai dise, aru kira khan tumar kapra ase.” 12Tumi sorgo pora kineka giri jaise, Din laga Tara, phojur laga putro! Tumi mati te kineka kati girai dise, desh khan ke niche girai diya tumi! a a v12 Giri juwa Din laga Tara tu amar Pitri ke jani thakise hoilebi Tar ke namani dise, amar Pitri pora bonai diya ekta jiv hisab te nijor laga jaga grohon kora bodli te, amar Pitri laga jaga lobole kosis kori thakise. 13Tumi tumar mon te koise, “Moi sorgo te uthibo; Isor laga tara khan uporte moi laga singhason uthai dibo; Moi joma huwa pahar te bohibo, uttor phale sob pora dur jaga te. 14Moi badal laga uncha jaga uporte uthibo; Moi nijor ke Sob pora Uncha Ekjon nisena bonabo.” 15Kintu tumi ke kobor te, gaddha laga sob pora tolte girai dise. 16Tumi ke dikha manuh khan tumi ke bhal pora sai kene ascharit hobo: “Eitu hei manuh ase naki jun pora prithibi ke kapai dise, jun pora rajyo khan ke hilai dise, 17jun pora prithibi ke jongol nisena bonai dise aru etar sheher khan bhangi phelaise, jun pora tar bondi khan ke ghor te jabole diya nai?” 18Desh khan laga sob raja mohima logote ghumai ase, sob manuh nijor laga kobor te; 19kintu tumi ke tumar kobor pora dur te, ghin laga ekta dal nisena phelai dise, morai diya khan pora, talwar pora bindi diya khan pora dhaki ase, jun khan gaddha laga pathor khan te niche jai, lotai diya mora gaw nisena. 20Tumi ke kobor te tarkhan logote namilabo, kilemane tumi nijor desh ke nosto korise, tumi nijor manuh khan ke morai dise. Biya kaam kora khan laga khandan laga nam kitia bhi aru nolobi! 21Tar putro khan ke morai dibole taiyar koribi, tarkhan laga baba khan laga golti nimite, titia tarkhan uthi kene prithibi ke dhori lobole aru pura duniya ke sheher khan pora bhorta koribole naparibo.
22“Moi tarkhan birodh te uthibo, sorgo laga sena khan laga Pitri koi ase, aru Moi Babylon pora nam aru baki thaka khan, khandan aru buddha-bessa, kati phelabo, amar Pitri koi ase. 23Moi eitu ke kata-janwar laga thaka jaga aru pani laga dhoba bonabo, aru Moi eitu ke nosto kora laga jharu pora harabo, sorgo laga sena khan laga Pitri koi ase.”
Pitri ki thik kori loise
24Sorgo laga sena khan laga Pitri kosom khaise: “Hosa pora Moi jineka bhabi loise, tineka he hobo; Moi jineka thik korise, tineka he thakibo. 25Moi laga desh te Moi Assyria manuh ke bhangi dibo, aru Moi laga pahar khan uporte Moi tar ke theng pora lotai dibo; tar juwali tarkhan pora uthai lobo, aru tar boja tarkhan laga kandha pora hatai dibo. 26Eitu pura prithibi birodh te thik kora laga maksad ase, aru eitu sob desh khan uporte boraikena diya hath ase. 27Kilemane sorgo laga sena khan laga Pitri thik korise, aru kun pora eitu rukhabo paribo? Tar hath boraikena ase, aru kun pora eitu ghurai dibo paribo?”
Raja Ahaz mora homoi te
28Raja Ahaz mora saal te, eitu bhabobani ahhise: 29Khushi nakoribi, sob Philistia manuh khan, tumi ke mara laga lathi bhangi jaise koi kene; kilemane saap laga shikor pora ekta bikhdhor saap ulabo, aru etar phol ekta uri bula, jui laga saap hobo. 30Sob pora gorib manuh khan surakhit pora kha-pi koribo, aru dukhiya manuh khan nirbhoi pora ghumabo; kintu Moi tumar shikor ke akal pora morai dibo, aru eitu pora tumar baki thaka khan ke nosto koribo. 31Kandi bi, dorja; hala kuri bi, sheher; bhoi pora galikena jabi, sob Philistia manuh khan! Kilemane uttor phale pora dhuwa ulai ahise, aru etar sena khan majote kun bhi ekjon pichete nagiri. 32Desh laga khobor-manuh khan ke ki jawab dibo? “Amar Pitri pora Zion bonai dise, aru tai bhitor te Tar laga dukh pa-a manuh khan rukhibole jaga pai.”