Yesaya 14 FHB Father's Heart Bible™

14 ¹Mukuma Tata wetu kamóna Yakobi kyadi; kasóla hika Kiseledi amana kabavwandisa muna tsi ya bawu. Munzenza kakhundakana yi bawu amana kadikangadika mu kanda dya Yakobi. ²Bikanda byanata bawu amana byabatwala ku kifulu kya bawu, amana kanda dya Kiseledi dyabavwa hanga basadi ba bayakala yi basadi ba bakhetu muna tsi ya Tata wetu. Bawu bakwáta bana bábakwata amana bayala bana bábabunina.

³Muna tangwa dina Tata wetu kakúvundisa mu phasi zaku, mu mvwalangani yi mu kisalu kya zitu kina bakúsadisa mu ngolu, ⁴wázangula lusekinu lolu kikuma kya kinga kya Babiloni: Khi mutindu mubuni wámana! Khi mutindu khabu zandi zámana! ⁵Tata wetu wábukuna nti wa batu bambi, koka dya bayadi, ⁶wuna wábeta bikanda mu khabu ni mafimbu makonda tsuka, wuna wáyala bikanda mu nganzi ni munyanga wukondi luvundulu. ⁷Tsi yosu yivundini amana yilembami; batu bábuda mu kuyimbila. ⁸Keti miti mya sipilesi miyangalala kikuma kya ngeyi, yi miti mya sedeli mya Libani: «Tuka wábwa ha tsi, ka mutu ku wisi zenga miti kakwísa kutudita.» ⁹Mbila ya ku nsi yitelami mu kukwisa kukutambula ha kutula kwaku; yisíkumuna bitembu bya bafwa mu kukutambula ngeyi, bana boosu bákala bapfumu ba tsi; yitombula mu biti bya bawu bya kipfumu bana boosu bákala kinga za bikanda. ¹⁰Bawu boosu bávutula amana bakúzimbwala: «Ngeyi phi wekina walembama hanga betu! Wekina hanga betu! ¹¹Lukumu lwaku balukulumuna ku mbila, ha kimosi yi mazu ma nsambi zaku; bivodya biyalumuni hanga kiphoyu kyaku ku nsi yaku, amana mimvidya myenina mvwela yaku.» ¹²Khi mutindu wábwa ku zilu, A Katumbwa ka Mwini, mwana wa mene-mene! Khi mutindu bákuzenga tii ha tsi, ngeyi wuna wákulumuna bikanda! ^a a v12 Katumbwa ka Mwini kuna kábwa, kázaya Tata wetu amana wámuloza, mu kusanda kubonga kifulu kya Tata wetu, mu kifulu kya kutambula kifulu kyandi hanga kima kina káhanga Tata wetu. ¹³Wázimbula mu mbundu yaku: «Yítombuka ku zilu; yitómbula kiti kyama kya kipfumu ha thandu ya tutumbwa twa Nzambi; yizákala ha mongu wa lukutakanu, kuna tsuka ya ku londi. ¹⁴Yítombuka ha thandu ya ndanda za matuti; yidikhítula meni-meni hanga Wuna Wenina ha Zulu Kibeni.» ¹⁵Kaasi bákukulumuna ku mbila, kuna tsuka ya dibulu. ¹⁶Bana bakumona batála ngeyi mu kuyituka: «Yandi yina mutu wuna wáningisa tsi mu kuningana, wuna wáningisa bipfumu, ¹⁷wuna wákhitula tsi hanga nganga amana wábula mbanza zandi, wuna kayambulaku bakwa boloku bandi bavutuka ku hata dya bawu?» ¹⁸Kinga zoosu za bikanda ziléka mu lukumu, kosu-kosu mu mbila yandi; ¹⁹Kaasi ngeyi bakulosa ku nganda, kwa tama yi mbila yaku, hanga litaha dya kikhazu, wufukamanu kwa batu bahonda, bana bátubula mu mbedi ya phoku, bana bisi kuluka ku matadi ma dibulu, hanga mvumbi yidyatikiswa. ²⁰Ngeyi kukhundakanwaku yi bawu mu kuzika, mukuma wázangisa tsi yaku, wáhonda batu baku. Khuna ya basadi ba mambi kayitelwaku khumbu hika! ²¹Yidikenu kuhonda bana bandi kikuma kya ndola ya batata ba bawu, ndangu kabatelamaku mu kubonga tsi yi mu kuzadisa tsi yosu ni mbanza.

²²Yitelama ha thandu ya bawu, kazimbudini Tata Mukwa ngolu zoosu, amana yizenga mu Babiloni khumbu yi ndambu yina yásala, khuna yi butuka, kazimbudini Tata wetu. ²³Yikhitula yawu kifulu kya mbisi za nseke yi madiba ma mamba, amana yikombula yawu ni khombu ya kuzangana, kazimbudini Tata Mukwa ngolu zoosu.

Mana Tata Kabanzidi

²⁴Tata Mukwa ngolu zoosu wádya ndefi: «Kyedika, bwosu yábanza, bwabuna bwakála; bwosu yázenga mukanu, bwabuna bwasikila. ²⁵Yíbukuna mwisi Asidi muna tsi yama, amana ha thandu ya miongu myama yimudyatikisa; muteti wandi wákatuka ha thandu ya bawu, amana zitu dyandi dyakatulwa ha mahembu ma bawu. ²⁶Wawu wenina mukanu wuna wázenga kikuma kya tsi yosu, amana dyawu dyenina koku dina dyátambika ha thandu ya bikanda byosu. ²⁷Mukuma Tata Mukwa ngolu zoosu wázenga mukanu, amana nati wafwana mu kusoba wawu? Koku dyandi dyátambika, amana nati wafwana mu kuvutula dyawu ku nima?»

Tangwa Pfumu Akhazi Káfwa

²⁸Muna mvula yina káfwila pfumu Akhazi, musamu wawu wátula: ²⁹Luzatukaku, benu boosu bisi Filisiti, kikuma fimbu yina yálubeta yábukana; mukuma mu kisina kya nyoka mwakatúka nyoka wa mbi, amana mbutu yandi yakála nyoka wa mbawu wuna wisi dumuka. ³⁰Baphutu bana báluta phutu badya mu ngemba, amana batu bena mu phasi balala mu kukengama; kaasi yifwisa kisina kyenu ni nzala, amana nzala yazangisa ndambu yenu yina yásala. ³¹Koluluka, mwelu; kalunga, mbanza; lulembama mu bweya, benu boosu bisi Filisiti! Mukuma mwisi witukidi ku londi, amana ka musuta mosi ku kasalanga ku nima mu ndonga yandi. ³²Khi mvutu bahana kwena bambambala ba kanda? «Tata wetu wátunga Siyoni, amana muna yawu batsukami ba batu bandi bamona kiswaminu.»