Isaia 14 FHB Father's Heart Bible™

14 ¹Amu ngoro ya Ithe witũ nĩĩkaiguĩra Jakubu tha; nĩagacooka gũthuura Isiraeli na amahaande bũrũriinĩ wao ene. Nao andũ a kũngĩ nĩmakeeyũngania nao na meĩnyiitithanie na nyũmba ya Jakubu. ²Nacio ndũũrĩrĩ nĩikaamooya imatware kũrĩa matũũraga, nayo nyũmba ya Isiraeli ĩkamagĩa matuĩke ndungata ciao cia arũme na cia andũ-a-nja bũrũriinĩ wa Ithe witũ. Nĩmakaanyiita arĩa maamanyiitĩte mĩgwate, na maathe arĩa maamahinyagĩrĩria.

³Mũthenya ũrĩa Ithe witũ akaakũhurũkia ruo rwaku, na kĩrĩĩndĩrĩ kĩaku, o na wĩra ũrĩa mũritũ warutithagio na hinya, ⁴nĩũkoombũra rwĩĩmbo rũrũ rwa kĩnyũrũri ũkĩũkĩrĩra mũthamaki wa Babuloni, ũkiuge atĩrĩ: Kaĩ mũhinyĩrĩria nĩatigĩte-ĩ! Kaĩ mangʼũrĩ make nĩmathirĩte-ĩ! ⁵Ithe witũ nĩoinĩte rũthanju rwa arĩa aaganu, mũthĩgi wa aathani, ⁶ũrĩa wahũũraga ndũũrĩrĩ na mangʼũrĩ na mahũũra matarĩ mũthia, ũrĩa wathaga ndũũrĩrĩ na marakara, ũkĩnyariiraga hatarĩ ũhurũko. ⁷Thĩ yothe nĩĩhurũkĩte na ĩgakira; andũ makaruta nyĩmbo. ⁸O na mĩtĩ ya mĩthengera nĩĩkũkenagĩra, o na mĩtarakwa ya Lebanoni ĩkoiga atĩrĩ, “Kuuma rĩrĩa wagũĩte thĩ, gũtirĩ mũtemi wa mĩtĩ ũtũũkĩrĩire.” ⁹Mbĩrĩra kũu thĩ nĩyarahũkĩte ĩgũtũnge rĩrĩa ũgũũka; nĩĩrahũraga maroho ma aakuũ magũgeithie, o arĩa othe maarĩ atongoria a thĩ; nĩyarahũraga kuuma itĩĩinĩ ciao cia ũthamaki arĩa othe maarĩ athamaki a ndũũrĩrĩ. ¹⁰Othe nĩmagagũcookeria, makwĩre atĩrĩ, “O nawe nĩũtuĩkĩte mũhũthũ o ta ithuĩ! Nĩũhaananĩte na ithuĩ! ¹¹Riiri waku nĩũharũrũkĩtio mbĩrĩra, hamwe na mũgambo wa inanda ciaku cia mũkũnga; igunyũ nĩitambũrũkĩtio ituĩke ũrĩrĩ waku rungu rwaku, nacio njoka ituĩke kĩhumbĩri gĩaku.” ¹²Kaĩ nĩũgũĩte kuuma igũrũ-ĩ, wee Njata ya Rũũciinĩ, mũrũ wa gũkĩa! Kaĩ nĩũtemetwo ũkagũa thĩ-ĩ, wee ũrĩa wagũithagia ndũũrĩrĩ thĩ! ^a a v12 Njata ya Rũũciinĩ ĩyo yagwĩte nĩyamenyete Ithe witũ ĩgĩcooka ĩkĩmũrega, ĩkĩgeria kwoya handũ ha Ithe witũ handũ ha kwĩyamũkĩra handũ hayo mwene ta kĩũmbe kĩrĩa Ithe witũ oombire. ¹³Woigire na ngoro yaku atĩrĩ, “Nĩngambata nginye igũrũ; nĩngambararia gĩtĩ gĩakwa kĩa ũnene igũrũ rĩa njata cia Ngai; nĩngaikarĩra kĩrĩma kĩa kĩũngano, kũndũ kũraya mwena wa gathigathini. ¹⁴Nĩngambata igũrũ rĩa matu marĩa matũũgĩru; nĩngeetua ta Ũrĩa-ũrĩ-Igũrũ-Mũno.” ¹⁵No rĩrĩ, wee nĩũharũrũkĩtio mbĩrĩra, nginya kũndũ kũraya mũno irimainĩ. ¹⁶Arĩa magaakuona nĩmagaakũrora, makũrorete makĩgegaga, makiuge atĩrĩ, “Ũyũ nĩwe mũndũ ũrĩa watũmaga thĩ ĩinaine, ũrĩa wainainagia mothamaki, ¹⁷ũrĩa watũmaga thĩ ĩhaane werũ, akĩmomora matũũra manene maayo, ũrĩa ũtaarekagĩrĩria mĩgwate yake ĩinũke mĩciĩ?” ¹⁸Athamaki othe a ndũũrĩrĩ makomete marĩ na riiri, o ũmwe mbĩrĩrainĩ yake mwene; ¹⁹No wee nĩũteetwo nja, ũkeeherio mbĩrĩrainĩ yaku, ũhaana rũhonge rũrĩa rũthũũrĩtwo, ũhumbĩrĩtwo nĩ arĩa moragĩtwo, arĩa matheecetwo na rũhiũ rwa njora, arĩa maikũrũkaga mahigainĩ ma irima, ũhaana kĩimba kĩrangĩrĩirie. ²⁰Wee ndũkanyiitithanio nao gũthikwo, tondũ nĩwanangire bũrũri waku mwene, ũkĩũraga andũ aku ene. Rũciaro rwa eeki ũũru rũtikanagwetwo rĩngĩ o na rĩ! ²¹Haarĩriai ũũragani wa aariũ ake nĩ ũndũ wa mahĩtia ma maithe mao, nĩgeetha matikarahũke megwatĩre thĩ, na maiyũrie thĩ yothe matũũra manene.

²²“Nĩngookĩrĩra o, ũguo nĩguo Ithe wa mbũtũ cia ita cia igũrũ ekuuga, na nĩngeheria Babuloni rĩĩtwa na matigari, rũciaro na njiaro, ũguo nĩguo Ithe witũ ekuuga. ²³Nĩngatũma gũtuĩke gĩikaro kĩa mũgũ na maria ma maaĩ, na nĩngaũhaata na mũhĩĩo wa mwanangĩko, ũguo nĩguo Ithe wa mbũtũ cia ita cia igũrũ ekuuga.”

Ũrĩa Ithe witũ Atuĩte

²⁴Ithe wa mbũtũ cia ita cia igũrũ nĩehĩtĩte, akoiga atĩrĩ, “Ti-itherũ o ũrĩa ndaciirĩire, ũguo noguo gũgaatuĩka; o ũrĩa ndatuĩte, ũguo noguo gũkaarũgama. ²⁵Nĩngoina mũAsuri bũrũriinĩ wakwa, na irĩmainĩ ciakwa nĩngaamũrangĩrĩria thĩ; nĩngweheria icooki rĩake kũrĩ o, naguo mũrigo wake ũeherio ciandeinĩ ciao. ²⁶Ũyũ nĩguo muoroto ũrĩa ũtuĩtwo wa gũũkĩrĩra thĩ yothe, na guoko gũkũ nĩkuo gũtambũrũkĩtio igũrũ rĩa ndũũrĩrĩ ciothe. ²⁷Amu Ithe wa mbũtũ cia ita cia igũrũ nĩatuĩte, nũũ ũngĩhota kũgarũra? Guoko gwake nĩgũtambũrũkĩtio, nũũ ũngĩhota kũgũcookia na thuutha?”

Rĩrĩa Mũthamaki Ahazu Aakuire

²⁸Mwaka ũrĩa Mũthamaki Ahazu aakuire, ndũmĩrĩri ĩno nĩyokire: ²⁹Mũtigakene, inyuĩ andũ a Filisitia inyuothe, atĩ rũthanju rũrĩa rwamũhũũraga nĩruunĩkĩte; amu kuuma mũriinĩ wa nyoka nĩgũkoima ndĩra ya thumu, naguo maciaro mayo matuĩke nyoka ya mwaki ĩrĩa ĩmbũkaga. ³⁰Arĩa athĩĩni mũno nĩmakaarĩithio marĩ na thayũ, nao arĩa abatari makooma marĩ ngitĩre; no niĩ nĩngooraga mũri waku na ngʼaragu, naguo ũkaananga matigari maku. ³¹Girĩka, wee kĩhingo; rĩra, wee itũũra inene; tweka nĩ guoya, inyuĩ andũ a Filisitia inyuothe! Amu ndogo nĩyumĩte mwena wa gathigathini, na gũtirĩ mũthigari o na ũmwe ũtigaga thuutha mĩharĩinĩ yayo. ³²Nĩ macookio marĩkũ makaaheanwo kũrĩ atũmwo a rũrĩrĩ? “Ithe witũ nĩahaandĩte Zayuni, na thĩinĩ wayo arĩa anyamaarĩku a andũ ake nĩmoonaga rĩũrĩro.”