ምሕረት ንያእቆብ

ኣቦና ዕረፍቲ ምስ ሃቦም፥ እስራኤል ኣብ ልዕሊ እቲ ዝወደቐ ገፋዒ መፅረፊ የልዕል፦ ምድሪ ህድእ ኢላ፥ እቶም ጽሕድታት እኳ ዓረፉ። እቲ ልዕሊ ኮዀብቲ ክድይብ እየ ዝበለ፥ ኣብ ማእኸል ሓሰኻ በጥ ኢሉ፥ መቓብር ተነፈጎ። ሽዑ ፍልስጥኤም ከይትሕጐስ ተመዓደት።

ምዕራፍ 14።

ኣቦና ንያእቆብ ክርህርሀሉ እዩ፤ መሊሱ ንእስራኤል ክሓርዮም፥ ኣብ ገዛእ ምድሮም ከዓ ከቐምጦም እዩ። እቲ ጓና ድማ ክሕወሶም፥ ምስ ቤት ያእቆብ ከዓ ክለግብ እዩ። ኣህዛብ ክወስድዎም፥ ናብ ቦታኦም ከዓ ከምፅእዎም እዮም፤ ቤት እስራኤል ድማ ኣብ ምድሪ ኣቦና ንዓኣቶም ከም ኣገልገልትን ግዝእትን ገይሮም ክወርስዎም እዮም። ነቶም ዝማረኽዎም ክማርኽዎም፥ ኣብ ልዕሊ ገፋዕቶም ከዓ ክገዝኡ እዮም።

ኣቦና ካብ ስቓይኩምን ካብ ሽበራኹምን ካብቲ እተገደድኩምዎ ኸቢድ ባርነትን ዕረፍቲ ዝህበኩም መዓልቲ፥ ነዝ መፅረፊ እዙይ ኣብ ልዕሊ ንጉስ ባቢሎን ክተልዕልዎ ኢኹም፦ እቲ ገፋዒ ኸመይ ኢሉ ተቛረፀ! ቍጥዓኡ ኸዓ ኸመይ ኢሉ ተቛረፀ! ኣቦና ንበትሪ እቶም ረሲኣን፥ ንበትሪ መንግስቲ እቶም ገዛእቲ ሰበረ፤ እቲ ንኣህዛብ ብኵራ ብዘየቋርፅ ዝወቕዐ፥ ንኣህዛብ ብቝጥዓ ብዘየቋርፅ ምስጓጕ ዝገዝእ፥ ኵላ ምድሪ ዓሪፋ ህድእ ኢላ ኣላ፤ ሰባት ድማ ብዝማረ ዓው ኢሎም ዘመሩ። እቶም ጽሕድታት እኳ ብኣኻ ይሕጎሱ፥ ኣእዋም ሊባኖስ ድማ፦ “ካብ ዝወደቕካ ኣትሒዝካ፥ ናባና ዝድይብ ቈራፂ ኦም የለን” ይብሉ ኣለዉ። እቲ ኣብ ታሕቲ ዘሎ ሲኦል፥ ክትመፅእ እንተለኻ ኽቕበለካ ተበራበረ፤ ንመናፍስቲ፥ ነቶም መራሕቲ ምድሪ ዝነበሩ ዅሎም፥ ክቕበሉኻ የበራብሮም፤ ንዅሎም እቶም ነገስታት ኣህዛብ ዝነበሩ ኸዓ፥ ካብ ዙፋናቶም የተስኦም። ኵሎም መሊሶም ከምዙይ ክብሉኻ እዮም፦ “ንስኻውን ከማና ደኺምካ ኢኻ! ንስኻውን ከማና ኴንካ ኢኻ! ግርማኻ ምስ ሙዚቃ በገናታትካ ናብ ሲኦል ወረደ፤ ኣብ ትሕቴኻ ሓሰኻ ኸም ዓራት ተነፅፈልካ፥ ሓሰኻ ድማ መኸደኒኻ እዩ።” ካብ ሰማይ ኸመይ ኢልካ ወደቕካ፥ ኣታ ኮኸብ ጽባሕ፥ ወዲ ወጋሕታ! ኣታ ነህዛብ ዘውደቕካ፥ ናብ ምድሪ ኸመይ ኢልካ ተቘረፅካ! ^a ንስኻ ብልብኻ ከምዙይ በልካ፦ “ናብ ሰማይ ክድይብ እየ፤ ዙፋነይ ልዕሊ ኮዀብቲ እግዚኣብሄር ከልዕል እየ፤ ኣብ እምባ ጉባኤ፥ ኣብ ወሰናት ሰሜን ክቕመጥ እየ። ልዕሊ በሪኽ ደመናታት ክድይብ እየ፤ ንርእሰይ ከምቲ ልዑል ክገብር እየ።” ንስኻ ግና ናብ ሲኦል፥ ናብ ወሰናት ጕድጓድ ወረድካ። እቶም ዝርእዩኻ ናባኻ ኣንቃዕሪሮም እናጠመቱ ተገሪሞም ከምዙይ ይብሉ፦ “ነታ ምድሪ ዘንቀጥቀጣ፥ ንመንግስታት ዘናወፀ፥ ንዓለም ከም በረኻ ዝገበራ፥ ከተማታታ ዘፍረሰ፥ ነቶም ምሩኻቱ ናብ ገዝኦም ክምለሱ ዘይሓደገ ሰብኣይ እዙይ ድዩ?” ኵሎም ነገስታት ኣህዛብ፥ ነፍሲ ወከፍ ኣብ መቓብሩ፥ ብኽብሪ ይድቅሱ ኣለዉ፤ ንስኻ ግና ካብ መቓብርካ ርሒቕካ፥ ከም ፅዩፍ ጨንፈር ተደርቢኻ ኢኻ፤ በቶም ቅቱላት፥ በቶም ናብ እምኒ ጕድጓድ ዝወርዱ ብሰይፊ ዝተወግኡ ተኸዲንካ፥ ከም ዝተረግፀ በድን ኴንካ። ንስኻ ኣብ ቀብሪ ምሳታቶም ኣይክትሕወስን ኢኻ፥ ንምድርኻ ስለ ዘጥፋእካያ፥ ንህዝብኻ ስለ ዝቐተልካዮ። ዘርኢ እቶም ዓመፀኛታት ድሕሪ ደጊም ከይስመ! ንደቁ ምሕራድ ኣዳልዉ፥ ስለ በደል ኣቦታቶም፥ ተሲኦም ንምድሪ ኸይወርስዋ፥ ንብዘላ ዓለም ከዓ ብኸተማታት ከይመልእዋ።

“ኣነ ኣብ ልዕሊኦም ክትስእ እየ፥ ይብል ኣቦ ሰራዊት ሰማይ፤ ካብ ባቢሎን ስምን ተረፍን፥ ውሉድን ዘርእን ክቘርፅ፥ ይብል ኣቦና። ንእኣ መንበሪ ቅንፍዝን ቀላያት ማይን ክገብራ እየ፤ ብመኾስተር ጥፍኣት ድማ ክፀርጋ እየ፥ ይብል ኣቦ ሰራዊት ሰማይ።”

እቲ ኣቦ ዝመደቦ

ኣቦ ሰራዊት ሰማይ ከምዙይ ኢሉ መሓለ፦ “ብርግፅ ከምቲ ዝሓሰብክዎ ክኸውን እዩ፤ ከምቲ ዝመደብክዎ ድማ ክቐውም እዩ። ነቲ ኣሶራዊ ኣብ ምድረይ ክሰብሮ እየ፤ ኣብ ኣኽራነይ ድማ ብእግረይ ክረግፆ እየ፤ ኣርዑቱ ካብኣቶም ክለዓል፥ ሸኽሙውን ካብ መንኩቦም ክውገድ እዩ። እዝ ኣብ ልዕሊ ኵላ ምድሪ ዝተመደበ ሓሳብ እዩ፤ እዚኣ ድማ ኣብ ልዕሊ ኵሎም ኣህዛብ ዝተዘርግሐት ኢድ እያ። ኣቦ ሰራዊት ሰማይ ወሲኑ ኣሎ እሞ፥ መን ከፍርሶ ይኽእል? ኢዱ ተዘርጊሓ ኣላ፥ መን ድማ ክመልሳ ይኽእል?”

ንጉስ ኣካዝ ምስ ሞተ

ንጉስ ኣካዝ ብዝሞተላ ዓመት፥ እዚ ትንቢት እዚ መፀ፦ ኣቱም ኵሎም ፍልስጥኤማውያን፥ እቲ ዝወቕዓኩም በትሪ ስለ ዝተሰብረ ኣይትተሓጎሱ፤ ካብ ሱር እቲ ተመን መንደላይ ተመን ክወፅእ እዩ እሞ፥ ፍሪኣ ድማ ዝበርር ዝነዲ ተመን ክኸውን እዩ። እቶም ኣዝዮም ድኻታት ብህድኣት ክጓሱ፥ እቶም ፅጉማትውን ተኣማሚኖም ክድቅሱ እዮም፤ ንሱርኩም ግና ብጥሜት ክቐትሎ እየ፥ ንሱ ድማ ንተረፍኩም ከጥፍኦ እዩ። ኣታ ደገ፥ ኣእዊ፤ ኣቲ ኸተማ፥ ኣእውዪ፤ ኣቱም ኵሎም ፍልስጥኤማውያን፥ ብፍርሓት ልብኹም ይመክኽ! ካብ ሰሜን ትኪ ይመፅእ ኣሎ እሞ፥ ኣብ ሰለፉ ድሕር ዝብል ሓደ እኳ የለን። ንልኡኻት እቲ ህዝቢ እንታይ መልሲ ክወሃቦም እዩ? “ኣቦና ንፅዮን መስሪትዋ እዩ፤ እቶም ዝተፀገሙ ህዝቡ ድማ ኣብኣ ይዕቈቡ።”