Tienụ Nna Anyị Mkpu Ọṅụ, Unu Ụwa Niile

Nye onyeisi ndị na-abụ abụ. Otu abụ. Abụ ọma.

A kpọrọ ụwa niile ka ọ lee otu ihe Nna anyị mere: o mere oké osimiri ka ọ ghọọ ala akọrọ. Mgbe ahụ, olu ahụ na-agbadata nʼịgba akaebe nke onwe — a nwalere anyị ma nụchaa anyị dị ka ọlaọcha, ndị mmadụ nyara ịnyịnya gafee nʼelu isi anyị, o wee kpọpụta anyị nʼebe ihe dị nʼụba.

Isi 66.

Tienụ Nna anyị mkpu ọṅụ, unu ụwa niile! Bụọnụ abụ banyere ebube aha ya; meenụ ka otuto ya dị ebube. Gwanụ Nna anyị sị, “Lee ka ọrụ gị si dị egwu! Site nʼike gị dị ukwuu ndị iro gị na-ehulata nʼihu gị nʼụjọ. Ụwa niile na-akpọ isiala nye gị, na-abụkwara gị abụ otuto; ha na-abụ abụ otuto nye aha gị.”

Bịanụ hụ ọrụ Nna anyị, onye dị egwu nʼọrụ ya nʼebe mmadụ niile nọ. O mere ka oke osimiri ghọọ ala akọrọ; ha ji ụkwụ gafee osimiri ahụ. Nʼebe ahụ ka anyị ṅụrịrị ọṅụ nʼime ya. Ọ na-achị site nʼike ya ruo mgbe ebighị ebi; anya ya na-ele mba niile anya—ka ndị nnupụisi ghara ibuli onwe ha elu.

Gọzienụ Nna anyị, unu mba niile; meenụ ka a nụ ụda otuto ya, onye debere anyị nʼetiti ndị dị ndụ, onye na-ekwebeghị ka ụkwụ anyị sụọ ngọngọ. Nʼihi na gị, Nna anyị, nwaleela anyị; ị nụchaala anyị dịka e si anụcha ọlaọcha. I dubatara anyị nʼime ụgbụ; ị bokwasịrị ibu dị arọ nʼazụ anyị. I kweela ka ụmụ mmadụ gbagwaa anyị nʼisi; anyị sikwara nʼọkụ na nʼime mmiri gafee, ma i meela ka anyị pụta nʼebe nwere uju ihe. ^a

Aga m eji aja nsure ọkụ bata nʼụlọ gị; aga m akwụ gị nkwa m niile, nkwa ndị egbugbere ọnụ m kwuru na ọnụ m kwere mgbe m nọ na nsogbu. Aga m achụ gị aja nsure ọkụ nke anụmanụ gbara abụba, tinyere anwụrụ ọkụ nke ebule e ji chụọ aja; aga m achụ oke ehi na ewu.

Bịanụ nụrụ, unu niile na-atụ egwu Nna anyị, aga m akọrọ unu ihe o meere mkpụrụobi m. Ejiri m ọnụ m tikuo ya mkpu; otuto dị elu dịkwa nʼire m. A sị na m zọrọ mmehie nʼobi m, Nna anyị, Onye na-achị achị, agaraghị ege ntị. Ma nʼezie, Nna anyị egeela ntị; ọ ṅaala ekpere m ntị. Otuto dịrị Nna anyị, onye na-ajụghị ekpere m, maọbụ wepụ ịhụnanya ọgbụgba ndụ ya site nʼebe m nọ!